IOE LE PAGOTA I ONA MOLIAGA

O le alii pagota lea na sola i tua ma le toese ae o ua eva ma lana uo teine i le Bowling Alley i Tafuna, ua ia tautino i luma o le Faamasinoga Maualuga, e faamaonia tuuaiga faasaga ia te ia.

Na tautino le alii o Joseph Mamona, 23 tausaga le matua e faapea, e faamaonia sa sola i tua mai le toese i le masina o Oketopa ao taofia ai o ia, ma la o ai ma se tamaitai ua la tafafao i le Bowling Alley.

O moliaga ua tali ioe ai Mamona e aofia ai le sola ese mai le toese, faapea ai ma le tete’e atu i leoleo a’o taumafai e pu’e faapagota o ia, ma o ia faasalaga e mafai ona faasala ai se tasi i le falepuipui mo le umi e le sili atu i le lima tausaga i le moliaga e tasi.

O le mataupu lenei na tofu atu i le ofisa o leoleo, ina ua vaaia e se Leoleopo o le Bowling Alley le ua molia o lo o tafafao ma sana uo teine i totonu o le fale kalapu, ona ia vili lea o le toese i Tafuna ma fesili i ai, pe ua magalo le ua molia po o taofia pea i le falepuipui, ae na faailoa ane i ai e le tagata na talia le telefoni, o Mamona o lo o taofia pea i le toese i Tafuna mo le tuliina o lana faasalaga.

Na logo e le Leoleopo le Ofisa o Leoleo, ma agai atu ai loa leoleo i le Bowling Alley, peitai e taunuu atu ae sola le ua molia ma fai ai loa a latou tuliga, mulimuli ane toe maua o ia ma toe taofia loa i Tafuna.

E le o se taimi muamua lea ua sola ai i tua Mamona. E tusa ai ma faamaumauga a le faamasinoga, o le tausaga e 2008 na la sosola ai foi i tua ma le isi pagota, ma fai ai fo’i a latou tuliga ma leoleo.

O Mamona o lo o tuli sona faasalaga faafalepuipui e 10 tausaga, ina ua tausala o ia i le faalavelave lea na ia taumafai e osofai ai se tina matua i totonu o lana taavale, ina ua ia tuu i ai le naifi i le ua o le tina ma fai i ai e avatu se tupe mo ia.

O le aso 20 Tesema lea ua faatulaga e lau ai le faasalaga a le ua molia, ma o lo o taofia pea o ia i le toese i Tafuna e faatali ai le aso e lau ai lona faasalaga.

IOE TOEAINA 63 TAUSAGA I TUUAIGA A LE MALO

O le toeaina e 63 tausaga le matua lea na tuuaia i lona tagofia o itutinosa o se teineititi e laititi i lalo o le tulafono, ua ia tautino i luma o le faamasinoga maualuga i le vaiaso na tea nei, e faamaonia tuuaiga faasaga ia te ia.

O le a le mafai e le Samoa News ona faalauiloa le igoa o le ua molia, ona o puipuiga i le tamaitai o lo o aafia i lenei mataupu.

E tolu moliaga na ulua’i tuuaia ai e le malo le ua molia, ae i lalo o se maliliega sa ia sainia ma le malo ma ua talia foi e le faamasinoga, ua ia tali ioe ai i le moliaga muamua o lona tagofia lea o itutinosa o se tamaitai talavou, ae solofua e le faamasinoga moliaga e lua o lo o totoe ai i le pepa o tagi.

I le tali ioe ai o le ua molia i le moliaga mamafa lea ua ta’usala ai o ia, sa ia ta’utino ai e faapea, i se taimi o le aso 15 Setema 2013 i Amerika Samoa, sa ia tagofia ai itutinosa o se tamaitai e talavou i lalo o le tulafono, e aunoa ma se faatanaga faaletulafono.

Na tautino le ua molia e faapea, o lana gaioiga sa faia i lea aso sa le tusa ai ma ala o letulafono.

O lo o taofia pea i le toese le ua molia e faatali ai le aso 20 Tesema 2013 lea ua faatulaga e lau ai ona faasalaga.

NOFOVAAVAAIA LE ALII GAOI

O le alii talavou mai Iliili lea na ia gaoia se paelo vali sa i tua o se pikiapu na paka i luma o se faleoloa i le masina o Setema na te’a nei, ua nofovaavaaia mo le 18 masina, ina ua ta’usala o ia e le faamasinoga faaitumalo i moliaga mama e lua o le gaoi ma le faatupu vevesi i nofoaga faitele.

I le tausala ai o le alii o Nick Logotaeao, ua poloaina ai o ia na te totogi le salatupe e $150 i le faamasinoga, totogi le $95 mo le tau o le paelo vali sa ia gaoiina, atoa ai ma le faasa lea ona toe latalata i luma o le faleoloa lea na tulai mai ai le solitulafono.