FESILIGIA VUI FAAMAMA AVEGA MO TAGATA FAIMALAGA

O le fa’a faigata ona talosagaina o pepa malaga (CI) mo ni isi o le atunu’u e fia malaga i fafo, talu ai le tele o le mau fa’amaumauga e mana’omia e talosagaina ai pepa malaga, o se tasi lea o mataupu na tula’i le afioga i le tama’ita’i faipule ia Vui Florence Saulo ma fesiligia i le taeao ananafi i luma o le maota o sui, peita’i sa fautuaina o ia e le Fofoga Fetalai ina ia fa’atulaga se iloiloga e fesiligia ai le malo e uiga i lenei mataupu taua.

Na taua e Vui e fa’apea, ua tula’i soo mai lenei mataupu i le I.D o tagatanu’u e manaomia mo le fa’amaoniaina o pepa malaga i fafo, o le tusi folau poo le laisene ave ta’avale ma le I.D falema’i.

Ae o le fa’afitauli o lo o i ai, e le o lelei le masini a le Ofisa o Ta’avale Afi a le malo (OMV) e mafai ai ona pu’e laisene ave ta’avale, ae a tu’u atu fo’i i le I.D a le falema’i, e tele naua fa’amaumauga e mana’omia fa’atoa mafai ona pu’e se I.D.

Saunoa atili le tama’ita’i faipule e fa’apea, ua avea le leai o ni laisene ave ta’avale o maua i le taimi nei ma auala ua fai ai ma avega mamafa i le to’atele o tagata o lo o fia malaga i fafo.

“O le laisene ave ta’avale lea e tele ina fa’aaoga e fai ma I.D e fa’amaonia ai le tele o talosaga mo mea e manaomia e aofia ai pepa malaga, o le ID pito sili lea ona taua, ae o le ID a le falema’i, e tele naua mea e mana’omia muamua fa’atoa pu’e ai, ma ua manaomia ai se iloiloga ma ofisa o le malo o lo o gafa ma nei auaunaga, se’i fesiligia le mafua’aga o nei mau fa’afitauli,” o le saunoaga lea a Vui.

O le itula e 1:00 i le aso Lulu o le vaiaso nei lea ua fa’atulaga e fesiligia ai e le komiti o Tulafono ma Fa’amasinoga lenei mataupu, lea ua fa’amoemoe e molimau ai sui mai le Ofisa o le Loia Sili, Pule OMV, Komesina o Leoleo, faapea ai fo’i ma se sui o le Ofisa o Fa’amaumauga.

Ua talosagaina fo’i i latou ina ia tauaao mai ripoti i ta’iala ma tulafono o lo o fa’afoe ai a latou galuega mo le tautuaina o le atunu’u.

UMA PUSA ONOSA’I FAIPULE I LE KOMITI FA’AFOE OFISA TURISI

Ua tauau ina uma atu le pusa onosa’i o afioga i faipule o le maota o sui, aemaise lava i le ta’ita’i o le Komiti o le Faagaioiga o le malo a le maota o sui, le afioga a Faimealelei Anthony Fu’e Allen, i le fiu lea e fa’atulaga iloiloga ma le Komiti Fa’afoe o le Ofisa o Turisi a le malo ae le o i ai lava ni isi e oo atu i le Fono e molimau.

I le fa’alua ai ona le taunu’u o iloiloga a le komiti o le Faagaioiga o le malo ma totino o le Komiti Faafoe talu mai le vaiaso na te’a nei, na toe talosagaina ai loa e Faimealelei le iloiloga e fa’ataunu’u i le taeao ananafi, peita’i e silia ma le 30 minute o fa’atalitali faipule ae leai ma ni molimau na oo atu i le maota.

Na siisii le si’ufofoga o Faimealelei ao saunoa e fa’aleo lona lagona fa’anoanoa i luma o le maota ananafi, ina ua fa’atolu ona fa’atulaga iloiloga a le komiti ae foliga mai e le o fa’atauaina e le komiti o turisi.

Na fa’amalulu le fofoga fetalai ia Savali Talavou Ale i tulaga fa’aletonu e pei ona tula’i mai, ma ua toe fa’atulaga ai loa le iloiloga e faia lea i le aso Tofi o le vaiaso nei.

FESILIGIA FA’AAOGAINA TUPE MO ATINA’E I NU’U MA ITUMALO

O le vaega tupe lea o lo o fa’aagaga mo galuega fesoasoani i nu’u ma itumalo (small village fund), o se tasi lea o mataupu na fesiligia i luma o le maota o sui ananafi, e le afioga i le tama’ita’i faipule ia Vui Florence Saulo, ona o le naunau e fa’amanino le tulaga o lo o iai lea vaega tupe, ina ia silafia ai fo’i e nu’u ma itumalo auala e mafai ona agava’a ai.

Saunoa Vui e fa’apea, e fia malamalama lona sui pe fa’afefea ona agava’a afioaga i ni talosaga e tu’uina atu mo lea vaega tupe fesoasoani. Saunoa atili Vui e fa’apea, ua fa’atele ona ia taumafai e talosagaina se fesoasoani mai lea vaega tupe e fesoasoani ai i auala a lona itumalo, ae le o mafai lava ona maua se fesoasoani mo lona itumalo.

Ua fautuaina e le fofoga fetalai ia Savali Talavou Ale le komiti o lo o gafa ma le talanoaina o lenei mataupu, ina ia fa’atulaga se iloiloga e fesiligia ai le mataupu e pei ona fia malamalama i ai le tamaitai faipule