TOFIA ISI SUI FA’AOPOOPO TO’AFA KOMITI FA’AFOE FEMALAGAAIGA

E to’afa isi fui fa’aopoopo o le Komiti Fa’afoe a le Vaega o Femalagaaiga ua tofia nei e le alii kovana ia Lolo Matalasi Moliga, ma ua tu’uina atu i latou nei i luma o le Fono Fa’apitoa a le alii kovana o lo o nofoia i le taimi nei, mo le fa’amaoniaina lea o latou suafa.

O i latou e to’afa ua tofia e aofia ai Matagi Ray McMoore; Fagaima Solita, ma sui e to’alua o le Fono Faitulafono, le afioga i le ali’i senatoa ia Tuiasina Esera ma le afioga i le ali’i faipule ia Timusa Tini Lam Yuen.

O le komiti o Mataupu Tau Tulafono a le maota uma e lua lea ua taoto atu i ai tofiga a le kovana mo le iloiloina, ma ua fa’amoemoe o le itula e 8:00 i le taeao o le aso Tofi o le vaiaso nei ua fa’atulaga e faia ai le iloiloga a le komiti a le maota o sui, mo le fesiligiaina o tofiga fou a le ali’i kovana, i lalo o le taitaiga a le afioga i le tamaitai faipule ia Vui Florence Saulo.

Ae mo le maota maualuga, e le i fa’atulagaina se aso e faia ai sa latou iloiloga.

I le taimi o folafolaga a le maota maualuga, na tula’i ai le afioga i le ali’i senatoa ia Galea’i M. Tu’ufuli ma ia fesiligia le auai o sui o le Fono Faitulafono i totonu o le Komiti Fa’afoe a le Vaega o Femalagaaiga.

Saunoa Galea’i e fa’apea, i le taimi atoa na nofoia ai e le alii kovana ia Tauese Sunia le nofoa o le atunu’u, na te le i fa’atagaina ni sui o le Fono Faitulafono e nofoia le Komiti Fa’afoe lenei, ona o lona popolega i le ono tula’i mai ai o se fete’enaiga i le va o le Fono ma le Komiti Fa’afoe, ae o lo o i ai sui o le fono i le komiti fa’afoe.

Mo se fa’ataitaiga e pei ona saunoa Galea’i, afai o se mataupu e pasia atu e le fono ae avatu i luma o le Komiti Fa’afoe ae latou teena, ae taulamua mai ai le sui o le fono o lo o i totonu o le komiti faafoe i le teena o le finagalo o le fono, o iina la lea e mafua ai ona atugalu sona lagona.

Na faamanino e le alii peresetene o le Senate ia Gaoteote Palaie Tofau e fa’apea, o sui o le fono i totonu o le Komiti Fa’afoe, e le tofia mai e le alii kovana, ae o tofiga ia e faia e laua ma le fofoga fetalai, ae afai e i ai se senatoa e finagalo e le talafeagai sui ua tofia, ona talatalanoa atu lea mo sana fautuaga.

TAUNU’U LISI A LE MALO I LE FONO MO LE PASIAINA

E lua lisi a le malo lea ua taunu’u i luma o le Fono Faitulafono mo lona fa’a pasiaina, ina ia toe fa’aopoopo ai lisi tuai a le malo mo le isi ta’i 30 tausaga.

O lisi e lua o lo o aofia i mataupu o le fono faapitoa sa valaauina e le alii kovana ia Lolo Matalasi Moliga, e aofia ai le lisi ma le kamupani a le GHC Reid Corporation, fa’apea ai ma le lisi i le va ma le kamupani o le Pacific Grading Corporation.

 O le lisi i le va o le malo ma le kamupani a le CHC Reid Corporation, ua talosagaina ai le toe fa’aopoopo o isi tausaga e 30 i le lisi, lea e amata atu i le aso 3 Oketopa 2014 ma le fa’amoemoe e fa’amuta i le aso 1 Tesema 20143.

Ae mo le lisi i le va o le malo ma le Pacific Grading Corporation, ua talosagaina ai le toe fa’aopoopo o isi tausaga e 30 i le lisi, amata mai i le aso 1 Ianuari 2012 ma le fa’amoemoe e mae’a i le aso 31 Tesema 2041.

I lalo o le tulafono mo lisi i le va o le malo ma kamupani tua, e tatau ona teena e le Fono Faitulafono mataupu i lisi ina ia mafai ai ona pasia le toe fa’aopoopo o tausaga e pei ona manaomia, ma e le i fa’atulagaina e maota e lua ni aso mo le iloiloina o ia lisi a le malo.