TULAGA FAALETONU PEA FEMALAGAAIGA I MANU’A

Na tula’i le afioga i le ali’i faipule ia Toeaina Faufano Autele ma fa’aleo sona atugaluga o loo i ai, i le fa’aauau pea lea o tulaga fa’aletonu i le itu tau femalagaaiga i le va o Tutuila ma Manu’a.

Saunoa le ali’i faipule i luma o le maota o sui i le taeao ananafi, o loo faaauau pea tulaga pagatia o le itumalo, ona o loo fa’aletonu pea femalagaaiga i luga o le sami, ae le o lava fo’i malaga tau va’alele mo Manu’a.

Sa ia fa’ailoa i luma o le maota e fa’apea, o aso uma e tumu tumu ai tagata o le Itumalo i le malae va’alele i Tafuna, mo le tau sailiina o ni avanoa i le va’alele e malaga ai i Manu’a.

Mo le va’a o le MV Sili o loo tautuaina le itumalo o le Manu’atele, na taua e le ali’i faipule e fa’apea, e le o matua manino tonu le mafua’aga o loo tula’i mai ai le fa’aletonu i ana femalagaaiga, ma, ona o ia mafua’aga, na talosagaina ai loa e Toeaina le faia o se iloiloga ma le Fa’atonusili o le Ofisa o Uafu ma Taulaga a le malo, se’i tau fesiligia ai se tali o le fa’afitauli.

Ae na tula’i le sui ta’ita’ifono o le komiti o Fela’uaiga a le maota, o le isi fo’i faipule mai Manu’a ia Vesi T. Fautanu e fa’apea, e faigata ona fa’atulaga se iloiloga e fesiligia ai fa’afitauli o loo tutupu i le itumalo o Manu’a, ona o loo i ai pea i fafo le Fa’atonusili o le Matagaluega, le afioga ia Taimalelagi Dr. Claire Poumele.

Na fa’auilavea le Fofoga Fetalai ia Savali Talavou Ale ma fautua ia Vesi, e le avea le le avanoa mai o le Faatonusili ma auala e taofia ai galuega a le maota e tatau ona fai.

“O outou o ta’ita’i komiti a le maota, o outou o loo i ai le malosi e valaau ai iloiloga mo mataupu e mana’omia ona saili i ai se tali mo le atunu’u,” o le saunoaga lea a Savali, ma ia fautuaina ai loa Vesi e fa’atulaga se iloiloga.

O le taeao o le aso Lua o le vaiaso fou lea ua fa’atulaga ai le iloiloga mo lenei mataupu, lea fo’i ua fa’amoemoe e fesiligia ai le sui fa’atonusili o le matagaluega, pe afai o loo toesea pea le tama’ita’i fa’atonusili.

PASIA I’UGAFONO ALOAIA AI ‘AU TA’AALO AMERIKA SAMOA

Ua pasia nei e le Fono Faitulafono le i’ugafono malilie fa’atasi a le maota o sui, e ave ai le fa’afetai ma le fa’amalo i faiaoga ma ‘au ta’aalo uma sa fai ma sui o Amerika Samoa, i ta’aloga a le Olimipeka sa faia i Amerika i le masina nei, mo i latou e i ai manaoga fa’apitoa o le tino, faapea ai ma taaloga a le Pasefika i Papua Niu Kini i le masina na te’a nei.

I le tino o le iugafono e pei ona pasia e le maota o sui i le aso Lulu na te’a nei, a o le Senate i le taeao ananafi, o loo taua ai le avea o tulaga maualuga ma pine sa maua e ‘au ta’aalo a le atunu’u ma itu ua fa’aeaina ai Amerika Samoa i le lalolagi.

Na taua e le i’ugafono e fa’apea, o le tatalaina o avanoa e tausinio ai ‘au ta’aalo a Amerika Samoa i ta’aloga fa’avaomalo fa’apenei, o se auala lea e fesoasoani atili ai le atina’eina o soo se ta’aloga i totonu o le atunu’u.

E tasi le pine auro ma pine siliva e lua na maua e le tatou ‘au sa tausinio i ta’aloga a le Olimipeka mo i latou e i ai manaoga faapitoa o le tino ma le mafaufau, ae mo ta’aloga a le Pasefika, e 9 pine sa maua mai ai, ma isi pine e 5 sa maua mai i ta’aloga si’isi’i u’amea mamafa a le Oceania Weightlifting Championship, lea sa fa’atautaia uma lava i Papua i le taimi e tasi.