FESILIGIA FA’AIUGA KOVANA PE TUSA MA LE TULAFONO

Ua fesiligia nei e le afioga i le ali’i senatoa ia Magalei Logovi’i, lea fo’i sa avea ma Teutupe a le malo, le fa’aiuga ua faia e le alii kovana ia Lolo Matalasi Moliga e aveese mai ai le faagaioiina o totogi a tagata faigaluega uma a le malo mai le Ofisa o le Tupe, ae tu’u atu i lalo o le Matagaluega o Tagata Faigaluega.

O ripoti mai e au fa’asalalau na mafua ai ona laga e Magalei lenei mataupu, i le taimi o folafolaga a le Senate i le aso Faraile na te’a nei nei e fa’apea, o lo o manino le tulafono, o le mata’ituina o le faagaioina o totogi a tagata faigaluega a le malo, e i lalo lea o le fa’amalu a le Teutupe, o ia fo’i lea o lo o sainia siaki o totogi.

Afai o lea ua aveese mai le matafaioi lenei mai le Teutupe a le malo ae tuu atu i le Ofisa o Tagata Faigaluega a le malo, o le fesili a le afioga a Magalei, “o ai e ana le saini lea o le a tuu i luga o siaki a tagata faigaluega a le malo”.

O se tasi o mataupu na folasia e le alii kovana i le fonotaga a lana kapeneta i le aso Lua na te’a nei, o le faaiuga ua ia faia e aveese mai ai le faagaioiina o totogi a tagata faigaluega a le malo mai le Ofisa o Tupe, ae tu’u atu i le Ofisa o Tagata Faigaluega.

E mafua lea tulaga e pei ona saunoa le kovana, ina ia fa’aitiitia ai le tele o fa’afitauli ua maitauina le alia’e mai i lenei vaitau i totonu o le malo, e aofia ai le tele o ovataimi e maua e tagata faigaluega a le o pasia atu e le malo.

Ua aso taeao (aso Lua) ua faatulaga ai se iloiloga a le Senate i lenei mataupu, ma ua valaauina le teutupe a le malo e molimau i le iloiloga.

POPOLE LE FONO I LE GASEGASE O LE EBOLA

E le o se taimi muamua lenei ua fetufaa’i ai afioga i senatoa ma faipule i le fa’ama’i oti lea o lo o sosolo i atunu’u o Aferika, talu ona salalau tala e uiga i lenei fa’ama’i. I le ulua’i taimi na fesiligia ai e le Fono le mataupu e fa’atatau i le ‘Ebola’, sa na o atunu’u eseese o Aferika na taua le a’afia ai, peita’i o le taimi nei e pei ona taua i ripoti, ua to’atasi se tagata i totonu o Amerika ua fa’amaonia le a’afia, ma o popolega na o le Fono Faitulafono i le taimi nei.

Saunoa le afioga i le alii senatoa ia Tuiasina Sosene e fa’apea, e tatau i le Matagaluega o le Soifua Maloloina ma le falema’i o le LBJ ona galulue soosoo tauau, i le mata’ituina o gaioiga uma ina ia mautinoa e leai se tasi e aafia i lenei fa’ama’i e ulufale mai i totonu o Amerika Samoa.

“O le popolega o lo’u sui, afai o lea ua maua i Amerika, lona uiga e tele le avanoa e mafai ona maua ai Amerika Samoa, aua o tatou o le teritori o le Iunaite Setete o Amerika, e tatau fo’i la ona mataalia tagata uma ina ia aua nei oo mai lenei fa’ama’i i Samoa”, o le saunoaga lea a le alii senatoa.

Na taua e le Fa’atonusili o le Soifua Maloloina ia Motusa T. Nua e fa’apea, o le a tulimata’i e le matagaluega tulaga uma i le puipuiga o le atunuu mai lenei gasegase, ina ia mautinoa e leai se isi e a’afia ai, atoa ai ma le tulimata’i lea o le gasegase e to’atasi lea ua fa’amaonia mai le maua i le aai o Texas.

FESILIGIA TAUTUA POLENISIA MO MANU’A

E ui e taua le auaunaga lea ua ofo atu e le Kamupani Va’alele a Samoa, le Polenisia mo le motu o Manu’a, peita’i na taua e le afioga i le ali’i senatoa ia Faletagoa’i Tuiolemotu i luma o le maota maualuga, e tatau ona iloilo lelei pe o tusa ma tulafono a le feterale, lea e fa’asa ai se isi kamupani va’alele mai fafo atu o Amerika ona felelea’i i totonu o malae va’alele o lo o pulea e le feterale a le malo tele.

Na taua e le ali’i senatoa e fa’apea, e taua le manaoga o lo o fetaia’i ma tagata o le itumalo, ae o le itu taua, ia fa’atinoina lea auaunaga i ala o le tulafono.

O se tala fiafia mo le itumalo o Manu’a le talia e le Matagaluega o Femalagaaiga a le malo tele o le talosaga e tautua ai le Polenisia i le va o Pago Pago ma Manu’a, amata mai i le aso 1 e o o atu i le aso 30 o Setema na te’a nei, peita’i o le vaiaso ua te’a, na toe talia ai fo’i le talosaga ina ia toe fa’aauau lea auaunaga mo Manu’a mo le isi 30 aso, lea e fa’amuta i le aso 30 le masina lenei o Oketopa.