SAINIA KOVANA PAKETI TAUSAGA TUPE 2015

O le aso Lua na te’a nei, Setema 30 na sainia ai e le kovana sili ia Lolo Matalasi Moliga le pili tau faaofi o le paketi na pasia e le Fono Faitulafono, ma aloaia ai loa le paketi a le malo o Amerika Samoa mo le tausaga tupe fou lea ua amataina nei 2015.

O le paketi na pasia e le Fono Faitulafono e $424.48 miliona, o lo o aofia ai i totonu ma le suiga e tasi na pasia e le Fono, o le aveese mai lea o le $65,000 mai le Paketi a le Ofisa o Turisi, ae tu’u atu i lalo o le paketi a le Ofisa o le Kovana, e fa’atupe ai le si’itaga o totogi o le kovana ma le lutena kovana, lea e o o mai lava i le taimi nei e le i pasia e le Fono Faitulafono le pili tau fa’aofi e sii ai totogi o ta’ita’i o le atunu’u, mai le $85,000 ma le $75,000 i le $125,000 ma le $100,000 mo le Kovana ma le Lutena Kovana.

Na taua e Lolo i lana tusi i ta’ita’i o le Fono, lona fa’afetaia o le galuega fitaituga sa feagai ma afioga i senatoa ma faipule, i lo latou iloiloina lea ma le toto’a o le paketi a le malo, e ala i iloiloga sa faia ma sui o matagaluega ma ofisa tumaoti taitasi a le malo.

Na taua e Lolo e fa’apea, o le tapenaina o le paketi fa’aletausaga a le malo e le o se galuega faigofie, ae atagia ai lava le galulue faatasi ma le soosoo tauau o le faigamalo ma le Fono Faitulafono.

SAUNI FAIPULE ILOILO LE PILI TAOFI AI LAFOGA TOTOGI 2% MO LE LBJ

O le aso Lulu o le vaiaso fou lea ua fa’atulaga e le Komiti o le Sailiga o le Tamaoaiga a le maota o sui, e faia ai lana iloiloga mo le tulafono tau faaofi lea na faaulu i luma o le maota i le amataga o le tausaga nei, e taofi ai le faaauauina o le lafoga o totogi e 2%.

O molimau o le a fesiligia e le komiti i lenei iloiloga, e aofia ai le Teutupe a le malo ia Ueligitone Tonumaipe’a ma le Pulesili le tumau a le LBJ ia Leilua Mase Akapo.

O le amataga o le vaiaso nei na tula’i ai le afioga i le ali’i faipule ia Larry Sanitoa i luma o le maota o sui, ma ia talosagaina komiti a le maota o lo o taatitia ai ni isi o pili taua e tatau ona vave faia i ai se faaiuga, ina ia silasila toto’a i le taua o tulafono tau faaofi nei ma fuafua i ai ni iloiloga, ona o ni isi o nei mataupu e taua mo le soifua manuia o le atunuu.

O se tasi o pili na taua e Sanitoa i lana saunoaga, o le pili e faamuta ai le lafoga o totogi e 2%, lea o lo o taoto i le komiti o lo o taitaia e le alii faipule ia Fatulegaee Palepoi Mauga.

E ui o lea ua taoto le pili tau faaofi e talosagaina ai le faamuta o le lafoga o totogi e 2% mo le falema’i, peita’i so o se taimi e molimau ai le Komiti Fa’afoe a le falema’i i luma o le Fono Faitulafono e aofia ai ma le taeao o le aso Lulu na te’a nei lea na molimau ai i luma o le Senate, na taua ai e le Komiti Fa’afoe le “matua mana’omia” e le falema’i o le tupe o lo o maua atu i le tulafono e 2%, e fesoasoani ai i le fa’atupeina o le polokalame lea e ave ai gasegase i fafo mo togafitiga.

Na taua e ni isi o faipule i luma o le maota i le vaiaso nei, le to’atele o tagata palota ua telefoni atu i faipule ma fa’aoo atu i ai a latou talosaga ina ia pasia le tulafono e faamuta ai le lafoga e 2%, ona ua avea le lafoga lenei ma avega mamafa i tagata e vaivai le tamaoaiga.