PILI AVEESE AI FAATAPULAA TAUSAGA MO FAAMASINO LAGOLAGO

Ua i luma o le maota maualuga se pili mo se tulafono taufaaofi, e aveese ai le faatapulaaina o tausaga mo Fa’amasino Lagolago le tumau i le Fa’amasinoga.

I le maga fou o le tulafono e pei ona faaulu i luma o le senate o lo o taua ai le tulaga lea, afai e i ai se mafuaaga o le a le mafai ai ona avanoa ni fa’amasino lagolago i se aofaiga e tatau ona i ai mo le fa’amasinoga apili, vaega o Fa’amasinoga ma le vaega o Fanua ma Suafa, e mafai e le Fa’amasino Sili ona tofia ni isi tagata e fai ma fa’amasino lagolago le tumau mo le fa’amasinoga maualuga.

O le filifiliga o ia fa’amasino lagolago le tumau, e faia lea i se vaega o tagata ua fa’amaonia e le kovana e ala i le fautuaga a le fa’amasinoga sili.

E mafai ona faamaonia taitoatasi pe faamaonia faatasi uma foi le vaega o faamasino lagolago le tumau e le Senate, ina ua fautuaina e le faamasino sili ma filifilia e le kovana i le auala e tasi, e faapei ona faia i faamasino lagolago e toalima lea o lo o i le isi vaega o le tulafono.

O le vaega o le tulafono lea sa taua ai le faamalolo o faamasino lagolago le tumau pe a atoa le 70 tausaga o le soifua, ua avesea mai le vaega fou o le tulafono lea ua i luma nei o le senate.

Ua taoto atu nei le pili i le komiti o Mataupu Tau Tulafono a le maota mo le iloiloina, lea o lo o taitaifono ai le afioga i le alii senatoa ia Soliai Tuipine Fuimaono, o ia fo’i lea ma isi senatoa sa latou fa’aulufaleina lenei tulafono.

O isi senatoa na auai i le faaulufaleina o le tulafono e aofia ai Mauga Tasi Asuega, Afoa L. Suesue Lutu ma LeAtualevao S. Asifoa.

IUGAFONO E FAAFETAIA AI LE AU MALAGA A LE HOKULE’A

Na pasia e le senate i le vaiaso na te’a nei se iugafono e faafetaia ai le aumalaga na malaga mai i le va’a o le Holule’a, lea na latou afea Amerika Samoa i le vaiaso na te’a nei, i le taua ma le aoga o le fuafuaga na ala ai ona malaga mai i le teritori.

O le taua o le afea o le teritori e le Hokule’a ma le aumalaga, ua toe fafagu mai ai taumafaiga e toe faaolaola auala sa faimalaga ai tagata Pasefika i aso ua mavae, o le avea lea o i latou ma tagata folau i le vasa.

O le isi taua o le malaga mai o le Hokule’a, o le a faamautu ai fesootaiga mautu i le va o Hawaii ma Amerika Samoa, ae o le a mafai ai fo’i e le Hokule’a ona fa’alautele lo latou iloa i tu ma aganuu a Samoa.

O le isi itu taua o lenei malaga, o le taumafai pea lea e sailiili  polokalame mo aoaoga e fesoasoani ai i fanau aoga, ina ia atina’e lo latou iloa i tulaga tau folauga.

O le afea ai la o motu o Manu’a ma Tutuila nei e le au malaga, o se avanoa taua lea ua mafai ai ona faailoa atu tu ma agaifanua a Samoa, ma maua ai foi ma le avanoa e fetufaa’i ai manatu ma iloa i aganuu eseese i le va o Samoa ma Hawaii.

O lenei iugafono na faaulufaleina e le afioga i le alii senatoa ia Galea’i M. Tuufuli mai Manu’a.