Ads by Google Ads by Google

Tala otooto mai le Fono Faitulafono

ILOILOGA LONA LUA MATAUPU ‘1602’

O le itula e 8:00 i le taeao nei lea ua faamoemoe e faataunuu ai le iloiloga lona lua a le Komiti o le Faagaioiga o le malo. a le Senate, ma sui o le ASESRO (American Samoa Economy Stimulus and Recovery Office), e faatatau i le latou ulua’i ripoti, lea na lomia i le Samoa News i le lua vaiaso talu ai.

O le molimau ua fuafua le komiti e fesiligia i le taeao nei, o le alii pule o le Ofisa, susuga Pat Galea’i.

Sa i ai se talosaga mai ni isi o sui o le maota maualuga ina ia aami ma le tagata faigaluega sa tapenaina lenei ripoti, lea na liki mai i le Samoa News, ina ia maua ai le avanoa e fesiligia ai e Senatoa o ia i le mafuaaga o le liki atu o le ripoti i le nusipepa, peitai e le o manino mai i le taimi nei pe o aofia ai o ia i molimau o le a fesiligia e le komiti i le taeao nei.

Saunoa le afioga i le alii senatoa ia Galea’i Tuufuli, o le ulua’i ripoti a le ASESRO lea ua maea ona lomia i le Samoa News, e ono mafai ona avea ma itu e aafia ai le malo i le lumanai, ona o lo o aofia ai tulaga i faamaumauga tau tupe a le malo.

E talitonu ni isi o Senatoa, sa le tatau ona liki atu i tua kopi o lenei ripoti.

FESILIGIA FA’ATONUSILI E LE’I PASIA AE O LO’O GALULUE PEA

O le taeao ananafi na fesiligia ai e le afioga i le alii Senatoa ia Velega Savali Jr, le mataupu e uiga i ni isi o Faatonu Sili na tuuina atu e le kovana e faamaonia mai e le Fono, peita’i e le’i taliaina e le Fono, ae o lea o lo o faaauau pea ona avea ma faatonusili le tumau e oo mai lava i le taimi nei.

E lei taua e Velega suafa o tamaitai faatonu e toalua sa faatatau i ai lana saunoaga, sei vagana ai lona faapea mai, o le faatonusili o le Matagaluega o Aoga ma le Matagaluega o le Soifua Maloloina.

O le tamaitai ia Dr. Jacinta Galea’i na tofia e le kovana e avea ma faatonusili o Aoga, peitai na teena e le Fono, faapea ai foi ma Elizabeth Ponausuia lea foi na tofia e avea ma faatonusili o le matagaluega o le Soifua Maloloina, lea fo’i na teena faalua e le Fono.

Saunoa Velega, o lo o manino le tulafono, soo se faatonu sili e tofia e le kovana ae teena e le fono, e le tatau ona toe faaaoga e le matagaluega, ma e le mafai foi ona toe totogia o ia i le totogi o le faatonu.

“Ou te le ita i tamaitai faatonu ia e toalua, o ni tamaitai e agavaa i le galuega, peitai e tatau i le Fono ona mulimulitai i le tulafono leaga o le Fono o lo o fausia tulafono e mulimulita’i i ai le malo,” o le saunoaga lea a Velega i le Samoa News.

O se tasi o atugaluga e pei ona saunoa Velega, o lea ua maea ona molimau se tasi o faatonu o lo o faatatau i ai lana faamatalaga i luma o le komiti o le paketi i le vaiaso na te’a nei, peitai o le itu o lo o ia fesiligia, pe faamata o tusa ai ma le tulafono le molimau a lea tamaitai i luma o le fono.

O Ponausuia na molimau i le paketi a le Soifua Maloloina i le Aso Faraile na te’a nei.

Na tali fuaitau le alii peresetene o le Senate ia Gaoteote Palaie Tofau e faapea, o lo o manino le tulafono, soo se faatonu lava e teena e le fono, e le mafai ona toe faaaoga e le matagaluega, pe na te toe maua foi le totogi o le faatonusili.

MANAOMIA FAIPULE SE ILOILOGA FAAPITOA A LE FONO MO LE PAKETI

Na talosagaina e alii faipule ia Taotasi Archie Soliai ma Larry Sanitoa i le taeao ananafi komiti tuufaatasi a le Fono, mo se avanoa e faia ai se iloiloga faapitoa a le Fono, e faatatau i le mataupu e uiga i tupe o lo o fuafua le malo e faatupe mai ai lana paketi o le tausaga tupe fou 2013.

Saunoa Taotasi e faapea, o lea ua manino i le molimau a le loia sili a le malo, o le $6.8 miliona lea ua valoia e le malo, o le isi lea alagatupe e faatupe ai lana paketi mo le tausaga tupe fou, ua maea ona faatulaga e totogi ai le nonogatupe a le malo o lo o i le Ofisa o le Initeria.

Na taua e Taotasi e faapea, o lona popolega o lo o i ai, e le gata o lo o feteenai molimau a le malo e uiga i tupe maua mo le tausaga tupe fou, ae e le o mautinoa foi e molimau tulaga tonu e uiga i tupe maua nei.

Na lagolagoina e Sanitoa le finagalo o Taotasi ma ia taua o le isi tulaga lea ua maua e le fono mai molimau a le malo, e na o le $250,000 le tupe mai le siitaga o lafoga e 2% na pasia e le Fono, ua maea ona totogi atu e faatumu ai le nonogatupe e $3 miliona mai le Teugatupe mo Tagata Faigaluega a le malo, lea na pasia e le Fono e ave mo le falemai o le LBJ i le tausaga na te’a nei.

Saunoa Sanitoa, o lo o manino le tulafono, o masina uma lava e tatau ona tuu atu ai e le malo tupe uma e maua mai i le lafoga o totogi e 2% e faatumu ai le nonogatupe mai le Teugatupe mo Tagata Faigaluega a le malo, ae foliga mai e le o mulimulita’i le malo i lea tulaga.

Na lagolagoina e le taitaifono o le komiti o le paketi a le Senate ia Lemanu Peleti Mauga finagalo o alii faipule, peitai e lei faatulagaina mai se aso mo le iloiloga e pei ona talosagaina e alii faipule.