90% TAGATA LITAEA O LE A FA’AOPOOPO A LATOU SIAKI

O le 90% o tagata o lo o tali a latou siaki litaea i le taimi nei, ua fa’amoemoe e agava’a i le si’itaga e 0.5% lea ua fa’amoemoe e fa’aopoopo i a latou siaki litaea o lo o maua i masina ta’itasi, e pei ona taua e le Pulesili o le Ofisa o le Litaea a le malo ia Luatua Filisouaiga Ta’afua i luma o le komiti o le Litaea a le maota o sui, i se iloiloiga sa faia ai i le aso Faraile na te’a nei.

I lea iloiloga, na taua ai e afioga i faipule lo latou lagolagoina o le tulafono taufa’aofi, e fa’aopoopo ai penefit e maua i siaki a tagata litaea i masina ta’itasi, ae na taua e Luatua i lana saunoaga e fa’apea, o lenei siitaga o se fa’aopoopoga lelei lea mo tagata litaea, fuafua fo’i i le tulaga ua i ai le tau o le soifuaga i le taimi nei.

I le siitaga o le ‘COLA’ e pei ona fuafuaina e le faigamalo, e tusa ma le $638,242 le tupe na taua e Luatua o le a si’itia ai tulaga o aitalafu (accrued liability) mo le vaega a le litaea.

O le aso Faraile na te’a nei na pasia ai e le maota maualuga a le Senate le tulafono taufaaofi e faaopoopo ai siaki a tagata litaea a le malo, i le palota e 12-0, ae pasia ai e le maota o sui i le faitauga fa’alua ma le fa’amoemoe, o le taeao nei e faitau tolu ai le tulafono o le siitaga a le litaea i luma o le maota o sui.

FINAGALO FONO UA TATAU ONA SIITIA TAUTUA EMS I LE ATUNUU

O le feiloaiga a le Fono ma sui o le vaega a le EMS mai fafo lea ua faatulaga i le vaiaso nei, o le a mafai ai ona fa’aleo e afioga i senatoa ma faipule ni isi o fautuaga ma mafaufauga, i auala e fa’aleleia atili ai le tautua a le vaega o le EMS i le atunuu.

O le vaiaso na te’a nei na tauaao ai e le komiti o le Soifua Maloloina/LBJ a maota e lua se tusi mai le ofisa o le EMS, e fa’ailoa mai ai se asiasiga a sui o le latou ofisa mai fafo, lea ua fa’amoemoe e asia le atunuu i le vaiaso nei, ma talosagaina ai se avanoa e feiloa’i ai ma le Fono.

Saunoa le afioga i le ali’i senatoa ia Tuiasina Esera e fa’apea, e taua tele le iloiloga lenei o le a mafai ai ona malamalama le Fono i ni isi o tulaga e tatua ona fa’aleleia atili ai le tautua a le EMS.

I le taimi nei e pei ona taua e Tuiasina, o lo o maitauina pea ni isi o vaega laiti o lo o fa’aletonu ai le tautua a le EMS i le atunuu, e pei o le leaga o ta’avale o lo o la’u mai ai tagata gasegase o le atunuu, e le gata e le ola le ea malulu, ae o isi taimi fai ma pe i luga o le auala, ona o ane lea o tagata e tau tulei le ta’avale ae o lo o taoto ai i totonu o le tagata ma’i o lo o mana’omia le vave ave i le falema’i mo togafitiga.

Saunoa le afioga i le alii senatoa ia LeAtualevao Asifoa e faapea, o le auaunaga a le EMS i le teritori, e tatau ona lelei ma mautu, aua o i latou ia e muamua ona tali atu i le taimi e manaomia ai e le tagata gasegase se fesoasoani, afai e fa’aletonu ta’avale ma mea faigaluega e fa’atino ai le latou auaunaga, ona tula’i mai ai loa le o se tulaga pagatia i le atunuu.

O le Lulu lea ua faamoemoe e faia ai le iloiloga tuufaatasi a maota e lua ma sui o le EMS lea ua faamoemoe e taunuu mai i le po nanei.

FA’ATULAGA SAUNIGA FA’ALEMALO AFIOGA SENATOA FAUMUINA

O le vaiaso nei lea ua fa’atulaga e le Fono Faitulafono e faia ai se sauniga fa’alemalo mo le uso a senatoa ua tuua le malo, le afioga ia Faumuina Tagisiaali’i, e ala i se sauniga e faia i le Fale Samoa a le Fono Faitulafono i le aso Tofi.

O le po nanei lea ua fa’amoemoe e taunu’u mai ai i fanua le Sa o le afioga i le ali’i senatoa ia Faumuina mai Hawaii, ma ua talosagaina afioga i senatoa ina ia auai i le malae va’alele mo le fa’ataliina o le toai taunu’u mai o le ali’i senatoa.

O le afioga a Faumuina, 70 tausaga le matua, na tuumalo i le maota gasegase o Regency Hospital i Toledo, Ohio, ina ua malaga atu o ia e asiasi i ni isi o le fanau ma fai ai ana talavai, ae a’afia ai o ia i se gasegase ma taofia fa’anatinati ai o ia i le falema’i, seia o o lava i le taimi na faamanava ai e le Atua ana galuega, e pei ona taua e lona faletua i se talanoaga ma le Samoa News.

O le mae’a ai o se sauniga lotu puupuu i le potu fa’apitoa i le malae va’alele i Tafuna i le ponanei, ona momoli atu ai loa lea o le Sa o le ali’i senatoa i le maota gasegase o le LBJ i Fagaalu ma mapu ai, e fa’atali ai le aso Tofi lea ua fuafua e faia ai ona sauniga faalemalo, ma auina atu ai lava i lona maota i Leloaloa mo ona sauniga fa’ai’u.

O le aso Faraile e sosoo ai ua fa’amoemoe e lagomau ai le afioga i le ali’i senatoa i lona aiga i Malaepapa.