TALA OTOOTO  O LE LALOLAGI

TO’A 150 MALILIU INA UA PAU SE VA’ALELE I SIAMANI

E leai ma se isi o le pasese e to’a 150 a le va’alele o le Germanwings na maua o soifua i le aso Lua na te’a nei, ina ua pau le va’alele o le Airbus A320 mai lana malaga i Barcelona i Sepania, e aga’i atu i Dusseldorf i Siamani. E tusa ai ma ripoti mai Sepania sa taua ai e fa’apea, e to’a 144 le pasese a le va’alele, ma le au va’a e to’a 6 sa i luga o le va’alele i le taimi na tupu ai le fa’alavelave. Na taua i ripoti le faigata tele o taumafaiga a le vaega fa’aola e ofo atu se fesoasoani mo le pasese a le va’alele, talu ai le tulaga gaoa ma le faigata ona uia o atumauga maualuluga na pau ai i luga le va’alele. Fai mai le au su’esu’e, e mautinoa lava e leai ma se tasi o le pasese o ola, pe a fuafua i le maualuga na pau mai ai le va’alele, atoa ai ma le salalau tasi solo o vaega o le va’alele. O lo o fa’aauau pea suesuega i le mafua’aga o lenei fa’alavelave.

TOLOPO ASO O ESE MAI AI FITAFITA AMERIKA MAI AFGHANISTAN

Ua fa’amaonia mai e le Fale Pa’epa’e se fa’aiuga a le ali’i peresetene o Amerika ia Obama, i le toe tolopo lea i le fa’aiuga o le tausaga o le taimi e o ese mai ai fitafita Amerika o lo o i totonu o Afghanistan, i le mae’a ai lea o se fonotaga i le va o ta’ita’i o malo e lua i le vaiaso nei. I le amataga o le tausaga nei, na fa’ailoa ai e Obama e fa’apea, o le a fa’aitiitia fitafita a Amerika i totonu o Afghanistan mai le toa 9,8000 i le to’a 5,500. Ae i le aso ananafi na fa’alauiloa mai ai e le Failautusi a le Fale Pa’epa’e, le suia o le fa’aiuga a le alii peresetene, o le a le fa’aitiitia le aofa’i o fitafita, ae o le toe fa’aauau le umi e nonofo ai. Na taua e Obama e fa’apea, e fa’aauau pea le galulue faatasi o malo e lua, atoa ai ma le naunau o Amerika e puipuia pea laufanua o Afghanistan, ona o lo o fa’atupulaia ai pea osofaiga ma faiga fa’aterorisi faasaga i tagata savili.

TATALA INA UA MAE’A TAUSAGA E 25 I LE FALEPUIPUI

O le fafine lea na loka i le falepuipui mo le 25 tusaga e fa’atali ai le fa’asalaga o le oti fa’asaga ia te ia, ina ua ta’usala o ia i le fa’alavelave na fasiotia ai lana tama, ua toe tatala i tua e le fa’amasinoga i le vaiaso nei, ina ua auau fa’atasi ali’i fa’amasino e toe suia le fa’aiuga sa tu’uina atu ia Debra Mike, ina ua musu le fa’amasinoga e iloilo le talosaga apili a Mike sa fa’aulu, ma faia ai loa le fa’aiuga e fa’aleaoga le moliaga na ta’usala ai o ia. O le tama a Mike, o Christopher Mike na fasioti e ni ali’i se to’alua i le aso 1 Tesema 1989, ma fa’asala ai loa ali’i ia e to’alua i le oti, ina ua fa’amaonia moliaga o le fasioti tagata fa’asaga ia te i laua, ae ta’usala Mike i le moliaga o le taupulepule lea ma nisi tagata e fasioti lana tama. Na fa’ailoa e le isi ali’i ua fa’asala i le oti i leoleo, sa talosaga atu Mike la te fasiotia lana tama, ina ia maua ai le tupe o le Inisiua, peita’i o lea fa’amatalaga e le moni. Sa taua fo’i i le fa’aiuga a le fa’amasinoga e fa’apea, o le ali’i leoleo su’esu’e sa ia su’esu’eina le mataupu, e le fa’amaoni i lana galuega, o le isi lena mafua’aga o le le talitonuina o ana mau sa faia fa’asaga ia Mike. Na ta’utino Mike i le aso na magalo mai ai i tua, e mama o ia ma le toto o lana tama.

FA’ASALA I LE OTI TAGATANU’U E TO’ATOLU MAI SAINA

E to’atolu tagatanu’u o le malo o Saina na fa’asala i le oti i le vaiaso nei, ina ua fa’amaonia lo latou auai i le fa’alavelave lea na latou fasiotia ai ni tagata se to’a 31 i le nofoaga o nofoa afi i le tausaga na te’a nei, e fa’aaogaina ai a’upega o naifi. O le aso 1 Mati 2014 na tula’i mai ai lenei fa’alavelave mata’utia i Saina, ina ua aga’i atu ni ali’i se to’a 8 e ofu uli uma ma latou foliga e ufiufi, e tofu i latou ma sapelu uumi toe maamaai, ma amata ai loa ona latou fa’ataunu’u le oti i tagata sa nofonofo ai i le nofoaga e fa’atali ai nofoa afi. Na taunu’u leoleo ma latou fasiotia ai ali’i e to’alima, se’i vagana ai le to’atolu na sosola, peita’i na toe maua mulimuli ane ma taofia ai loa i le falepuipui e fa’atali ai a latou fa’asalaga.