MOLIA MIKAELE ALIVA AVE TA’AVALE A’O SE’I LONA LAISENE

O le ali’i lea na ta’usala e le fa’amasinoga fa’aitumalo i le masina o Iuni na te’a nei i le moliaga mama o le ave ta’avale ‘ona, ua molia nei o ia i le moliaga mamafa o le ave ta’avale a’o se’i lona laisene, o se solitulafono e mafai ona fa’asala ai se tasi i le toese i Tafuna mo le umi e le silia i le 5 tausaga, pe fa’asala fo’i i se salatupe e le silia i le $5,000, ae fa’amalosia ai le tuli o aso e 90 i le falepuipui.

Na avea le le usita’i o Mikaele Aliva i fa’ailoilo o le auala ma itu na taofi ai loa e leoleo lana ta’avale, ae fesiligia o lona laisene, peita’i na tali le ua molia i leoleo, o lona laisene o lo o se’i e le fa’amasinoga ina ua ta’usala o ia i le moliaga o le ave ta’avale ‘ona i le ogatotonu o le tausaga.

O le masina fou lea ua toe tolopo i ai le isi iloiloga o lenei mataupu, ma le fa’amoemoe e tatau ona oo atu i le iloiloga lea ua i ai se maliliega ua uma ona saini e le ua molia ma le malo ma fa’amuta ai loa lenei mataupu.

TAOFIA I LE TOESE SE ALI’I TALAVOU MO LE LUA VAIASO

E lua vaiaso lea ua fa’asala ai e le fa’amasinoga fa’aitumalo se ali’i talavou e 15 tausaga le matua, e taofia ai i le falepuipui o Tamaiti Laiti i Tafuna, ina ua fa’amaonia lona le usitaia o poloaiga sa tu’uina atu e le fa’amasinoga ia te ia, i le avea lea o ia ma tagatanu’u lelei e tausisi i tulafono uma a le malo.

O le aso Lulu na te’a nei na tatala ai e le fa’amasinoga fa’aitumalo mai le falepuipui o Tamaiti Laiti le ali’i ua toe fa’asalaina nei, ina ua ta’usala o ia i le moliaga o le tagofia o le ava malosi ae lei atoa lona 21 tausaga, ma fa’anofovaavaaia ai o ia mo le 6 masina i lalo o tuutuuga a le fa’amasinoga e ao ona usita’i i ai.

O ni isi o ia tu’utu’uga e aofia ai le fa’asa lea ona ia toe tagofia le ava malosi, fa’asa ona ia toe solia se tulafono, fa’asa fo’i ona ia toe tuua lona aiga, amata atu i le 6:00 i le afiafi seia oo atu i le 6:00 i le taeao, sei vagana ua latou malaga fa’atasi ma ni isi o ona matua ona fa’atoa mafai lea ona ia tuua lona aiga.

O le po o le aso Lulu lava lea na tatala ai le ali’i talavou lea i tua mai le falepuipui, na toe loka mai ai o ia e leoleo i Aua fa’atasi ai ma se isi ali’i talavou, ona o tu’uaiga i le tagofia lea o le ‘ava malosi atoa ai ma le fa’atupu vevesi i nofoaga faitele, ma fai kerisimasi ai loa i laua i le falepuipui o Tamaiti Laiti i Tafuna, e fa’atali le taimi e tutula’i ai i luma o le fa’amasinoga i le aso Faraile na te’a nei.

O se iloiloga pu’upu’u a le ali’i ua molia sa faia i luma o le afioga i le ali’i fa’amasino ia John L. Ward II, na poloaina ai loa le taofia o ia i le falepuipui mo le lua vaiaso, e fai ma lesona i lona le usitaia o poloaiga a le fa’amasinoga sa tu’uina atu ia te ia.

Na taua e le loia a le malo o lo o gafa ma le taulimaina o mataupu a fanau laiti ia Terri Bullinger e fa’apea, o se tasi o itu o lo o mamafa i ai su’esu’ega a leoleo i lenei mataupu, o le taumafai lea e saili le tagata poo ni tagata sa latou tu’uina atu pe fa’atau atu ‘ava malosi i ali’i talavou e to’alua sa taofia.

NOFOVAAVAAIA LE AU FA’ATUPU VEVESI

E ta’i 12 masina lea ua fa’anofovaavaaia ai e le fa’amasinoga fa’aitumalo i le vaiaso na te’a nei ni ali’i se to’alua, ina ua ta’usala i laua i moliaga o le fa’atupu vevesi i nofoaga faitele.

E ui e na o le ta’itasi moliaga mama ua ta’usala ai Veli Lafitaga ma Unuto’a Viliamu, ae o le itu e taua ai le la mataupu i le fa’afofoga a le fa’amasinoga, ana le fa’ateia i laua e se tagata o le aiga na a’afia, semanu e taunu’u le la fuafuaga sa taumafai e fa’atino, o le osofaia lea o se faleoloa i Tafuna i se po o le masina o Oketopa na te’a nei, a’o ‘onana i laua.

Na tau fai fa’atoese Lafitaga ma Viliamu i le fa’amasinoga e tusa ai o le solitulafono sa la faia, ma la talosagaina ai se isi avanoa mo i laua se’i fa’aauau ai pea ona la galulue e tausi o la aiga, i se konekarate kamuta ua silia i le ta’i 7 masina o la galulue ai.

Na fautua le ali’i fa’amasino ia John L. Ward II i ali’i e to’alua sa molia e fa’apea, soo se tasi na te tagofia le ava malosi, e leai ma se filifiliga tonu ma sa’o na te maua mai ai, se’i vagana le fa’aseseina i filifiliga le sa’o atoa ai ma le soli o le tulafono.

“Ua lua laki e lei taunu’u le fuafuaga sa oulua fuafua e fa’ataunu’u, aua ana taunu’u, fa’apenei e sili atu ona mamafa se fa’asalaga fa’afalepuipui e ono fa’asala ai oulua e le fa’amsinoga, ona o le gaioiga sa oulua taumafai e fa’ataunu’u”, o le saunoaga lea a Ward i ali’i ia e to’alua.

O ni isi o tuutuuga o le nofovaavaaia a i laua nei e to’alua, o le fa’asa lea ona la toe taumafai e o i le faleoloa na a’afia, fa’asa ona la toe tagofia le avamalosi, pe la te toe taumafai fo’i e fa’afeso’ota’i molimau a le malo, a ia avea i laua ma tagata fa’amaoni e tausisi i poloaiga a le fa’amasinoga i taimi uma.

Ua poloaina fo’i i laua la te totogi le salatupe e ta’i $125 i totonu o le ulua’i 90 aso o le la fa’asalaga nofova’ava’aia.