PASIA SENATOA MA FAIPULE PILI SII AI SIAKI TAGATA LITAEA

E 19-0 le palota na pasia ai e le maota o sui le latou tulafono taufaaofi, e fa’aopoopo ai siaki maua a tagata litaea i le 0.5%, ae o le aso Faraile na te’a nei na pasia ai e le maota maualuga le latou fo’i tulafono taufaaofi i le palota e 12-0.

Na saunoa le afioga i le taitai fono o le komiti o le Litaea a le maota o sui ia Fagasoaia Lealaitafea, i le taimi na ia fa’atuina ai le mau e pasia ai le tulafono e fa’apea, o le taua o lenei tulafono taufaaofi o le a mafai ai ona maua e tama ma tina sa tautua i le malo ua litaea, se isi fa’aopoopoga i a latou siaki o lo o maua i masina taitasi, ina ia fesoasoani ai i le tulaga o a latou tupe maua.

E pei ona taua i le tulafono taufaaofi, o i latou uma sa litaea ia Setema 30, 2012 po o le le’i oo fo’i i le aso lea.

O lenei tulafono o le a aloaia i le taimi lava e pasia ai e le Fono Faitulafono ma sainia e le alii kovana, ona o le tulaga taua ma le aoga mo tagata litaea o le atunuu.

O le taeao ananafi na faitau muamua ai le pili a le maota maualuga i luma o le maota o sui, ae o le taeao nei lea ua faamoemoe e faitau muamua ai le pili a le maota o sui i luma o le maota maualuga.

TELE GALUEGA TETELE E FIA FAUSIA AE LE O I AI SE TUPE

Na faailoa e le Fa’atonusili o le Matagaluega o Galuega Lautele ia Faleosina Voigt, i luma o le Komiti o Galuega Lautele a le maota o sui ananafi, e tele naua galuega tetele o lo o naunau le matagaluega e fia fausia mo le atunu’u, ae o le fa’afitauli o lo o tula’i mai e le o i ai se vaega tupe e fa’atinoina ai nei galuega uma.

O se vaega lea o le tali a Faleosina ina ua fesiligia o ia e ni isi o afioga i faipule, i le iloiloga e fesiligia ai i’ugafono i mataupu i taligalu.

Na fa’amanino e Faleosina e fa’apea, e le o se taimi muamua lenei ua fa’aulufale ai i luma o le maota ni i’ugafono faapenei, e talosagaina ai le fausia o taligalu mo ni isi o afioaga, atoa ai ma isi manaoga mo le fausia ma le toe fa’aleleia o auala ma tali galu i isi vaega o le atunuu.

Na fa’amanino auiliili e le tamaitai fa’atonusili e fa’apea, o le fa’afitauli lea o lo o tula’i mai i le taimi nei, e le o i ai se vaega tupe mai le vaega a le ‘Federal Highway’ e fa’atupe ai galuega nei.

“Afai la ua le maua mai se fesoasoani tau tupe mai le ‘Federal Highway’ e fa’atupe ai galuega nei, lona uiga e tatau ona saili e le malo se tupe e faatino ai lenei manaoga, peita’i o le fa’afitauli o lo o tula’i mai, e le o i ai se vaega tupe a le malo ua fa’aagaga mo galuega nei, ona o lo o fa’asolo mai pea le fa’atupeina o ni isi o galuega e tatau ona fausia muamua i le atunu’u”, o se vaega lea o le saunoaga a le tamaitai fa’atonusili.

O ni isi o galuega e pei ona molimau Faleosina o lo o galulue ai pea le latou matagaluega, o ni isi o galuega sa amata mai i le taimi o le galu lolo o le 2009, lea lava o lo o fa’agasolo i le taimi nei galuega, ona o le tele o feuiaiga e tatau ona faia muamua, e pei o le mulimulita’i lea i tulafono a le feterale i tulaga o pemita e mafai ai ona faatino galuega.

PASIA E SENATOA MA FAIPULE PILI O LE PAKETI

Na tau fai pasia e maota e lua i le taeao ananafi pili mo le tulafono taufaaofi o le paketi a le malo, mo le tausaga tupe fou 2015, ina ua fulisia le maota maualuga e pasia le latou pili i le palota e 12-0, ae 19-0 i le maota o sui.

Na pau le suiga lea ua pasia e maota e lua i le tulafono o le paketi, o le aveese mai lea o le $65,000 mai le Paketi a le Ofisa o Turisi, ae tuu atu i lalo o le Paketi a le Ofisa o le Kovana, e fa’atupe ai siitaga i totogi a le kovana ma le lutena kovana lea ua fa’aulu i luma o le fono le tulafono e sii ai.

Na faafetaia e le peresetene o le senate ia Gaoteote Palaie Tofau ma le Fofoga Fetalai ia Savali Talavou Ale afioga i senatoa ma faipule i le taeao ananafi, i lo latou pasiaina lea o lenei tulafono taua mo le paketi e faatupe ai galuega a le malo mo le tausaga tupe fou.

Saunoa Gaoteote e fa’apea, o le taua o galuega a le maota lea ua pasia, o le a mulimulita’i i ai le faigamalo mo ana galuega fa’atino i le tausaga tupe fou lea ua aga’i mai, ae na saunoa Savali e fa’apea, e le mafai ona gaioi le malo i le fa’atinoina o ana galuega fa’atino, pe afai e le pasia atu e le Fono le paketi e fa’atino ai galuega a le malol

O le taeao nei lea ua faamoemoe tuu atu ai le pili a faipule e faitau muamua i luma o le maota maualuga, ae o le a tuu atu foi le pili a le senate e faitau muamua i luma o le maota o sui.