SOLOFUA MOLIAGA FA’ASAGA I LE GRANDFATHER

O ananafi na tuuina mai ai e le afioga i le faamasino sili ia Michael Kruse sana fa’aiuga, e talia ai le talosaga a le malo, ina ia solofua moliaga mamafa sa tu’uaia ai le grandfather e 93 tausaga o lona soifua, i lona faia o uiga mataga faafeusuaiga i lona granddaughter e 4 tausaga le matua i le 2012.

Saunoa Kruse e faapea, ua mae’a ona iloilo e le fa’amasinoga le talosaga a le malo ma faia ai loa le faaiuga ina ia solofua moliaga sa faia faasaga i le ua molia, lea na saofa’i i luga o lana wheelchair i totonu o le potu fa’amasino i le taimi na fa’agasolo ai taualumaga o lana mataupu ananafi.

O moliaga faasaga i lenei tama matua e aofia ai lona faia o uiga mataga i se teineititi laititi, faia o gaioiga mataga faafeusuaiga, tagofia o itutinosa o se teineititi, ma le moliaga mamafa e tasi, o lona faia lea o ni gaioiga e ono lamatia ai le saogalemu o fanau laititi.

O nei tuuaiga uma e pei ona taua e le malo i le pepa o tagi sa latou fa’aulu i le fa’amasinoga, na tula’i mai i le aso 16 Me 2012.

I le aso 29 Oketopa 2012, na faila ai e le loia a le ua molia se talosaga i le fa’amasinoga, e talosagaina ai le taofia lea o le fa’aaogaina o le fa’amatalaga a le teineititi e 4 tausaga na a’afia se tu’uina atu i leoleo.

I le mae’a ai o se iloiloga sa faia i lenei mataupu, na tuuina mai ai loa e le fa’amasinoga sana poloaiga i le aso 23 Ianuari 2013, e poloaina ai le taofia o le fa’aaogaina faamatalaga a le teineitiiti sa faia, ma fa’ai’uina ai e le fa’amasinoga, e le i malamalama le teineititi.

NOFOVAAVAAIA ALII TALEPE FALE E TO’ALUA

O ali’i e to’alua lea na ta’usala e le fa’amasinoga maualuga i lo la osofaia o le lala o le Western Union i le itu i sisifo o Tutuila ma fa’aleaga ni isi o mea totino, ua nofovaavaaia mo le 7 tausaga i lalo o poloaiga, e aofia ai lo la tuli o masina ta’i 28 i le toese i Tafuna.

O lea fa’aiuga na tuuina atu e le afioga i le fa’amasino sili lagolago ia Lyle L. Richmond ma afioga i fa’amasino lagolago ananafi, ina ua mae’a ona latou iloiloina fa’afinauga a loia e tusa ai o se fa’asalaga talafeagai mo i laua ua molia, aemaise ai fa’atoesega a i laua nei e tusa ai o le solitulafono sa laua fa’atinoina.

O moliaga e lua ua fa’asala ai e le fa’amasinoga ia Amosa Ilalio ma Semurana Leaumoana, e aofia ai le moliaga mamafa o le talepe fale i le tulaga lua faapea ai ma le moliaga mama o le inupia ae lei atoa le 21 tausaga.

Saunoa Richmond e fa’apea, e ui i le matuia o le gaioiga sa faia e i laua nei, peita’i ua talia e le fa’amasinoga le talosaga a loia, o i laua ua molia e agava’a mo se fa’asalaga fa’anofovaavaaia.

O ni isi o tuutuuga o le nofovaavaaia a Ilalio ma Semurana e aofia ai lo la tuliina o masina e 28 i le falepuipui i Tafuna, peita’i o le a lava na o masina e 12 la te tuliina, ae o masina e totoe ai o le a fa’amalumalu lona tuliina, fuafua la i lo la usitaia o isi poloaiga a le fa’amasinoga.

O isi poloaiga e aofia ai le faasa ona la toe tagofia le ava malosi, faasa ona la toe soli se tulafono i totonu o le 7 tausaga o le la nofovaavaaia, ua poloaina fo’i laua e fa’atino ni galuega mo tagata lautele i lalo o le vaavaaiga a le Ofisa Nofovaavaaia mo le umi e ta’i 500 itula a le tagata.

O le salatupe a le tagata e totogi e $1,000 e tatau ona totogi atu i totonu o le tausaga muamua o le nofovaavaaia, ma le tupe e $3,930 mo mea sa fa’aleagaina i le ofisa o le Western Union o le a la toe totogiina i totonu fo’i o le tausaga muamua o le la nofovaavaaia.

Ua poloaina fo’i e le fa’amasinoga i laua ua fa’asalaina nei, ina ia auai i ni aoaoga faa faufautua e fesoasoani ai i le tagofia o le ava malosi, ae mo le susuga a Semurana, ua poloaina e le fa’amasinoga o ia ina ia fa’afou lona ID i le Ofisa o Femalagaaiga lea ua silia ma le 4 tausaga talu ona mae’a le aoga, afai e leai, e ono mafai ona poloaina o ia na te tuua le teritori ae toe fo’i atu i le atunu’u na malaga mai ai.

E tusa ai ma fa’amaumauga a le fa’amasinoga, ua 11 masina talu ona taofia Ilalio ma Semurana i le toese i Tafuna, lona uiga toe tasi le masina o lo o totoe o le la fa’asalaga fa’afalepuipui ona tatala loa lea o i laua i tua.

TOLOPO ILOILOGA ALI’I TO’ATOLU TU’UAIA OSOFAIA GOLD GONDA I FAGAALU

O le aso 14 Novema 2014 lea ua fa’atulaga e toe tutula’i ai i luma o le fa’amasinoga maualuga ali’i e to’atolu o lo o tu’uaia i le osofaia o le faleoloa o le Gold Gonda i Fagaalu, ina ua latou tutula’i i le taeao ananafi ma latou teena ai tu’uaiga uma fa’asaga ia te i latou.

Na fa’ailoa e le ali’i loia fautua o Michael White o lo o tula’i mo i latou o lo o tuuaia i lenei mataupu e aofia ai Samuelu Wright, Alatuna Simi ma Falefatu Asi, o lo o fa’agasolo pea feutanaiga ma le itu a le malo mo se taunuu lelei o lenei mataupu.

E le i fa’atuiese le itu a le malo i le talosaga a le itu tete’e ina ia toe tolopo le mataupu mo se isi 30 aso, lea fo’i na talia e le fa’amasinoga.

O i latou nei e to’atolu o lo o tuuaia i moliaga e aofia ai le talepe fale, faomea ma le gaoi, e mafua mai i le fa’alavelave lea o lo o tuuaia ai i latou e le malo, ina ua latou osofaia le faleoloa o le Gold Gonda i Fagaalu i le masina o Me o le tausaga nei pe tusa o le itula e 1:00 i le vaveao, ae ave fa’agaoi ai se vaega tupe mai totonu o le faleoloa.

O le moliaga fa’aopoopo fa’asaga ia Wright e aofia ai lona umia fa’asolitulafono o se a’upega mata’utia, ona o ia lea o lo o tu’uaia sa ia fa’alala se fana i le fa’atauoloa.

O lo o taofia pea i latou nei e to’atolu i le toese, ina ua le mafai ona latou totogiina le ta’i $100,000 na fa’atulaga e le fa’amasinoga e tatala ai i laua i tua mai le toese.