SAUNI FAIPULE FESILIGIA KOMITI FA’AFOE A LE FALEMA’I

O le taeao o le aso Lulu o le vaiaso nei ua fa’atulaga e faia ai le iloiloga a le Komiti o le Soifua Maloloina a le maota o sui, ma totino o le Komiti Fa’afoe a le Falema’i i Fagaalu, mo le fesiligiaina lea o le tele o mataupu o lo o atugalu afioga i Faipule o lo o a’afia ai le tautua a le falema’i i le taimi nei, e le gata i vaega o lo o fa’atino ai la latou auaunaga e pei o vailaua, fualaau, ie afu, moega ma aluga e le o lava, ae o le tupe lea o lo o aitalafu ai le malo i le falema’i e tusa ma le $10 miliona.

E ui o le taeao nei lea ua fa’amoemoe e tapunia ai galuega a le Fono Faitulaono, peita’i na saunoa le sui fofoga fetalai ia Fetu Fetui Jr e fa’apea, e le avea le tapunia o galuega a le Fono Faitulafono ma auala e taofia ai galuega fa’atino a le maota.

Saunoa Fetui Jr e fa’apea, o se tasi lenei o mataupu o lo o tele ai fa’asea ma le muimui o le atunu’u, fai mai e na o le 90 aso e fono ai le Fono Faitulafono i le tausaga, ae o isi aso e tele e leai ni a latou galuega e fa’atino ai.

“Ou te fia fa’ailoa i le atunu’u e le moni lea manatu, o lo o galulue pea le Fono Faitulafono i le tausaga atoa, tusa lava pe malolo le Fono mai ana galuega ae fa’atino pea lava galuega a sui mamalu i manaoga eseese i totonu o itumalo ma le atunu’u,” o le saunoaga lea a le afioga i le sui fofoga fetalai.

O ananafi sa faatulaga e faia ai le iloiloga a le maota o sui ma sui o le pulega a le Falema’i, peita’i o se talosaga mai le afioga i le ali’i kovana ia Lolo Matalasi Moliga, ina ia tolopo lea iloiloga ae se’i fa’ataunu’u muamua la latou feiloaiga ma sui o le pulega a le falema’i i le aoauli ananafi, na mafua ai loa ona tolopo mai le iloiloga e faia i le taeao nei.

FAAMANINO MATAUPU FAASEA AI MANU’A I LE DEBIT METER

Na maua le avanoa e fa’amanino ai e le Pulesili o le Ofisa o le Pulega o le Eletise ma le Suavai (ASPA) i luma o le maota o sui i le taeao ananafi, le mataupu na alia’e mai ai se fa’asea mai le itumalo o Manu’a i le vaiaso na te’a nei, i le i ai lea o se vaega tupe ua totogi e i isi o aiga pe afai e mae’a le masina atoa e lei fa’atauina lava se pili mo le eletise i totonu o le debit meter.

Na faamanino e le afioga i le ali’i faipule ia Puleleiite Tufele Li’amatua i luma o le iloiloga e fa’apea, e to’alua aiga mai Manu’a sa fa’asea i le mataupu lenei, ina ua o atu e fa’atau ‘cash power’ mo ‘debit meter’ ae fa’ailoa atu i ai e le Ofisa a le ASPA sei vagana ua totogi muamua le sala mai le leai o se ‘cash power’ sa faatau mo le masina atoa ua tuana’i ona fa’atoa mafai lea ona fa’atau se ‘cash power’ fou.

Na fa’amanino e le afioga a Utu Able Malae fa’apea, e le sa’o fa’asea a Manu’a e fa’atatau i le tupe e totogi pe afai e atoa le masina e leai se ‘cash power’ e fa’atau, ae na pau le tupe e tatau pea ona totogi e aiga uma, o le ‘service fee’ e $6 lea e totogi e aiga uma i le masina e tasi.

Mo se fa’ata’ita’iga afai e mae’a le masina e lei toe fa’atauina se ‘cash power’, o le taimi lava e toe fa’atau ai le ‘cash power’, o le taimi fo’i lea e tipi ese mai ai ma le $6 o le ‘service fee’ o le masina ua tuana’i, ae le o se auala e ono taofia ai le fa’aauau pea ona maua e lea aiga o le auaunaga a le ASPA.

Saunoa atili fo’i Utu e fa’apea, e tutusa uma lava pili o lo o totogi e aiga Tutuila, Manu’a ma Aunu’u.

PASIA SENATOA PILI SII AI AOFA’I AITALAFU LAITI

E 13-0 le aofa’i o le palota na pasia ai e le maota maualuga a le Senate i le taeao ananafi le pili al e maota o sui, e si’itia ai i le $7,500 le maualuga o aitalafu laiti e mafai ona tu’uina atu i le fa’amasinoga, mai le aofa’i e $3,000 sa i ai.

Na taua e le Loia Sili ia Talauega Eleasao Ale i luma o le Fono e fa’apea, o le taua o le suiga o le tulafono lenei, o le a fesoasoani ai i tagata aitalafu o le atunu’u faapea ai pisinisi o lo o pagatia i le tau aoina mai o aitalafu.

E pei ona taua i le tulafono, o le a aloai lenei tulafono i le taimi lava e pasia ai e le Fono Faitulafono ma fa’amaonia e le ali’i kovana.