Ads by Google Ads by Google

Tala otooto mai le Fa’amasinoga

TETE’E SO’OSEMEA I TU’UAIGA A LE MALO

 

O le masina fou o Novema lea ua fa’atulaga e toe tula’i ai le susuga a Tina’e So’osemea i luma o le fa’amasinoga maualuga mo le isi ana iloiloga, i le mae’a ai lea o lona tula’i ma teena moliaga mamafa e tolu o lo o tu’uaia ai o ia e le malo.

 

O moliaga o lo o tu’uaia ai So’osemea e aofia ai le faiaiga fa’amalosi i se teineititi e 15 tausaga le matua, faia o amioga mataga fa’afeusuaiga i se teineititi, atoa ai ma lona tagofia o itutinosa o se teineititi e laititi i lalo o le tulafono.

 

Na fa’ailoa e le teineititi i leoleo le fa’amalosi o ia e So’osemea la te fai’aiga, i totonu o se ‘container’ o lo o ta’atia i tafatafa o le auala tele lea e ui atu i le falepuipui o tamaiti i Tafuna, ma lana fa’aupuga sa fai i le teineititi na a’afia, ua mafua ona ia faia lenei mea ia te ia, ona o le tele o lana tupe o lo o nofo aitalafu ai matua o le teineititi ia te ia.

 

Ina ua mae’a ona fa’atino e So’osemea le solitulafono e pei ona taua i fa’amaumauga le fa’aamasinoga, sa ia fa’afefe le teineititi na te fasiotia o ia pe afai na te ta’uina i se tagata le mea sa tupu.

 

EDDIE SATELE MA NORMAN SKELTON

 

O ali’i talavou e to’alua ia na feoa’i solo ma se agaese i le faaiuga o le vaiaso na te’a nei i Tafuna, ma la faia amioga e save’u ai le nonofo filemu o tagata, ua molia nei e le malo i moliaga mama e lua o le faatupu vevesi i nofoaga faitele atoa ai ma le inupia ae le i atoa le 21 tausaga le matua.

 

O le mataupu ua tuuaia ai Eddie Satele ma Norman Skelton na afua mai ina ua logo e ni molimau leoleo mo se fesoasoani, ina ua vaaia ni alii talavou se toalua o lo o feofeoa’i onana i luga o le auala i Tafuna, ma se agaese o lo o uu atu e le tasi o laua, o ia lea o Skelton.

 

E le i maua e leoleo Satele ma Skelton i le taimi muamua na tuli ai i laua, ae ina ua tuana’i ni nai itula talu ona mae’a le latou ulua’i tuliga ma leoleo, na maua ai loa i laua i tua o le Cost-U-Less, ma auina atu i loa i le ofisa o leoleo o Tafuna, mulimuli taofia  i laua i le toese ma tutula’i ai loa i luma o le faamasinoga. O ali’i uma ia e to’alua e ta’i 19 tausaga lo la matutua.

 

LAGISA VOA

 

O le ali’i lea na tu’uaia i lona togi o se ma’a ma manu’a ai se fafine i Malaeimi i le aso Sa na te’a nei, na taofia e leoleo i le toese i Tafuna i le fa’aiuga o le vaiaso ma tuuaia ai o ia i moliaga mama e lua, e aofia ai le faatupu vevesi i nofoaga faitele ma le fa’ao’olima i le tulaga tolu.

 

Na taua e se molimau i leoleo e fa’apea, o le vevesi na tula’i mai ina ua muamua togi e Lagisa Voa le fafine na a’afia i se ma’a peita’i sa misi le togi, ma oso atu ai loa le to’alua o le fafine ma fai la tauiviga ma le ua molia, ma i’u ina mafai ai e le tamaloa ona fa’afo’i ia Voa aga’i i lona fale.

 

E le i umi ae vaaia le toe mamulu ese mai o le ali’i ua molia ma se ma’a i lona lima ma toe togi fo’i le ma’a aga’i i le fafine na a’afia ma manu’a ai loa lona ulu.

 

Na poloaina e le fa’amasinoga le ua molia e aua ne’i ona toe taumafai e fa’afeso’ota’i le aiga o le fafine na a’afia i so o se auala, aua fo’i ne’i ona toe solia se tulafono, a ia avea o ia ma se tasi e usita’i i tulafono uma a le malo, a o fa’agasolo ai taualumaga o lana mataupu i luma o le fa’amasinoga.