PASIA SENATE PILI O LE PALOTA

E 13-1 le palota na pasia ai e le maota maualuga o le Senate i le vaiaso na te’a nei, le pili mo suiga i le tulafono tau palota, ina ia fa’asa ai ni isi o gaioiga ona toe faia i le taimi o faiga palota a le atunuu.

O ni isi o vaega o le tulafono ua pasia nei e le maota maualuga, e le gata ua fa’asa ai ona toe fai ni BBQ i tafatafa o nofoaga e faia ai palota a le atunu’u, ae ua fa’asa atu ai ma tulaga o faleie a sui tauva ona toe faatutu i tafatafa o fale fai palota, atoa ai ma le faasa lea ona toe tufa fua ni taumafa poo vai inu i le taimi o le palota, e avea ma itu e fa’aseseina ai manatu ma mafaufau o tagata palota.

Na taua e le Komesina o Palota ia Tuaolo M. Fruean i le vaiaso na te’a nei, ina ua fesiligia e le komiti o Mataupu Tau Tulafono a le senate e fa’atatau i suiga nei, o suiga nei na afua mai i se fautuaga mai le alii kovana ia Lolo Matalasi Moliga, ina ia saili ni auala e fa’a faigofie ai faiga palota a le atunuu.

Saunoa Tuaolo e fa’apea, o le tufatufaina atu o taumafa ma vai inu i le aso o le palota, atoa ai ma le faia o BBQ mai totonu o faleie i tafatafa o nofoaga e faia ai palota, o se auala lea e fa’alavelave tele mo le tagata palota, ma faigata ai i le tagata palota ona fa’agaioi lona aia tatau e palota ai i le sui agava’a, ona ua avea faiga nei ma auala e fa’alavelave ai i le taimi o le palota.

O le isi suiga na pasia e le senate e pei ona fautuaina e le afioga i le alii taitai komiti ia Soliai Tuipine Fuimaono, lea fo’i sa avea ma Komesina o Palota mo le tele o tausaga, o le fa’apipiiina o Saina i nofoaga e latalata i le fale palota.

Saunoa Soliai e faapea, o se tasi lenei o mataupu sa tele ina vevesi ai faiga palota i tausaga ua mavae, sa avea fo’i ma auala e vevesi ai le Sa’o ma lona au aiga.

SAUNOA TOEAINA I LE TAUA O LE SISI O FU’A I LUMA O AOGA

O le toe faaauau ona sisi o tagavai a Amerika ma Amerika Samoa i luma o faleaoga uma i le atunu’u, o se tulaga lea na taua e le afioga i le alii faipule mai Manu’a #2, ua tatau ona toe fautuaina ai le Ofisa o Aoga e toe fa’aauau mo aoga uma i le atunu’u.

I le avea ai o Toeaina o se tasi o faiaoga a le malo mo le tele o tausaga, na saunoa ai le alii faipule i le taua o le sisi o tagavai i taeao i luma o faleaoga, e pei ona vaaia i tausaga ua mavae, e le gata e mamalu ma aloaia ai tagavai a le atunuu, ae o se auala fo’i e fa’ailoa atu ai e tagata feoa’i lo latou fa’aaloalogia o le tagavai o Amerika Samoa atoa ai ma le tagavai o le Iunaite Setete.

Mo se fa’ataitaiga e pei ona saunoa Toeaina, afai e savali ane se tagata i luma o le faleaoga ae ua oo i le taimi e sisi ai le tagavai, e tu lelei le tagata ma fa’alo i le sisiina o le fu’a, e fa’ailoa ai lona fa’aaloalo i le tagava’i.

O aso nei e pei ona saunoa Toeaina, ua mavae atu le taua o lenei fuafuaga taua i totonu o aoga, ina ua le toe sisiina ni fu’a i taimi o taeao, peita’i, o se itu taua le tatau ona toe faaauau lea tulaga taua e fesoasoani ai fo’i i fanau aoga, ae afai loa e le taliaina lana fautuaga, e sili atu loa pe a aveese fou fu’a o lo o fa’atutu i luma o faleaoga.

IUGAFONO E SII AI TOTOGI KOVANA MA LE LUTENA KOVANA

O le vaiaso na te’a nei na fa’aulufale ai i luma o le maota o sui se pili e talosagaina ai le sii o totogi mo le kovana ma le lutena kovana, mai le $85,000 i le $125,000 mo le alii kovana, ma le $75,000 i le $100,000 mo le lutena kovana.

O lenei iugafono sa faaulufaleina e afioga i alii faipule ia Maugaoalii Leapai Tusipa Anoai ma Fatulegaee Palepoi Mauga.

Saunoa le afioga a Maugaoali’i e fa’apea, o le agaga o le pili ina ia mafai ai ona fai se siitaga i totogi o ta’ita’i o le malo, ona ua talafeagai fo’i le tatau o se siitaga i totogi o ta’ita’i o le malo.

“O le agaga lava ia o le tulafono tau faaofi, ua talafeagai le faia o se siitaga i totogi o le kovana ma le lutena kovana, a tatou silasila i le tulaga ua i ai le tau o le soifuaga i lenei taimi, e le gata ua taugata, ae ua maitauina foi siitaga i totogi o fa’atonusili a le malo, ma e i ai le manatu e le iloa po o isi tausaga o lumana’i nei, ua sili atu totogi o ni isi o fa’atonusili nai lo ta’ita’i o le malo”, o le saunoaga lea a Maugaoali’i ina ua fesiligia e le Samoa News.

Sa ia taua fo’i e fa’apea, ua i ai ni isi o totogi ua maualuga atu nai lo totogi o le kovana ma le lutena kovana, ae i lona lava talitonuga, e le tatau ona sili atu lava se totogi o se isi tagata i totonu o le malo mai le totogi o le kovana ma le lutena kovana.

E le i taua e le alii faipule tagata faigaluega a le malo ua ova atu o latou totogi nai lo totogi o le kovana ma le lutena kovana, ae i le iloilologa tuufaatasi o le paketi a le fono o lo o fa’agasolo i le taimi nei, o lo o atagia mai ai le i ai o ni isi o tagata faigaluega konekarate ua sili mamao atu a latou totogi nai lo totogi o ta’ita’i o le malo.