MANAOMIA NISI BUS STOP FAAOPOOPO I LE TAULAGA

O le poloka soo o le auala i le tele o taeao e usu ai tamaiti aoga ma tagata faigaluega, aemaise lava pe afai e fai ni polokalame i le malae o le Si’uga’ula a le Atuvasa, o se tasi lea o mafua’aga na taua e le afioga i le alii senatoa ia Mauga Tasi Asuega ua manaomia ai le toe fausia o ni isi fale faatali pasi i Utulei.

Saunoa Mauga i luma o le maota maualuga i le taeao ananafi e faapea, o le faafitauli lea ua ia maitauina, e lelei lava le fegasoloaiga o ta’avale pe afai e na o le tasi le pasi e tu i le fale faatali pasi e tuu ai lana pasese, ae afai loa e tutu faatasi pasi e lua, tolu pe sili atu fo’i, o iina la lea e mafua ai ona poloka le auala, ina ua poloka uma e pasi le auala ma le mafai ai ona gasolo ta’avale.

Sa ia talosagaina le komiti o le Puipuiga o le Saogalemu Lautele a le maota maualuga, ina ia ave se fautuaga i le alii komesina o leoleo, e tatau ona tiute ni leoleo i taeao uma i Utulei ma le taulaga atoa, ina ia mautinoa e le tupu le faafitauli lea ma mafua ai ona tuai tagata faigaluega ma tamaiti i le aoga, aemaise ai le tuai o sui o le Fono Faitulafono i le taimi o a latou galuega ma iloiloga i taeao taitasi.

PASIA SENATE PILI SII AI SIAKI TAGATA LITAEA FAITAUGA FA’ALUA

Na pasia e le maota maualuga i le taeao ananafi i le faitauga faalua, le pili e faaopoopo ai siaki a tagata litaea, ina ua fulisia afioga i senatoa e to’a 16 e pasia le tino atoa o le tulafono ma le faamoemoe o le taeao nei e faitau tolu ai.

Na taua e le afioga i le alii senatoa ia Laolagi Fonoti Savali Vaeao ananafi e fa’apea, o le taua o le tulafono taufaaofi lenei, o le a mafai ai ona faaopoopo ni faamanuiaga tau tupe i siaki a tagata litaea o lo o i ai e aofia ai ma sui o le Fono.

I le tino o le tulafono lea ua i luma o le Fono Faitulafono, o lo o taua ai le siitaga o le ‘COLA’ e 0.5 pasene, fuafua lea i le aofa’i o le siaki a le tagata litaea o lo o maua.

O lenei siitaga e afua mai i tagata na amata litaea i le aso 1 Oketopa 2012 ma fa’asolo mai ai i luma mai, ma ua faamoemoe o le aso 1 Oketopa 2014 e tatau ona aloaia ai lenei siitaga i siaki a tagata litaea.

E ui o lea ua sauni le maota maualuga e faitau tolu le latou tulafono, o le taeao nei i le itula e 8:00 lea faatoa faia ai le iloiloga a le komiti o le litaea a le maota o sui, mo le talanoaina o lenei tulafono taufaaofi, i lalo o le taitaiga a le afioga i le alii faipule ia Fagasoaia Lealaitafea o le taitai komiti.

TANE SUAUU MO MANU’A

O le iugafono a le maota o sui e talosagaina ai le fausia o se tane suauu mo Manu’a, na taua ai e le susuga a Sione Kava o lo o pulea le Ofisa e vaaia suauu i le atunuu, e ui o se talosaga e taua, peita’i e tatau ona vaavaai i le aofa’i o tagata e agava’a i ai lea tautua e aofia ai ma ta’avale o lo o feoa’i i Manu’a.

Mo se faataitaiga e pei ona saunoa Kava, e le atoa se 20 ta’avale o lo o i ai i Manu’a i le taimi nei, ae o le galuega lea ua talosagaina, e le gata e tele feuiaiga e manaomia ae tele fo’i se vaega tupe e fa’aalu ai.

E ui e le i taunu’u le iloiloga a le maota o sui na faatulaga mo le mataupu lenei i le taeao ananafi, ona e lei maua e molimau se kopi o le iugafono e mafai ai ona malamalama i le aano moni o le talosaga ma le iugafono, peitai sa mafai lava ona maua le avanoa o le susuga a Kava e tuu atu ai sona finagalo i luma o le komiti e faatatau i lenei mataupu, ina ua saunoa le sui fofoga fetalai ia Talia Faafetai Iaulualo e faamanino atili le aano o le iugafono.

Saunoa Talia e fa’apea, o le kamupani o lo o latou sapalaia le suauu mo Amerika Samoa, e le o faapitoa mo na o Tutuila ae tatau ona aofia ai ma Manu’a.

Saunoa Talia e fa’apea, e tele le manaoga o lo o tula’i mai i Manu’a i le taimi nei i le tulaga o le suauu, peitai o le tele o taimi o lo o fa’aaoga e tagata Manu’a a latou lava tupe e la’u ai a latou suauu i le motu, e aunoa ma se fesoasoani i ai o le malo.

Na taua e Kava e faapea, o le taimi nei, e 10,000 kalone o le suauu e mafai ona utu i tane a le malo i Ta’u ae 5,000 kalone i Ofu, i lona talitonuga, ua lava ma totoe kalone ia e tali ai manaoga mo tagata Manu’a.

Ina ua fesiligia e le komiti le susuga a John Utu mai le Pulega o le Eletise ma le Suavai i sona finagalo e tusa ai o lenei mataupu, na taua ai e Utu e fa’apea, e tele isi lavelave o le mataupu lenei e tatau ona silasila i ai le maota, e le gata o le talosagaina o pemita mai le malo tele, ae manaomia ai fo’i se fautuaga a le AS-EPA ina ia mautinoa e tausisia uma tulafono a le feterale e manaomia.

O le vaiaso fou lea ua faamoemoe e toe faaauau ai le iloiloga lenei e uiga i lenei mataupu.