SAUNIGA FA’ALEMALO AFIOGA LEMAPU S. TALO

O le itula e 11:00 i le taeao nei lea ua fa’atulaga e fa’ataunu’u ai sauniga fa’alemalo a le afioga i le ali’i Faipule ua tu’umalo, le tofa Talolema’agao Lemapu Suiaunoa Talo.

E tusa ai ma le polokalame a le aiga ua fa’alauiloa, o le mae’a ai o le sauniga fa’alemalo a le afioga i le ali’i faipule mai le Itumalo o Sua #2, ona momoli atu ai loa lea o lona Sa i le malumalu o le Ekalesia EFKAS i Lauli’i mo ona sauniga fa’aleaiga (Family Service), ona toe momoli atu ai loa lea o lona Sa i le maota gasegase i Fagaalu.

O le itula e 12:00 i le aso Faraile, Ianuari 23, 2015 o le a aveese mai ai lona Sa mai le maota gasegase i Fagaalu, ae momoli sa’o atu loa i le malumalu o le Ekalesia EFKAS i Masefau mo ona sauniga, ona momoli atu ai loa lea o lona Sa i lona aiga i Galesogi mo isi vaega o lo o totoe o ona toe sauniga.

O le itula e 10:00 i le taeao o le aso To’ona’i, Ianuari 24 e fa’ataunu’u ai ona toe sauniga, ma lagomau ai loa i lona oliolisaga tumau i lona i Aufaga i Masefau lava.

O ni isi o polokalame o le sauniga fa’alemalo o le afioga i le ali’i faipule i le taeao nei, e aofia ai le tauaaoina atu o le I’ugafono Maliliefa’atasi a le Fono Faitulafono, e avatu ai fa’amaisega i le faletua ia Sima Tima Malele-Talo ma le fanau, ona o le motusia fa’afuase’i o le mafutaga ma le afioga i le ali’i faipule, ma avatu ai fa’aaloaloga i lana tautua i le malo, atunu’u faapea aiga ma le Ekalesia.

O le aoauli o le aso Lulu, aso 31 Tesema 2014 na faamanava ai e le Atua galuega a lana auauna faipule, i le tuana’i ai o se taimi umi o fa’ataotolia o ia i le falemai o le LBJ, ona o gasegase o le tino.

PILI FA’AVAE AI SE FALETUPE FA’ATERITORI A AMERIKA SAMOA

Ua i luma nei o le maota maualuga a le Senate se pili na talosagaina e le ali’i kovana ia Lolo Matalasi Moliga, e fa’avae ai se faletupe fou e pulea atoa lava e le malo o Amerika Samoa, ina ia mafai ai ona tali atu i le manaoga o lo o feagai ma le atunu’u i le taimi nei, o le i ai lea o se isi faletupe na te taliina manaoga o tagata lautele.

O lo o aofia ai fo’i i lenei pili le fa’avaeina o se Kamupani na te pulea ma fa’atautaia gaioiga mo lenei faletupe.

O le fauvaeina o se faletupe fa’ateritori a Amerika Samoa, o le a mafai ai ona foia fa’afitauli o lo o fetaia’i ma le atunu’u i le taimi nei.

PILI SIITIA AI TAPULA’A O TAGI TAU TUPE OO ATU FA’AMASINOGA

Ua i luma nei o le maota o sui o le Fono Faitulafono se pili tau fa’aofi na talosagaina e le ali’i kovana, e siitia ai le tapula’a o tagi tau tupe e mafai ona oo atu i le fa’amasinoga, mo soo se kamupani o lo o latou nono atu tupe i tagata lautele.

O le agaga atoa o le malo ua mafua ai ona talosagaina se suiga i le tulafono, e le gata ia faa faigofie ai i kamupani nono tupe ona maua le avanoa e ao ai a latou tupe sa nono atu i tua, ae fa’aitiitia ai fo’i tupe e totogi e tagata sa latou nonoina tupe mai kamupani.

I lalo o le tulafono o lo o i ai nei, so o se mataupu tau tupe nono e o atu i le $3,000, o mataupu ia e mafai ona tu’uina atu i luma o le fa’amasinoga maualalo mo le fa’atalatalanoaina, peita’i o le suiga e pei ona talosagaina e le malo, ia si’itia atu i le aofa’i e $7,500.