MATAGOFIE FA’AI’UGA O VAIASO O FAIA’OGA

I a’oga na mafai ona fa’ailoa mai a latou fuafuaga na fa’amae’a ai le latou vaiaso, na iloga ai, e le’i fa’ataga faia le taualoaina o le tautua a Faia’oga e le mamalu o PTA, o nisi o kamupani e masani ona feso’ota’i ma a’oga, ae maise fo’i o pulega i totonu o a’oga ta’itasi.

I Matatula Elementary, sa matua saunia lelei a latou malu taeao i aso uma o le vaiaso, o lea gaoioiga alofa sa faatinoa lea e le pulega a le a’oga, soso’o ai ma le aso Lulu na matua saunia lelei fo’i ma le ‘aiga o le aoauli. Peita’i o le aso Tofi na fa’asalalauina fa’ala’ua’itele ai le fa’afetai a le fanau aoga, PTA ma le vasega o matua uma o lo’o a’oa’oina a latou fanau e le vasega o faia’oga e 16 o lo’o ua faigaluega i lea a’oga. O le fa’asalalauga, sa totogia lea e le Eastland Market a le tina o Elisapeta Tagoa’i i Tula, o se faleoloa o lo’o tua’oi lelei ma lea laumua.

I le Laumua i Manulele Tausala, sa fa’apea fo’i ona saunia uma lava malu taeao mo faia’oga i aso ta’itasi o le vaiaso, ae na ala usu atu i latou i a latou ula lole mai le Ofisa ma le Pulega, le malu taeao, ae maise o le aiga fo’i o le aouli. E ese mai lea sa fa’atulaga le latou toe aso, ina ia faia ai le latou tauvaga “Tausala ma le Manaia” lea sa vaetolu i ai le aofa’i o faia’oga i lea a’oga, e 21 i latou, e fa’atautaia ai.

O le i’uga o le tauvaga, sa maua le fa’ailoga e le vasega o faia’oga mai le vasega 6 se’ia o’o i le vasega 8, ma ua taua’aoina aloa’ia i ai le pale sa tau’avea mai e le tausala sa tula’i mo le tolu tausaga, Miremine Taufete’e ma le susuga Fa’amanu Fa’amanu.

O le aoga i Lauli’i Elementary sa fa’ataua fo’i a latou faia’oga i ala e pei ona fa’ailoa i luga. Usupo atu i le aso Gafua i nai meaalofa e taua’aoina atu e le fanau mo a latou faia’oga, ae ua mae’a tapena mai fo’i le a latou malu taeao e le pulega e amatalia ai le vaiaso. Peita’i i le aso Lulu lava ia, sa ofoina ai le malu taeao e se tasi o tina o le afioaga, ma o lana lava lea tautua ofo mo faia’oga i tausaga ta’itasi.

Peita’i o le aso Faraile na fa’atulaga ai loa le latou fiafia tele i le Taelega i le 2Dollar Beach i Amaua. O lea fa’atasiga sa fa’atupe atoa e le PTA mo faia’oga uma i Lauli’i Elementary.

FOA’I SOSAIETE PTK /ASCC I LE KOLUSE MUMU

O le aso Lulu o le vaiaso na te’a na fa’ate’ia ai le Ofisa Autu o le Koluse Mumu i Tafuna i le foa’i mai le vasega o fanau e maualuluga togi i le Kolisi Tu’ufaatasi mai le PTK Society.

O ato lavalava e tusa ma le 10, taga lavalava ma mea sa latou tu’ufa’atasia mo le Koluse Mumu ina ia fa’asoa atu i aiga e o’o i ai ni pagatia le ma’alofia. O lea foa’i sa talia lelei e le susuga Vaela’a Tuilefano o le Koluse Mumu, ma sa ia fa’ailoa atu i le fanau a’oga, “O se fa’ata’ita’iga lelei ua outou faia i lenei aso. Sa matou le mafaufauina sa outou foa’i, ae o lo outou agaga foa’i mo e ua puapuagatia, o se mea lelei ua outou fa’ata’ita’ia atu i nisi tupulaga talavou uma o le tatou atunu’u. Fa’afetai i le agaga na fa’atino ai lenei foa’i, ae o le mea sili, fa’afetai le alofa!”

ITULA E ASIASI AI GASEGASE I LE FALEMA’I

Pe afai ua e manatu e asia se tasi ua fa’ata’otolia i le maota gasegase i Faga’alu,  aua ne’i fa’atelea se asiga ma ia fautuaina, ua toe fa’amamafaina nei itula mo asiga e pei ona sa sau ai.

Ua fa’atagaina asiga mo e gasegase mai le itula e 10 i le taeao se’ia pa’ia le itula e 4 i le afiafi, ma le itula e 6 i le afiafi se’ia o’o i le itula e 8:00 i le po. Ua matua le toe faatagaina lava se isi e toe asia ma’i pe a te’a le itula e 8:00 i le po, ma e na’o le lua fo’i tagata e fa’atagaina ona tausima’i, ae muamua ona sainia lea maliliega e le foma’i a le ua gasegase.

Ona sa masani ona aumai ato pa’u lavalava, fala moe ma isi mea tetele fa’apena, ua fautuaina aiga ina ia taofia lea masani, ona o lea ua fa’atulaga e ao ina faia asiasiga a tama’ita’i tausima’i fa’apea ma leoleo o le falema’i i nei ituaiga o mea, aua e le fa’atagaina lea i totonu o le falema’i.

Ua fa’asaina fo’i ma mea’ai e la’u mai tua i aiga i le ma’i ma tausima’i, ona o le tulaga e toe sese ai mea taumafa e aai ai ma’i ae ua mae’a fa’atulaga e le falemai mea tausami e ao ina taumafa e ma’i ina ia vave togafitia ai latou gasegase. O nisi o mea’ai ua aumaia i aiga, e ono toe lamatia ai togafitiga mo gasegase.