MAUA LE ALI’I LONA FA SA TAU SAILI E LEOLEO

O le vaiaso na te’a nei na pu’e fa’apagota ai e leoleo le ali’i e to’afa i ai i latou o lo o masalomia, i le fa’alavelave lea na tafana le ofisa o leoleo i Leone i le masina o Novame 2014.

O le ali’i mulimuli sa tau saili e leoleo, o Solia Mosegi, po o JOE Palagi e pei ona silafia ai o ia e le to’atele, o lo o tu’uaia i moliaga mama e tolu, ma sa ia teena uma ia moliaga ina ua tula’i i luma o le fa’amasinoga fa’aitumalo i le aso Lulu na te’a nei.

O moliaga e tolu o lo o tu’uaia ai Mosegi e aofia ai moliaga e lua o lona fesoasoani lea i se tasi i le fa’atinoina o le solitulafono o le fa’ao’olima i le tulaga lua, atoa ai ma le moliaga o lona fesoasoani e fa’atupu le moliaga o le fa’aleaga meatotino.

Na taua e ni molimau i leoleo e pei ona taua i fa’amaumauga a le fa’amasinoga o Mosegi sa ia aveina le ta’avale lea o lo o tu’uaia na fa’ataunu’uina ai le solitulafono.

O lo o tu’uaia fa’atasi Mosegi ma isi ali’i e to’alua o Tuliese Taliu ma Sinapati Tu’ufa’anatu i moliaga mama e tolu, se’i vagana ai Manu Lefatia o lo o tu’uaia i moliaga mamafa e tolu.

O i latou e to’afa e aofia ai Mosegi, Taliu, Lefatia ma Tu’ufa’anati.

O lo o taofia uma i le toese i Tafuna ia Mosegi ma isi ali’i e to’atolu na pue fa’apagota muamua e leoleo, e aunoa ma se tupe ua fa’atulaga e tatala ai i latou i tua.

TALIA LE TALOSAGA A LEPUIAI ALLEN MAYER

O le vaiaso ua te’a na talia ai e le fa’amasinoga maualuga se talosaga na fa’aulu e le ali’i sa avea ma pule o le kamupani va’a a le Pacific Shipping Services (PSA), mo se avanoa e tatala ai o ia i tua e faigaluega, a o tuli ai lona fa’asalaga fa’a falepuipui i le toese i Tafuna mo le umi e 20 masina.

I le aso na lau ai le fa’asalaga a le susuga a Lepuiai Allen Mayer, sa fa’ailoa i ai e le fa’amasinoga e fa’apea, e mafai ona iloilo e le fa’amasinoga sana talosaga mo se avanoa e tatala ai o ia i tua e faigaluega, pe afai na te fa’amautuina atu i le fa’amasinoga, ua i ai se galuega mautu e faigaluega mo’i ai.

E tusa ai o le talosaga a Lepuiai i le fa’amasinoga, o le kamupani o le American Asia Pacific lea e fa’atautaia e se tasi o ana uo, o le kamupani lea o le a galue ai o ia.

O isi tuutuuga o le nofovaavaaia e 7 tausaga a Mayer sa tu’uina atu e le fa’amasinoga, o lona totogiina lea o le tupe e silia i le $180,000 aga’i i le PSA, ma ia aua fo’i ne’i ona toe solia se tulafono a le malo.

Na ta’usala Mayer i le moliaga o lona ave fa’agaoi lea o ni mea totino sa tu’uina atu i lalo o lana vaavaaia, ina ua ia ave fa’agaoi le silia i le $200,000 mai tupe a le PSA, i taimi a’o avea ai o ia ma pule o le lala a le kamupani i Amerika Samoa.

NOFOVAAVAAIA LE ALI’I NA FA’AO’OLIMA I LONA TO’ALUA

O le ali’i e 32 tausaga le matua mai Vaitogi lea na tu’uaia e le malo i lona fa’ao’olima lea i lona to’alua i le amataga o le tausaga nei, ua fa’anofovaavaaia e le fa’amasinoga fa’aitumalo mo le 18 masina, ina ua ta’usala o ia i le moliaga mama o le fa’atupu vevesi i totonu o lona aiga, i lalo o se maliliega sa latou sainia mal e malo ma talia fo’i e le fa’amasinoga.

Na taua i le maliliega se talosaga a le malo, ina ia nofovaavaaia lenei ali’i, ae aua ne’i tu’uina atu o ia i le falepuipui.

Na fa’aalia e le fa’amasinoga i le ali’i ua ta’usala e fa’apea, e le o se mea lelei lona fa’aoolima i lona to’alua a’o ‘ona, e le iloa lava se mea matuia e ono tula’i mai ai, ona sili atu lea ona mamafa se moliaga e molia ai o iae le malo.

Na fautua le ali’i fa’amasino ia Elvis Patea i le ali’i lea e fa’apea, e tatau ona fa’aalu sa’o ana tupe i mea e tausi ai lona aiga, ae le o le ‘ava malosi e leai se mea aoga e maua mai ai, se’i vagana ai le loka i le falepuipui atoa ai ma le fa’alumaina..

Ua poloaina fo’i e le fa’amasinoga le ua molia na te totogi le salatupe e $125, fa’asa ona ia toe tagofia le ava malosi, a ia auai i ni aoaoga e fesoasoani ai i le ita atoa ai ma a’afiaga o le ‘ava malosi.

O le fa’alavelave lenei na tofu atu i le ofisa o leoleo i Tafuna, ina ua logo e ni aiga tuai leoleo mo se fesoasoani, ina ua latou fa’alogoina le ee mai o le to’alua a le ali’i ua molia i totonu o le fale, o lo o fasi e le ua molia.

Na taunu’u leoleo ma latou maua atu ai le fafine i luma o le potu malolo, ma ona foliga o lo o manu’a, ae ua leai le ua moia, ua sola ese mai le fale. Ina ua fesiligia e leoleo le fafine na a’afia, sa ia fa’amatala uma loa i ai le mea sa tupu, ma aga’i atu ai loa leoleo e saili le ua molia, ma maua atu ai i le fale o lana uo, ma pu’e fa’apagota mai ai loa.