FA’ATOESE TOEAINA I LE MAOTA O SUI

O le vaiaso ua te’a na fa’aleo ai e le afioga i le ali’i faipule mai le itumalo o Manu’a #2 le agaga fa’amaualalo i luma o le maota o sui, ae fa’apitoa i le tama’ita’i faipule mai Leasina/Atiulagi ia Atalina Asifoa, ona o sana saunoaga sa lafo i luma o le maota i se taimi ua sola, lea na mafua ai ona manu’a le finagalo o le tama’ita’i faipule.

Saunoa Toeaina i luma o le maota, talu mai lava le taimi na tula’i mai ai lea mataupu i luma o le maota i le lua vaiaso talu ai, sa le’i maua se mapu i lona loto, ona o le manatu alofa i le maota aemaise ai le afioga i le tama’ita’i faipule na a’afia ona lagona i sana fa’amatalaga.

“O le mea moni lava le mamalu o le maota, e mama lava le agaga sa ou avatu ai le mataupu i lena aso, atonu sa faapea fo’i a’u o lo o sa’o lo’u manatu ae le iloa e sasi, o le mea lea ou te fa’atoese atu ai i le maota pe afai ua sese Toeaina i lo tatou va, ae fa’asilisili ai lava i le afioga i le tama’ita’i faipule ia Atalina, ua avea lava lenei tulafono ma mafua’aga ua toto ai le niu i lo ta va, ae o Toeaina lava ia e alofa fa’amaoni i lau afioga i le sui mamalu,” o le saunoaga lea a Toeaina.

Na tula’i fo’i le tama’ita’i faipule ia Asifoa ma ia fa’amalulu i le maota aemaise ai le afioga i le ali’i faipule ia Toeaina, ona o le mataupu sa tula’i mai i lena aso, peita’i i lona talitonuga, na uma lava se lagona sa ia te ia ina ua mae’a le aso na tula’i mai ai le mataupu.

“Pau le agaga ia te a’u, ia tatou maua pea le loto femagaloa’i ma le galulue fa’atasi,” o le saunoaga lea a Asifoa.

O le mataupu na tula’i mai i le lua vaiaso talu ai, ina ua tula’i Asifoa ma fa’atu le mau e teena ai le tala otooto a le maota, ina ua vaaia e le o aofia i totonu o le tala otooto saunoaga a Toeaina sa faia i le aso ua mavae.

Na taua e le tama’ita’i faipule ia Asifoa e faapea, i lona lava taofi, e foliga mai e fa’ailoga lanu le saunoaga a Toeaina e fa’atatau i le itupa o tama’ita’i, o le mafua’aga lena sa ia naunau ai ia tu’u i totonu o le tala otooto a le maota le saunoaga a le ali’i faipule mai Manu’a #2.

Ae na taua e Toeaina i le Samoa News e fa’apea, e ese lava le auala na mafua ai ona ia saunoa i le mataupu i le aso lea, ae le fa’apea e fa’ailoga lanu pe vaai fa’atauva’a fo’i o ia i le itupa o tama’ita’i.

PASIA TULAFONO AVEESE AI FA’ATAPULA’A TAUSAGA FA’AMASINO

Ua pasia nei e le Fono Faitulafono se pili sa fa’aulu i luma o le Senate, e aveese ai le fa’atapula’a o tausaga mo Fa’amasino Lagolago, lea e pei ona fa’atulafono i le 70 tausaga i le taimi nei.

O le tulafono la lea na fulisia i ai afioga i faipule e pasia, lea fo’i na pasia e le maota maualuga, o le a le toe fa’atapula’a ai i le 70 tausaga mo fa’amasino lagolago, ae o le a tu’u atu lava i le silasila a le Faamasino le taimi e fa’amuta ai le avea o se tasi ma Faamasino Lagolago.

Na taua e le Loia Fautua a le Fono ia Natanielu Savali i luma o le Fono ina ua fesiligia o ia i lenei tulafono, o le fa’afitauli o lo o i ai, o le tele o Fa’amasino Lagolago e tofia e fa’atinoina le galuega, e fetaui lava le o o atu i le taimi e amata ai ona latou galulue e fa’atino galuega fa’a Fa’amasino Lagolago, i le tuana’i ai lea o le lata i le 5 pe 6 fo’i tausaga o tau fa’amasani i tiute fa’a fa’amasino lagolago, ae ausia loa tausaga e 70 o lo o fai mai le tulafono e fa’amuta ai le toe avea o i latou ma fa’amasino lagolago.

Na taua e afioga i Senatoa, o le to’atele o i latou e tofia i lenei tofiga, tusa lava pe ova ma le ta’i 70 tausaga le matutua ae vaaia pea o lo o lava lo latou malosi e fa’atino ai le galuega, o lo o lava fo’i lo latou tomai i soo se vaega o le galuega.