FESILIGIA FAIPULE MAI MANU’A POLOKALAME O LE AMNESTY

O le vaiaso na te’a nei na talosagaina ai e le alii faipule mai Manu’a ia Vesi T. Fautanu le Komiti o Tulafono a le maota o sui, tauala atu i le Fofoga Fetalai o le maota, mo se avanoa se’i fesiligia ai le tulaga ua i ai le polokalame sa fa’atula’i e le ali’i kovana e fa’aleleia ai pepa nofomau o tagata mai fafo sa nonofo faasolitulafono i le teritori mo le tele o tausaga, le “Amnesty Program”.

Saunoa le ali’i faipule e fa’apea, ao fa’agasolo ai galuega mo le atina’eina o le malo i soo se itu, o le isi lea mataupu o loo to’atele le atunuu o loo fia malamalama i ai, o le polokalame a le Kovana mo tagata mai fafo sa leai i pepa nofomau, pe to’a fia ni tagata ua mae’a ona fa’aleleia a latou pepa nofomau, ae to’a fia fo’i ni isi ua le talia i le polokalame.

Saunoa atili le afioga i le ali’i faipule ia Vesi e fa’apea, o le taua o lenei mataupu, o le a maua ai le nofo silafia o le atunu’u atoa i auala uma o loo faagaioi ai le malo i soo se itu.

Na talia e le afioga i le taitai komiti ia Vui Florence Saulo le talosaga a le ali’i faipule ia Vesi, ma ia taloina ai loa le iloiloga e faia i le aso Lulu o le vaiaso nei i le itula e 8:30, lea o le a fesiligia ai tulaga uma o lenei mataupu.

O molimau ua valaauina mo le iloiloga e aofia ai le Loia Sili ia Talauega Eleasalo Ale, faapea ai le Pulesili o le Ofisa o Femalagaaiga ia Tamasa Dennis Lutu.

Saunoa atili Vui e faapea, ua leva ona ia mafaufau i le faia lea o se iloiloga mo lenei mataupu, peita’i ua talafeagai lelei ma le talosaga a le ali’i faipule.

MANA’OMIA E FAIPULE RIPOTI O TUPE

A o sauni atu ai le Fono Faitulaono mo lana iloiloga tu’u fa’atasi o le Paketi i se taimi o le masina nei, ua talosagaina ai e ni isi o faipule le tatau lea ona manino tulaga o tupe a le malo, ina ia mafai ai ona maua se silafia o le fono i le tulaga o le paketi.

Mo se fa’ata’ita’iga e pei ona saunoa le afioga i le ali’i faipule ia Larry Sanitoa, e tatau ona manino tulaga o tupe maua fa’alotoifale a le malo ua mafai ona ao mai, fa’atusatusa lea i tupe sa valaoia e tatau ona maua, ina ia mautinoa ai e le Fono le tulaga tonu o loo aga’i i ai le tamaoaiga o le malo.

Ae na taua e isi faipule, e tatau fo’i ona mautinoa e avanoa uma mai Faatonusili i le taimi o iloiloga o le paketi, ina ia taofia ai le fa’afitauli e masani ona tula’i mai, o le tuli mai lea o sui faatonusili pe a le avanoa le faatonusili.

Mo le maota maualuga a le Senate, na fa’ailoa e le afioga i le taitaifono o le Komiti o le Paketi a le maota maualuga ia Laolagi Fonoti Savali Vaeao e fa’apea, o se taimi o le vaiaso nei e tatau ona mautu atu ai le kalena mo le fa’ataotoina o iloiloga tu’ufa’atasi a le Fono.

I le tulaga o molimau, sa ia taua i luma o le maota le mae’a lea ona taoto se finagalo o le Fono i soo se taimi e iloiloina ai paketi a le malo, e le mafai ona molimau se sui faatonusili, se’i vagana o le fa’atonusili o le matagaluega e agava’a ona molimau, o ia fo’i lena e tatau ona maua mai ai e le Fono tali uma mo fesili e pei ona mana’omia.

FINAGALO SOLIAI E MALAGA SENATE TOE SAUNIGA AFIOGA SAOLE MILA

Na talosagaina e le afioga i le ali’i Senatoa mai le Itumalo o Ituau, le afioga i le Maopu ia Soliai T. Fuimaono le peresetene o le Senate ia Gaoteote Palaie Tofau, mo se avanoa e malaga uma ai le maota maualuga i toe sauniga o le uso a senatoa ua tuua le malo, le afioga i le Maopu ia Saole Mila, lea ua fa’amoemoe e lagomau i le aai o Seattle i Amerika.

Saunoa Soliai i luma o le maota maualuga i le taeao ananafi, e lei tupu muamua lava se mea faapenei i totonu o le maota, ae talitonu lona taofi, o se fa’aaloalo maualuga lea e tatau ona fa’ailoa e le peresetene ma afioga i senatoa, e fa’ailoa ai lo latou alofa i le mafutaga ma le uso a senatoa ua tuua le malo.

Sa ia faailoa foi i le maota e faapea, e ui ua savali i le lua vaiaso talu ona tuua le malo e le afioga a Saole, peita’i o le mea moni, e le o mavae ese lava le ao pogisa i luga o le maota, ona o loo mafatia ni isi o senatoa i le motusia fa’afuase’i o le mafutaga.

“O le talosaga atu lena i lau afioga i le ali’i peresetene, pe a tusa ai ma lou finagalo, tatou malaga uma i toe sauniga o le tatou uso a Senatoa, o lea fo’i ua maua i ripoti, e le o mumu le tupe a le Fono Faitulafono, o se tasi lea o itu lelei e fesoasoani ai i le fa’amoemoe e pei ona tatou taumafai atu i ai,” o le saunoaga lea a Soliai.

Na fa’afetaia e Gaoteote le finagalo malamalama o le afioga i le ali’i senatoa ia Soliai, ae i lona taofi, e le avea le tuumalo o le afioga ia Saole ma auala e sui ai faiga fa’avae a le maota i soo se taimi e tula’i mai ai fa’alavelave tuga faapenei i afioga i senatoa.

Na fa’amalulu Gaoteote ia Soliai pe afai ua le tali atu le laulau i sona fanoga, ae puipui fo’i o ia ina ne’i faitauina lana ta’ita’iga i ni fa’aiuga e faia ona o fa’alavelave fa’apenei.