Ads by Google Ads by Google

Tala otooto mai le Fa’amasinoga

MOLIA SE ALI’I ASIASI SOIFUA MALOLOINA I LE FA’ATUPU VEVESI

 

O le fa’aiuga o le vaiaso na te’a nei na taofia ai leoleo i le toese i Tafuna, se ali’i Asiasi o le Matagaluega o le Soifua Maloloina a le malo, ona o tu’uaiga i lona faia lea o ni gaioiga e ono save’u ai le nonofo filemu o aiga tuaoi, ina ua ia pisapisao ma fa’aumuumu i le leva o le po i fafo o lona fale i Kokoland, Tafuna, ma fa’afeso’ota’i ai loa e ni isi o le aiga leoleo mo se fesoasoani.

 

Na taunu’u leoleo i le fale o le ali’i ua molia o Mafi Fili i Kokoland, ma vaaia ai le to’atele o tagata o lo o laulaututu i luga o le auala ma tafatafa o le fale, ao le taimi o lo o fa’alogoina ai se tagata o lo o leoleo mai totonu o le fale, ma fesili po o ai na fa’afeso’otaia le Ofisa o Leoleo.

 

Na valaau leoleo ia Fili e sau i fafo ma le fale, ma vaaia ai e leoleo se fula i lona muaulu, ae ina ua fesili leoleo i le mafua’aga ua fula ai lona muaulu, e le’i tali Fili i le fesili se’i vagana ai lona fa’apea atu i leoleo, ua ia sauni latou te o ma leoleo.

 

Ae i le taimi na ta’ita’i atu ai o ia e leoleo i le ta’avale, sa valaau leotele solo i tagata o lo o laulau tutu i tafatafa o le fale i lona fia iloaina po o ai na vilia leoleo, a o fa’alogoina e leoleo le malosi o le manogi ‘ava malosi o lo o alu atu i lona tino.

 

A o fa’agasolo gaioiga a leoleo mo le taofia o Fili i le toese i Tafuna, sa fesili le ua molia i leoleo i le mafua’aga ua taofia ai o ia, ae na fa’ailoa i ai e leoleo, ua ia soli le vaega o le tulafono e fa’atatau i se tagata na te faia ni gaioiga e ono save’uina ai le nonofo filemu o tagata lautele, peita’i na fa’ailoa e Fili, o ia o se ali’i Asiasi o le Soifua Maloloina (Health Inspector), na te malamama fo’i i le galuega a leoleo o lo o fa’atinoina.

 

Na fa’aauau pea ona talosaga Fili i leoleo e aua le lokaina o ia, peita’i sa fa’aauau pea gaioiga a leoleo mo le faia o faamaumauga e taofia ai o ia, ma avea ai loa ma itu na matua ita tele ai le ua molia, ma ia fa’atonuina ai leoleo e ta’u atu le igoa o le tagata na vilia leoleo ua mafua ai ona loka o ia, peita’i na fa’ailoa i ai e leoleo, e le mafai ona latou tu’uina atu ia te ia fa’amaumauga o lo o ia mana’omia.

 

Na taua i fa’amaumauga a le fa’amasinoga le fa’asea o le ua molia i le leaga o le faiga o ia ma le taofia o ia i le falepuipui, ae sa tatau ona tu’uina atu se isi avanoa se’i fo’i ai i lona aiga e malolo ai.

 

O le vevesi na mafua mai ina ua tu’u atu e le aiga le ipu meaai ia Fili, ae ita ma tago ua ato ese le ipu meaai, ma la’a ai loa i fafo o le fale ua amata lana amio o le fa’aumu umu ma pisapisa.

 

E tusa ai o fa’amaumauga a le fa’amasinoga, o lea ua molia o se ali’i mai Samoa ae o lo o fa’aipoipo atu i se tama’ita’i Amerika Samoa.

 

AMATA FA’AMASINOGA AUTU

 

O le taeao ananafi na amata fa’agasolo ai taualumaga o le fa’amasinoga autu a se tama’ita’i faipisinisi i le atunuu ma sana teine faigaluega, ona o tu’uaiga i lo la fa’amalosia lea o ni tama’ita’i faigaluega e fa’atino gaioiga fa’atalitane i ali’i fagota sa autova’a atu i le la Pa Pia ma tafafao ai i le 2013.

 

O tu’uaiga fa’asaga ia Fa’asaina Park, o ia lea o lo o pulea le Fale Kalapu o le Karaoke Bar i Satala, ma lana teine faigaluega o Lusia Tusi po o Sheila e pei ona lauiloa ai e ni isi tagata, e aofia ai le taumafai e fa’alauiloa faiga fa’atalitane, o le vaega C o solitulafono mamafa, atoa ai ma moliaga mama e lua o le fa’ao’olima i le tulaga tolu.

 

O ni tamaitai mai Samoa sa galulue i le Karaoke Bar i Satala, o i laua ia na la fa’ailoa i leoleo le mataupu e pei ona tu’uaia ai Park ma Tusi.

 

Na taua e tamaitai nei i leoleo e fa’apea, o laua na fa’a faigaluega e fa’atino galuega i totonu o le Pa Pia, peita’i o le tele o taimi e fa’atonu ai laua e Park po o Tusi fo’i latou te o ma tamaloloa fagogota e fa’atino gaioiga fa’afeusuaiga, o iina fo’i e maua mai ai tupe e totogi ai laua.

 

E to’a 6 molimau ua fa’amoemoe le malo latou te valaauina i le vaiaso lenei ao fa’agasolo ai taualumaga o lenei mataupu, lea o lo o fa’atautaia e le afioga i le ali’i fa’amasino sili ia Michael Kruse.