FA’AFEFE LONA TO’ALUA PE A VILI LEOLEO

O le ali’i lea na ia faia ni folafolaga e fa’afefe ai lona to’alua pe afai na te viliina leoleo i le taimi na tula’i mai se feeseeseaiga i lo la aiga i le faaiuga o le vaiaso na te’a nei, ua poloaina e le fa’amasinoga e aua nei ona toe taumafai e fa’afeso’ota’i lona to’alua ma le la fanau i le taimi nei, sei mae’a taualumaga o lana mataupu o lo o fa’agasolo i luma o le fa’amasinoga.

O le mataupu lenei na tofu atu i le ofisa o leoleo i Tafuna ina ua logo e le tina o le aiga leoleo mo se fesoasoani, ina ua toe tula’i mai fo’i se feeseeseaiga i le va o laua ma le ua molia, ma fa’aleaga ai loa meatotino sa i totonu o le fale.

Na taua e le tina i leoleo e fa’apea, o le tele o taimi la te vevesi ai ma lona to’alua, e mafai lava ona toe teuteu ma toe foia, ona faia lea o le faaiuga e le faafesootaia leoleo, ae talu lava ona toe fo’i mai i Amerika i ni nai masina e le i mamao atu, e toeititi lava vevesi lo la aiga i po uma, ma o ni isi o taimi e laiti lava ma fa’atauva’a mataupu la te vevesi ai.

O le vevesi la lea na mafua ai ona logo leoleo, na mafua mai ina ua o le fafine ma lana fanau i le fale o lona uncle e momoe ai, ae na alu ai fo’i ma le ua molia ma fai i lona to’alua, ua fia ai ae ua leai se meaai i luga o le laulau mo ia.

Na taumafai le uncle o le fafine e fa’ato’afilemu le ua molia ae na avea ma itu na ita ai o ia ma palauvale i le uncle, ma toe fo’i ai loa i le fale a matua a lona to’alua o lo o latou nonofo ai ma fa’aleaga meatotino o lo o i ai.

Sa ia folafola fo’i lona fasi tigaina o lona to’alua pe afai na te viliina leoleo e ta’u i ai le fa’alavelave ua tupu.

O meatotino sa fa’aleagaina e pei ona taua i faamaumauga a le faamasinoga e aofia ai tauai solo o lavalava a lona toalua ma lana fanau, faaleaga le masini ea malulu atoa ai ma le faaleaga o fa’amalama o le fale.

Na teena e le ua molia moliaga mama e lua ua tuuaia ai o ia e le malo, o le faaleaga meatotino atoa ai ma le faatupu vevesi i totonu o lona aiga, ma ua tolopo lana mataupu e toe valaau i totonu o le isi lua vaiaso, ae ua poloaina o ia e le fa’amasinoga e aua nei ona toe taumafai e faafesootai lona toalua ma lana fanau i soo se auala.

TOE MOLIA FO’I MALIEO MAUI JR I LE TULAFONO

O le faaiuga o le vaiaso na te’a nei na toe taofia ai fo’i e leoleo le ali’i talavou o Malieo Maui Jr, ona o tu’uaiga i lona faia lea o ni amioga e ono save’u ai le nonofo filemu i totonu o lona aiga aemaise ai o tagatanuu lautele.

O Maui Jr na nofovaavaaia i luma o le fa’amasinoga maualuga, ao lea fo’i ua toe molia i luma o le fa’amasinoga fa’aitumalo.

O le mataupu lenei na tofu atu i le ofisa o leoleo i Fagatogo, ina ua logo e le tama a le alii ua molia, o ia fo’i o se Leoleo mo le Vaega o le Marine Patrol leoleo mo se fesoasoani, fa’asaga i ni amioga o lo o faia e lona atali’i i lo latou fale i Fagatogo, i lona ta tu’i lea o le puipui o le fale ma fa’aleaga isi meatotino i totonu o le fale ae o lo o momoe lo latou aiga e aofia ai lona tina matua.

E taunu’u le telefoni lea i le ofisa o leoleo mo se fesoasoani, ae o le taimi fo’i lea ua maea ona logo ai e se aiga tuaoi le ofisa o leoleo mo se fesoasoani, e tusa ai o le mataupu lava lea e tasi.

Na taua e le aiga le ‘ona atu o le ua molia ma amata ona faia ni uiga e save’u ai le filemu i totonu o le fale, sosoo ai loa ma lona tauai solo o meatotino i le fale, tata’e mata uila i tua o le umukuka, faapea ai ma lona ta tu’i o puipui o le fale ma fa’aleagaina ai.

Na sola le ua molia ina ua taunu’u leoleo, peita’i ina ua tuana’i ni nai itula, sa toe aga’i atu leoleo ma maua atu ai o ia i le fale ma taofia fa’apagota mai ai loa.

Na teena e le ua molia tuuaiga faasaga ia te ia, ma ua toe fa’atulaga le isi ana iloiloga e toe valaau i le vaiaso fou.