I’UGAFONO FA’AFETAIA AI MATATI’A AUSIA MARCUS MARIOTA

Ua pasia nei e le Fono Faitulafono se i’ugafono malilie fa’atasi a le maota o sui, e tu’u atu ai le agaga fa’afetai ma le faamalo i le susuga a Marcus Ardel Talauniu Mariota, i le maoa’e ma le maualuga o le matati’a ua mafai ona ia ausia, e pei ona ia mauaina ai le fa’ailoga o le “2014 Heisman Trophy award”.

I se vaega o le iugafono o lo o taua ai, o le susuga a Mariota na soifua mai i ona tuaa o Puputoa Mariota ma Alana Deppe-Mariota o Honlulu ma Lauli’i i Amerika Samoa nei.

O ia le ulua’i tama fanau a Samoa ua ia mauaina lenei fa’ailoga maualuga, lea e maua e se tama ta’alo lakapi fa’a-Amerika i totonu o Kolisi, e maualuga le tulaga o lona fa’atinoina o le ta’aloga.

Na taua i totonu o le i’ugafono le fa’amanuiaina o Mariota i tulaga tau a’oa’oga, ma avea ai loa o ia o se ulua’i Samoa ua ia umia lenei fa’ailoga, ma o se itu e mitamita ai ona aiga faapea le atunu’u atoa.

E tele tulaga maoa’e na ausia e Mariota a o fa’agasolo mai ai lona soifua aoaoina aemaise ai o lana taleni, lea na amata mai i le aoga maualuga a St. Louis i Honolulu, ma fa’ai’u ai lona soifua aoaoina i aoga maualuluga i le faapaleina o ia i le faailoga o le ‘Offensive Player of the Year’ i Honolulu.

Na taua e le afioga i le sui peresetene o le Senate ia Nuanuaolefeagaiga S. Nua e fa’apea, o le ausia ai e Mariota o lenei matati’a maualuga, ua avea ai fo’i lea o se auala e lu’itau ai loto o tama fanau uma a le atunu’u o lo o tausinio i lenei ta’aloga, ina ia faamaoni i le taleni ma faamalosi i tiga, aua e i ai le taimi e fa’aeaina ai.

FA’ASEA SOLIAI I LAPISI MAI KAMUPANI I’A O LO O LAFOA’I I LE SAMI

Na fa’aleo e le afioga i le ali’i Senatoa mai le itumalo o Ituau, le afioga i le Maopu ia Soliai Tuipine Fuimaono sana faasea, fa’asaga i le lapisi mai kamupani i’a o lo o momoli e le va’a ma lafoa’i i tai i le sami i le tele o aso.

O le mafua’aga o le fa’asea a le afioga i le ali’i senatoa, ona ua a’afia ai tele le soifua maloloina o lona itumalo i le manogi leaga o le lapisi o lo o lafoa’i i le sami, ae sili ai ona matuia, o le amata sasa’a atu lava lea e le va’a le lapisi i tua atu o Fatu ma Futi ma aga’i atu ai lava i tai.

Saunoa Soliai e fa’apea, e le fou le faafitauli i lenei, ae o le itu e sili ona matuia ai, o le a’afia ai ma le soifua fa’alenatura o meaola o le sami, atoa ai ‘amu ma ‘aau o lo o fa’alagolago i ai le ola o i’a, lea o lo o avea ma mata’i ‘ai a le atunu’u.

Sa ia talosagaina le peresetene o le Senate ia Gaoteote Palaie Tofau, ina ia silasila toto’a i lenei mataupu, ma saili po o ai tonu le vaega e tatau ona fesiligia mo lea fa’afitauli.

Na lagolagoina e Gaoteote ma le afioga i le ali’i senatoa ia LeAtualevao Asifoa le fa’asea a Soliai, ma fa’atulaga ai loa e LeAtualevao se iloiloga ma le vaega a le ASEPA se’i fesiligia e fa’atatau i lenei mataupu.

Saunoa Gaoteote e fa’apea, e le fou le fa’afitauli lea, peita’i e tatau ona fai se galuega a le Fono se’i saili ai se auala e foia ai lea fa’afitauli.