Ads by Google Ads by Google

Tala otooto mai le Fono Faitulafono

PILI SII AI TOTOGI LAISENE AVE TA’AVALE FESOASOANI AI TAOA

 

Ua i luma nei o le maota o sui se pili mo se tulafono taufa’aofi sa talosagaina e le faigamalo a Lolo ma Lemanu, e fa’avae ai totogi fou mo laisene ave ta’avale mo so o se ta’avale i le atunu’u, ma le fa’amoemoega, o le $3 e totogi mo so o se laisene ave ta’avale, o le a teuina i totonu o se Teugatupe Fa’apitoa a le Ofisa o Tagata Matutua, e fa’apitoa lea mo polokalame a tagata matutua.

 

O suiga i totogi o laisene ave ta’avale e pei ona fuafuaina nei, e aofia ai le fa’aopoopo o le $3 e o atu i le $5 mai le tau tuai o lo o i ai i le tau fou e pei ona fuafuaina, se’i vagna ai le laisene ave ta’avale mo ta’avale tua lea e ta’i tolu tausaga ma fa’afou, ua fuafua e sui mai i le $12 o lo o i ai i le totogi fou e $20, atoa ai ma le laisene ave ta’avale mo ta’avale pisinisi, ua fuafua e sui mai i le $8 o lo o i ai i le tau fou e $20.

 

PILI FA’AOPOOPO AI LAFOGA I LUGA O SIKALETI

 

Ua tu’uina atu nei e le afioga i le ali’i kovana ia Lolo Matalasi Moliga se pili mo se tulafono taufa’aofi i luma o le Fono Faitulafono, e fa’aopoopo ai le lafoga i oloa o sikaleti o lo o auina mai i totonu o le atunu’u.

 

O le lafoga tuai o lo o i ai mo oloa o le sikaleti e aofia ai ma isi tapa’a e mafai ona ula ma sau ai i fafo le asu, e 12.5% le lafoga o lo o i ai, peita’i o le tulafono lea ua talosagaina e le faigamalo, o le a si’i atu ai i le 30% le lafoga.

 

Na taua e Lolo i sana tusi sa tu’uina atu i ta’itai o le Fono Faitulafono i le vaiaso na te’a nei e fa’apea, o le ulaula tapa’a, o se tasi lea o mafua’aga ua tula’i mai ai se fa’aletonu tele i le soifua maloloina o tagata i Amerika Samoa, e pei ona taua i se ripoti mai le Faalapotopotoga o le Soifua Maloloina a le lalolagi, i tulaga o gasegase le pipisi o lo o aafia ai le atunu’u.

 

“O le fa’ae’eina atu o nei lafoga, o se auala lea e mautinoa o le a fa’aitiitia ai loa le ulaula tapa’a o tagata, aemaise lava i tupulaga talavou ma aiga e vaivai le tamaoaiga”, o se vaega lea o le tusi a le ali’i kovana.

 

Na fa’ai’u le tusi a le ali’i kovana i lona talosagaina lea o le fono faitulafono, mo le latou pasia vave o lenei tulafono.

 

PILI E TEUTEU AI LE TULAFONO ULAULA TAPA’A

 

O le manatu ina ia saga fa’amalosi atili le tulafono lea na pasia e le Fono Faitulafono ma sainia e le alii kovana i ni tausaga ua mavae, e fa’asa ai le ulaula tapa’a i nofoaga faitele, ua tu’uina atu ai e le afioga i le ali’i kovana ia Lolo Matalasi Moliga se pili i luma o le Fono Faitulafono, mo le fa’atulagaina o se teuteuga i le tulafono tuai ua mae’a ona pasia.

 

O le suiga o le tulafono e pei ona fuafuaina, o le a aofia ai i le fa’aupuga o le “tapa’a” le ituaiga tapa’a lea e fa’aigoaina o le “electronic cigarettes”, ina ia aofia ai i ituaiga tapa’a e fa’asa ona ulaula i nofoaga faitele.

 

Saunoa le ali’i kovana i lana tusi i ta’ita’i o le fono fa’itulafono e fa’apea, i ni taumafaiga a le faigamalo e saili le tulaga o le ituaiga sikaleti lea ua fa’aigoaina o le “electronic cigarettes”, ua fa’amaonia mai ai, e le o aloaia mai e le vaega e puipuia Taumafa ma Fualaau a le feterale (FDA) le saogalemu o lenei ituaiga sikaleti.

 

“O le tulafono fou lea ua ou tu’uina atu, o le a fa’amatala auiliili atu ai le uiga moni o le ituaiga sikaleti lea ua manatu le malo e fa’aopoopo i totonu o le tulafono, ina ia mautinoa e malu puipuia le soifua o le atunu’u lautele”, o se vaega lea o le tusi a le alii kovana i ta’ita’i o le fono.

 

Na faai’u le tusi a Lolo i lona talosagaina lea o ta’ita’i o le fono faitulafono, ina ia latou iloiloina lenei tulafono ma vave faapasia, ona o le taua mo le soifua maloloina o le atunu’u.