TOFIA UTI E SUI TULAGA IA FAUMUINA UA TU’UMALO

O le itula e 9:00 i le taeao nei lea ua faamoemoe e fa’atauto ai i luma o le maota maualuga le afioga i le Maopu ia Uti Petelo, o ia lea ua filifilia e le Itumalo o le Maoputasi ma avea ma se tasi o ona sui i le Senate, e sui tulaga i le afioga i le ali’i senatoa ia Faumuina Tagisiaalii na ia nofoia le nofoa ua tu’umalo.

O le aso Lulu na te’a nei na fono ai le itumalo o le Maoputasi i le malae i Gagamoe, le maota o le afioga i le Senatoa ia Mauga Tasi Asuega, ma tasi ai le finagalo o le itumalo e avea le afioga i le Maopu ia Uti ma o latou sui i le senate.

O le taeao ananafi na taunuu ai i le maota maualuga se pepa faamaonia mai le Itumalo o le Maoputasi, lea foi na faamaonia e le Fa’alupega a le Itumalo o le Maoputasi ia Ta’amu Iakopo Vaigafa, e fa’amaonia ai tofiga mo le afioga Uti.

Saunoa Gaoteote e fa’apea, ao lumana’i le tatalaina o le tauaofiaga a le maota maualuga i le taeao nei, e muamua lea sauniga mo le fa’atautoina o le afioga a Uti e se ali’i fa’amasino mai le fa’amasinoga maualuga.

TALOSAGA FONO I LE KOVANA MO MATAUPU O LE FONO FAAPITOA

Ua tu’uina atu se talosaga a le afioga i le ali’i Peresetene o le Senate i le afioga i le Kovana Sili ia Lolo Matalasi Moliga, mo se avanoa e mafai ai ona fa’aopoopo ni isi o mataupu taua a le Fono e le i mae’a ona faia i ai ni a latou fa’aiuga, i mataupu o lana Fono Fa’apitoa lea ua fa’amoemoe e nofoia i le vaiaso fou.

Na taua e Gaoteote Palaie Tofau i luma o le Senate ananafi e fa’apea, o lo o fa’atali se tali mai le afioga i le alii kovana e tusa ai o se talosaga sa ia tu’uina atu i ai, mo se avanoa e fa’aopoopo atu ai i mataupu o lana fono faapitoa ni isi o mataupu taua a le Fono sa iloiloina i le tauaofiaga lenei ae lei mae’a ona fai i ai se finagalo o afioga i senatoa ma faipule, ina ia aofia i totonu o mataupu o le fono faapitoa.

E le i fa’ailoa e le Tama’ita’i o le Ao mataupu taua o lo o fa’atatau i ai lana saunoaga.

Sa ia fautuaina fo’i afioga i ali’i senatoa ina ia fa’amalolosi atu i le fono fa’apitoa ua valaauina e le ali’i kovana, o le fatuaiga tausi lea a le Fono ma le galuega na tofia i latou e le atunu’u e galulue ai.

Saunoa Gaoteote e fa’apea, “e leai se isi e fa’alagolago i ai le manuia o Tutuila ma Manu’a, ae fa’amoemoe tasi i le maota o le atunu’u, i la outou tofa saili e manuia ai fuafuaga uma e galulue i ai le Fono”.

E fa mataupu o le fono faapitoa a le alii kovana lea ua valaauina e amata i le aso Lua o le vaiaso fou, ma le fa’amoemoe e le sili atu ma le 10 aso le umi, o ia mataupu e aofia ai ni isi o tulafono e moomia le toe faia i ai o ni suiga, faapea ai ma tofiga mo sui fou o le Komiti Fa’afoe o le Vaega o Femalagaaiga.