ATLANTA, GEORGIA - O le fafine lea na fa’amoemoe e fasiotia i le vaiaso nei ina ua fa’amaonia tu’uaiga fa’asaga ia te ia i le maliu o lona to’alua i le 1997, ua toe tolopo i le aso Gafua o le vaiaso fou, ona o ni isi o mafuaaga tatau e pei ona taua e Leoleo i Georgia. O le tina o Kelly Gissendaner, 46 na fa’amoemoe e fa’auila i totonu o le falepuipui i le itula e 7:00 i le afiafi o le aso Gafua a te’a nei, e ala i le fa’aaogaina o le nofoa fa’auila, peita’i ua toe tolopo. I faamaumauga mai le falepuipui o Jackson i Georgia ua manino ai, o se taimi muamua lenei ua tolopo ai le fa’ataunu’uina o se fa’asalaga oti i totonu o le aai, talu mai le tele o tausaga ua mavae. O Gissendaner na ta’usala fa’atasi ma le ali’i sa fai le la fa’anunumi o Gregory Owen i le fa’alavelave na maliu ai lona to’alua, lea na fasiotia e Owen i lalo o le fa’atonuga sa tu’uina atu e Gissendaner. E silia i le to’a 50 fafine i totonu o Amerika o lo o fa’atali le faataunu’uina o a latou fa’asalaga o le oti, ina ua ta’usala i latou i moliaga o le fasioti tagata.

MASALOMIA SOO FA’ATASI O LE ISIS MA BOKO HARAM

UOSIGITONE - Ua fa’aalia i ni ripoti mai le laumua i Uosigitone le tula’i mai o se popolega tele i ta’ita’i o le malo o Amerika, i le masalomia lea o le tutu fa’atasi o le vaega fa’atupu fa’alavelave a le Isalama ua taua nei o le ISIS, ma le vaega fa’atupu fa’alavelave i totonu o Aferika o lo o taitaia e le tagata e igoa ia Boko Haram. I ni ripoti sa faalalauina e se televise Arapi i le aso ananafi, o lo o taua ai ni tusitusiga mai ia Haram sa tu’uina atu i luga o le ‘Facebook’, o lo o taua ai lona fa’afetaia o ta’ita’i o le ISIS e tusa ai o osofaiga ma gaioiga e fasiotia ai tagata o lo o fa’aauauina pea, atoa ai ma lana tala, e le o toe umi se taimi ae “soso’o fa’atasi loa vaega e lua”. Na taua e se sui sooupu mai le Fale Pa’epa’e, afai ae soso’o fa’atasi vaega fa’atupu fa’alavelave ia e lua, o le a atili ai lava ona faigata se auala e foia ai. Ae na taua e ni isi o sui sinia o le faigamalo a Obama, e le taitai to’ilalo Amerika i tagata fa’atupu fa’alavelave.

FA’AI’U I LE OTI MISA A NI ALI’I LAKAPI SE TO’ALUA

AUKILANI, NIU SILA - Na i’u leaga se vevesi na tula’i mai i le va o ni ali’i lakapi talavou se to’alua i Niu Sila, ina ua loka le isi i le falepuipui ma molia i le fasioti tagata fa’amoemoeina, ae ave sa’o le isi i le falemaliu e fa’atali ai uo ma aiga mo ona toe sauniga. O le ali’i Vincent Angene Skeen, 17 tausaga le matua ua molia i le fasioti tagata fa’amoemoe, e mafua mai i le fa’alavelave lea na ia ta tuiina ai le isi ali’i lakapi ta’uta’ua i le taaloga o le lakapi liki, ina ua mae’a se latou fiafia sa faia. Na taua e leoleo e fa’apea, o le ali’i ua maliu, o Luke Tipene, 16 tausaga le matua, o se tasi o fetu pupula i Niu Sila i le lakapi liki, peita’i ua muta fa’afuase’i lona ola ina ua taua’i misa ali’i i se tama’ita’i. O le aso ananafi na toe tulai ai Skeen mo le talosagaina o se tupe e tatala ai o ia i tua, peita’i sa teena e le fa’amasinoga, ma ua toe taofia nei o ia i le falepuipui, e fa’atali ai lona fa’amasinoga ia Aokuso.

MAUALUGA LE PULE I LE OLA I FITI

SUVA, FIJI - I se ripoti na fa’amatu’u mai e le sui so’o upu o le Ofisa o Leoleo a Fiti i le vaiaso nei, ua taua ai le maualuga o le aofa’i o mataupu tau pule i le ola ua mafai ona fa’amauina e le ofisa i totonu o le ulua’i 2 masina o lenei tausaga, fa’atusatusa i tausaga e 5 ua tuana’i, e na o le 4 le maualuga sa o o i ai nei ituaiga mataupu. Na taua e le ali’i suesue faapitoa o ABC Henry Brown e faapea, e 27 mataupu pule i le ola sa ripotia i ulua’i masina e lua o lenei tausaga, ma ua ta’u mai ai Fiti o le atumotu o le Pasefika ua tulaga muamua i le pule i le ola i le amataga o lenei tausaga. O i latou sa maliliu ai i nei fa’alavelave e amata atu i le 14 tausaga e o o atu i le 40 tausaga le matutua.

FA’AMALOSI E LE TOEAINA 68 TAUSAGA TEINEIITITI 8 TAUSAGA

LAUTOKA, FIJI - E 13 tausaga lea ua loka ai i le falepuipui se toeaina e 68 tausaga mai se nu’u e mamao mai le aai i Fiti, ina ua fa’amaonia e le fa’amasinoga maualuga i le aso ananafi lona faamalosia o se teineititi e 8 tausaga i le 2010. O ananafi na mae’a ai le fa’amasinoga autu o lenei mataupu ma lau ai lava ma le fa’asalaga, e pei ona taua i ni ripoti mai Fiti. Na maua atu e le toeaina ua molia le teineititi o lo o savali mai na o ia i le auala ae ua te’a le 7:00 i le afiafi, o lea na ia fa’atu ai le ta’avale sa lifi mai ai ae fa’atino loa le solitulafono.