JOON SUN PARK

O le taeao nei lea ua faamoemoe e tula’i ai i luma o le fa’amasinoga maualuga le ali’i Asia lea o lo o tu’uaia i lona fa’ao’olima lea i sana uo Asia fo’i, ina ua ia manatu e aua le fa’ataunu’uina lana ulua’i iloilosa sa fa’atulaga e faia i luma o le fa’amasinoga fa’aitumalo ananafi, ae tu’u sa’o atu loa lana mataupu e fa’aauau i luma o le fa’amasinoga maualuga.

O le ali’i loia fautua ia Marcellus T. Uiagalelei o lo o avea ma fautua a le ali’i o Joon Sun Park na fa’aleoina le fanoga a le ua molia e fa’aagafua lana ulua’i iloiloga, lea fo’i e le i tete’e i ai le loia a le malo.

O lo o tu’uaia Park i le moliaga mamafa o le fa’ao’olima i le tulaga lua, atoa ai ma le moliaga mama o le fa’atupu vevesi i nofoaga faitele, ona o le fa’alavelave lea na tula’i mai i le aso 12 Fepuari 2014 i le fale kalapu o le Karaoke Bar i Satala, lea na ia fa’aoolima ai i lana uo Asia, ina ua fautuaina o ia e lana uo e aua le ulaula i totonu o le fale kalapu.

LIO TULI

O le ali’i mai Pago Pago lea na fufusu ma le to’alua a lona tuafafine atoa ai ma lona tu’iina o lona tuafafine a o ona, ua nofovaavaaia mo le 6 masina i lalo o poloaiga a le fa’amasinoga e ao ona usita’i i ai.

Ina ua fesiligia e le ali’i fa’amasino ia John L. Ward II le ali’i o Lio Tuli i le taimi muamua, sa la fufusu ma le to’alua a lona tuafafine i le po o le aso 7 Mati 2014 i Pago Pago, fa’apea ai ma lona tu’iina o le mata taumatau a lona tuafafine ma manu’a ai, na tali le ua molia ioe, o lo o ia manatuaina mea uma sa ia faia i le po lea.

Ae ina ua tuu atu ai le avanoa e le fa’amasinoga mo sana fa’atoesega a o le i tuuina atu lana fa’asalaga, na toe teena uma ai e Tuli tu’uaiga e faapea sa la fufusu ma le toalua a lona tuafafine, na te le i tu’iina fo’i lona tuafafine.

E le i mana’o fo’i le ua molia e fa’atoese i le fa’amasinoga ina ua maua lona avanoa e fai ai sana fa’amatalaga fa’ai’u.

E fa aso na loka ai Tuli i le toese i Tafuna e fa’atali ai le lauina o lona fa’asalaga i le taeao ananafi, ma manatu ai loa le fa’amasinoga, ua lava aso e fai ia na loka ai o ia i le toese e avea ma ana fa’asalaga i lenei mataupu, ae o le a nofovaavaaia o ia mo le 6 masina, ina ua ta’usala o ia i le moliaga mama o le fa’atupu vevesi i totonu o lona aiga i lalo o se maliliega sa latou sainia ma le malo ma talia e le faamasinoga.

I le talia ai fo’i e le fa’amasinoga o le maliliega, na solofua ai loa e le faamasinoga ma moliaga mama sa totoe ai i le pepa o tagi na ulua’i fa’aulu e le malo.

O isi tuutuuga o le nofovaavaaia a Tuli e aofia ai lona totogiina o le salatupe e $50, aua nei ona toe tagofia le ava malosi, a ia auai i ni aoaoga fesoasoani ai i aafiaga o le ava malosi o lo o aafia ai o ia.

E 15 aso na manatu le faamasinoga e loka ai Tuli i le toese, peitai o le a faamalumalu lona tuliina o aso e 11, ae ua lava aso e 4 na taofia ai o ia e fai ma ana faasalaga.

CHUNG SE LEE

Ua talia e le fa’amasinoga maualuga le isi talosaga na fa’aulu e le loia fautua a Chung Se Lee, ina ia toe fa’amatu’u atu e le fa’amasinoga pepa o le ta’avale lea na tatala ai i tua le ali’i o Lee e fa’atalitali ai le aso e lau ai lona fa’asalaga, ae le i taliaina le isi talosaga ina ia tatala o ia i tua mai le toese se’i alu e pu’e lona ata ID i le ofisa o Femalagaaiga.

O Lee o lo o tuli sona fa’asalaga fa’a falepuipui e tasi le tausaga i le toese i Tafuna, ina ua ta’usala o ia i le moliaga o le fa’atamala ua mafua ai ona  maliu se tamaititi e 5 tausaga le matua, lea na ia so’aina i lana ta’avale i le masina o Novema 2013 i Nuuuli.

O le talosaga a Lee na fa’aleoina lea e lana loia fautua ia Matailupevao Leupolu Jr, ina ua ia talosagaina se avanoa e tatala ai le ua molia e alu i le Ofisa o Femalagaaiga se’i pu’e le ata o lona ID, ae na tali le ali’i fa’amasino sili e fa’apea, talu ai o Lee lea o lo o i lalo o le va’ava’aiga a le malo, lona uiga o le malo fo’i e faia le fa’aiuga e fa’atatau i le auala e pu’e ai le ata o le ID a le ali’i pagota, e pei o le alu o se tagata faigaluega a le Ofisa o Femalagaaiga i le falepuipui e pu’e mai le ata o Lee, po o se isi lava fo’i auala e uia.