FESILIGIA VUI SE GAIOIGA A LE FONO E FA’ATATAU TOTOGI AMATA

Ua talosagaina e le tama’ita’i faipule mai le Itumalo o Tualauta, afioga Vui Florence Vaili Saulo le Fofoga Fetalai o le maota o sui, ina ia silasila toto’a ta’ita’i o le fono i se gaioiga e tatau ona faia, e fa’atatau i le mataupu o le totogi amata lea o loo fuafua e toe fa’aopoopo le isi $0.50 i le aso 30 Setema, 2015.

Saunoa Vui e fa’apea, i le avea ai o lenei mataupu o se mataupu e sili ona taua mo le atunu’u atoa, e tatau i le Fono ona silasila toto’a i ai, ina ia oo atu i le taimi o loo fuafua e fa’ataunuu ai le isi siitaga ae ua mautu se finagalo o le Fono.

Sa ia fa’ailoa atili i luma o le maota o sui ananafi e fa’apea, pe malilie i ai le atunuu pe tete’e fo’i, o le mea moni, o le lumana’i manuia o le atunuu ma le malo e sili ona taua.

Saunoa le fofoga fetalai ia Savali Talavou Ale e faapea, ua mae’a ona taoto atu se finagalo o le Fono Faitulafono i le ali’i kovana ma le faigamalo, ma o loo fa’atalitali pea i se gaioiga a le malo e fai.

Na fa’afetaia e Savali ia Vui e tusa ai o lona lagaina o lenei mataupu taua, ae i lona talitonuga, e le o mama fo’i i le finagalo o le faigamalo lenei mataupu, ona o se mataupu e ogaoga ma e ono aafia ai le tamaoaiga o le atunuu i soo se itu.

I se fonotaga a le Kapeneta sa faia i ni nai masina e le’i mamao atu, na taua ai e le afioga i le ali’i kovana ia Lolo Matalasi Moliga e fa’apea, e lagolagoina e le malo le fa’aauau pea o le sii o le isi $0.50 mo totogi amata, ae o lea ua ia fautuaina le Matagaluega o Fefaatautaiga ma Alamanuia a le malo, e ave se tusi i le Feterale, afai latou te malilie ai, pe mafai ona totogi e Amerika le vaega o le totogi maualalo latou te gafatia, ae o le vaega e sili ai e fa’atupe mai e le Feterale.

E oo mai i le taimi nei, e le i toe maua mai se isi tali mai le faigamalo e tusa ai o lea saunoaga a le ali’i kovana, peita’i mo sui o pisinisi tua i le atunu’u, ua fa’aalia lo latou le lagolagoina o lea fuafuaga mai le malo.

TELE PEA TULAGA FA’ALETONU I AUALA I LE ATUNU’U

E le’i talia e le Peresetene o le Senate, afioga Gaoteote Palaie Tofau le ripoti a le afioga i le ali’i Senatoa ia Alo Faauuga, o le Taitaifono lea o le Komiti o Galuega Lautele a le maota o le senate, e faapea o loo lelei atoatoa auala i le itu i Sasa’e o le motu nei o Tutuila, se’i vagana ai le itu i Sisifo o loo fa’aletonu.

Na taua e Alo i lana saunoaga e fa’apea, ua mae’a ona ia asia auala i le Falelima i Sasa’e, ma ua ia talitonu i le tulaga lelei ua i ai auala, se’i vagana ai le Falelima i Sisifo o loo mana’omia le fa’aleleia o auala, ona o loo tele maga ala o loo fa’aletonu.

Na vave ona fa’auilavea Gaoteote i le saunoaga a Alo ma ia saunoa e faapea, e le iloa poo fea tonu auala i le Falelima i Sasa’e na asia e le ali’i Senatoa, ae o auala lava ia i Vatia, e matua tele le leaga ma le faaletonu.

Na fautua Gaoteote ia Alo e toe alu se isi ana asiasiga i Vatia se’i ona fa’amaonia ai lana molimau.

I le taeao ananafi i luma o le maota o sui, na fa’afetaia ai e le ali’i faipule ia Fatulegae’e Mauga le alii kovana ma le faigamalo, ona o le tulaga matagofie ua i ai auala i le Falelima i Sasa’e.

O le iloiloga a le Komiti o Galuega Lautele a le maota o sui lea sa fuafua e faia i le vaiaso nei ma le Faatonusili ia Faleosina Voigt, ua le fa’ataunu’uina, ona o loo toesea le tama’ita’i fa’atonu, ae o le a fa’ataunu’uina i le vaiaso fou.

LOIA MO LE FONO FAITULAFONO

Ua toe talosagaina e le afioga i le ali’i senatoa ia Soliai T. Fuimaono le peresetene o le Senate ia Gaoteote Palaie Tofau, mo se avanoa e saili ai se isi loia fautua a le fono, e fesoasoani i le ali’i loia Samoa o loo i ai, ona ua faigata le tulaga ua i ai le soifua maloloina o le ali’i loia ia Henry Kapell o loo avea ma loia fautua a le Fono, ona ua matua fo’i le soifua o le ali’i loia.

Saunoa Soliai e faapea, o le fa’afitauli lea ua tula’i mai, ua tele pili ma i’ugafono o loo mana’omia le fia faia, ae ua tuai ona e le gafatia e le alii loia Samoa o loo i ai ona fai to’atasi le galuega, ae mana’omia se isi loia la te to’alua.

Saunoa Gaoteote e faapea, o loo galulue ai pea lona ofisa i le mataupu lea, ae o se mataupu e taua tele. Ina ua fa’atoa fesiligia e Soliai le mataupu lenei i le amataga o le tausaga, na saunoa ai Gaoteote, o le masina o Iulai o loo fa’amoemoe e taunuu ai le loia fou a le fono, peita’i o lea ua savalia Aokuso e le o i ai lava se loia.