NORMAN SKELTON

O le ali’i e 19 tausaga lea na ia fa’aoolima i se isi ali’i i se agaese, ua fa’asala e le fa’amasinoga fa’aitumalo e taofia i le falepuipui i Tafuna mo le umi e 10 aso, o se tasi lea o tuutuuga o lana nofovaavaaia e 12 masina na tu’uina mai e le fa’amasinoga i le vaiaso na te’a nei i moliaga mama e lua o le fa’ao’olima i le tulaga tolu ma le inupia ae le i atoa le 21 tausaga le matua.

Na fa’ailoa e le afioga i le ali’i fa’amasino ia Elvis P. Patea ia Skelton le matuia o lana gaioiga sa faia, i le ova lea o lona ‘ona ae fealua’i solo ma se agaese i luga o le auala, ma i’u i lona fa’ao’olima ai i le ali’i na a’afia.

O se tasi o itu lelei na taua e Patea mo Skelton, o se taimi muamua lenei ua ta’usala ai o ia i se solitulafono, pau le itu fa’anoanoa, ua sese le amataga o lona olaga talavou ina ua ia tagofia le ava malosi ma i’u ina solitulafono atu ai.

Na manatu le faamasinoga e taofia le ua molia i le falepuipui mo le 12 masina, peita’i o le a fa’amalumalu le tuliina o lea fa’asalaga, ae o le a nofo vaavaaia o ia mo le 12 masina i lalo o poloaiga e ao ona ia usita’i i ai.

O ni isi o ia poloaiga e aofia ai le faasa lea ona ia toe tagofia le ava malosi, a ia auai i ni aoaoga e fesoasoani ai i aafiaga o le ava malosi i lona olaga talavou, ua poloaina foi o ia na te totogi le salatue e $150, atoa ai ma lona faatinoina o ni galuega mo le atunuu lautele mo le umi e 20 itula, i lalo o le taitaiga a le Ofisa Nofovaavaaia.

Na fautuaina e Patea ia Skelton, afai ae mae’a le tuliina o lana faasalaga fa’a falepuipui e 10 aso le umi, ia vaavaai po o le a se isi laasaga lelei e ono fai mo ia i le lumana’i.

NIKO APELU

E 90 lea ua taofia ai Niko Apelu i le falepuipui i Tafuna, ina ua ta’usala o ia e le fa’amasinoga fa’aitumalo i le moliaga mamafa o le ave ta’avale ae o lo o se’i lona laisene.

O le amataga o le tausaga na ta’usala ai e le fa’amasinoga ia Apelu i le moliaga o le ave ta’avale ‘ona, ma se’i ai loa lona laisene mo le 6 masina.

Peita’i i le masina o Oketopa na te’a nei, na maua ai e leoleo Apelu o lo o ia fa’afoeina se ta’avale i luga o le alatele i Iliili, e mafua mai ina ua tula’i mai se fa’alavelave tau ta’avale i lea nofoaga.

Na fa’atoese le ua molia i le fa’amasinoga e tusa ai lana solitulafono sa faia, ma ia talosagaina ai se isi avanoa mo ia, peita’i na fa’amanatu i ai e le fa’amasinoga e fa’apea, ana ia tausisi ma usita’i tuutuuga o lana nofovaavaaia e 12 masina e aofia ai le le mafai ona ia toe aveina se ta’avale i totonu o le 6 masina, semanu e le nofosala i le falepuipui mo le 90 aso.

Na taua fo’i e le fa’amasinoga e fa’apea, so o se tagata e ta’usala i le moliaga mamafa o le ave ta’avale a o se’i le laisene, o lo o fa’amalosia i lalo o le tulafono lona tuliina o aso e 90 i le falepuipui.