SUIGA I LE TULAFONO O SUAFA MATAI

O le aso a taeao lea ua fa’atulaga e faia ai se iloiloga o le Mataupu Tau tulafono a le maota o sui, mo le iloiloina o se pili taufaaofi ua i luma o le maota, e aveese ai le manaoga o le afa toto tagata Samoa mo se tagata na te faauluina se talosaga mo se suafa matai a lona aiga, ma aveese ai isi vaega sa taomia ai lona faauluina o lea talosaga.

O lea suiga e mo na o i latou e faauluina talosaga i le faamasinoga faasaga i se suafa matai.

I suiga o le tulafono o lo o taua ai e faapea, o le tagata e agavaa mo le oo atu i le suafa matai e aofia ai ni isi o vaega nei: “ua tatau lava ona ia umia aia tuufaasolo mai tuaa i le suafa”, a ia aveese le tulaga o lo o i ai i le tulafono, “ia le itiiti ifo ma le afa toto Samoa”.

O molimau mo lenei iloiloga e aofia ai le loia sili ia Talauega Eleasalo Ale ma le Failautusi o Mataupu Tau Samoa ia Satele Galu Satele Sr.

SAUNI FONO E FAI LANA FA’AIUGA I LE PAKETI

O le itula e 9:30 i le taeao o le aso Lua o le vaiaso nei lea ua fuafua e ta’ita’ifono o le Komiti Soofaatasi o le Paketi a le Fono Faitulafono, e toe feiloa’i ai le komiti mo le fa’amautuina o lana fa’aiuga i le Paketi a le malo mo le tausaga tupe fou 2015 lea ua mae’a ona latou iloiloina.

Talu mai lava le taimi na mae’a ai iloiloga tuufaatasi a le komiti, o lo o fesiligia pea e ni isi o afioga i faipule le mafua’aga ua ala ai ona tuai se faaiuga a le komiti e tusa ai o le paketi, ae na saunoa le isi taitaifono o le komiti ia Laolagi Fonoti Savali Vaeao e fa’apea, e i ai ni vaega laiti o le paketi o lo o fuafua e faamautu i ai se finagalo o le komiti, ae o lei tuuina atu i luma o le komiti soofaatasi mo sa latou fa’aiuga.

O le aso Faraile o le vaiaso na te’a nei na fa’ailoa ai loa e Laolagi i luma o le senate, o le aso Lua o le vaiaso nei lea ua faatulaga e toe nofoia ai le komiti mo le faamautuina o sana faaiuga.

E le i fa’ailoa e Laolagi i le maota maualuga pe ua i ai ni suiga ua sauni le komiti soofaatasi e fai i le paketi.

Na fautuaina e le alii peresetene o le senate ia Gaoteote Palaie Tofau le afioga a Laolagi, e lelei pe a avatu e afioga i taitai komiti se fa’ava’a mo le paketi, ina ia faigofie ai ona maua manatu o senatoa ma faipule i ni suiga po o ni fuafuaga fo’i e manaomia ona fai.

FEILOA’I MAOTA O SUI MA SUI O LE EMS MALAGA MAI FAFO

O se taimi o le vaiaso nei lea ua fuafua e le komiti o le Soifua Maloloina ma le LBJ a le maota o sui, latou te feiloa’i ai ma sui o le vaega a le EMS lea ua faamoemoe latou te asia le atunuu i se taimi o lenei vaiaso, mo le faamanatuina o faiga paaga a le EMS i Amerika Samoa nei ma ona lala i fafo.

Saunoa le afioga ia Maugaoalii Leapai Tusipa Anoai e fa’apea, o le taua o le feiloaiga lea ua fuafuaina, e malamalama ai le maota i fuafuaga faataoto a le EMS iinei atoa ai ma ana paaga mai fafo, i auala e fa’aleleia atili ai le tautua a le EMS i Amerika Samoa.

Na talosagaina e le fofoga fetalai ia Savali Talavou Ale le afioga a Maugaoali’i, e lelei ae tuu faatasi maota e lua mo lea iloiloga, in ia maua ai foi e afioga i senatoa le avanoa latou te fesiligia ai sui o le EMS o le a malaga mai, i ni isi o tautua ma fesoasoani e ono faamanuiaina ai le EMS a Amerika Samoa, atoa ai ma auala e fa’aleleia ai le tautua a le EMS i le teritori.