TEROA FALETOI

O le tina talavou lea na taumafai e ave fa’anana ni sikaleti mariuana i lona to’alua o lo o tuli sona fa’asalaga fa’a falepuipui i le toese i Tafuna, ua mae’a nei ona sainia se latou maliliega ma le malo, ma ua fa’amoemoe o Me 27, 2014 o le a fofoga aloaia ai loa vaega o lenei maliliega i luma o le fa’amasinoga maualuga.

O ananafi na fa’atulaga ai le isi iloiloga a Teroa Faletoi i luma o lana afioga i le ali’i fa’amasino sili ia Michael Kruse, peita’i na fa’ailoa i ai e le tama’ita’i loia fautua o lo o tula’i mo Faletoi ia Karen Shelly i luma o le fa’amasinoga e fa’apea, ua mae’a ona sainia e le ua molia le ofa sa tu’uina atu i ai e le malo, ma ua ia sauni fo’i e sui lana tali tete’e o lo o i ai i le tali ioe.

A o le i tolopo le mataupu a Faletoi mo le vaiaso fou, na saunoa le ali’i fa’amasino sili e fa’apea, “e le fou foliga o le ua molia i le silasila a le fa’amasinoga.”

O lo o tu’uaia e le malo ia Faletoi i le moliaga mamafa e tasi o lona umia fa’asolitulafono lea o vaega o le laau fa’asaina o le mariuana.

O lea moliaga na alia’e mai ina ua alu le ua molia e asi lona to’alua o Sam Tupuola o lo o loka i le falepuipui, ae maua ai e le leoleo o le Falepuipui se mea o lo o i totonu o le isi se’evae o le pea se’evae na alu atu ma le ua molia, o lo afifi i se pepa foil.

O lo o taofia pea Faletoi i le toese i Tafuna e fa’atali ai le aso lea ua fa’atulaga e toe tula’i ai i luma o le fa’amasinoga.

IOANE TAVITA FILIPO

O le ali’i lea lea sa tuuaia e le malo na maua i ai ni sikaleti mariuana se lua ina ua toe fo’i i totonu o le toese, ua ia ta’utino i le fa’amasinoga e moni tu’uaiga fa’asaga ia te ia, i lalo o se maliliega na latou sainia ma le malo ma talia e le fa’amasinoga maualuga i le taeao ananafi.

I le tali ioe ai o le ali’i o Ioane Tavita Filipo i le moliaga mamafa e tasi lea ua ta’usala ai o ia e le fa’amasinoga maualuga, sa ia ta’utino ai e fa’apea, i se taimi o le aso 31 Tesema 2013 ina ua toe fo’i i totonu o le toese, talu mai le taimi na tatala ai o ia e alu e faigaluega ma tuli lona fa’asalaga, sa ia umia fa’asolitulafono ai ni sikaleti mariuana se lua i se auala e le tusa ma le tulafono.

Na ta’utino Filipo e fa’apea, e lua sikaleti mariuana sa tago ma nana i totonu o le taga o lona ofuvae sa fai, lea na maua e se alii leoleo o le falepuipui i le taimi na su’e ai lona tino.

Ua malilie loia e finau i le fa’amasinoga mo se fa’asalaga mama mo le ua molia. O Filipo na fa’asala e le fa’amasinoga Fa’aitumalo i le tausaga na te’a nei na te tuliina aso e 90 i le toese, ina ua ta’usala o ia i le moliaga o le ave ta’avale a o se’i lona laisene.

O lo o taofia pea Filipo i le toese e fa’atali ai le aso 27 Iuni lea ua fa’atulaga e lau ai lona fa’asalaga.

NOFOVAAVAAIA LE ALI’I GAOI

O le ali’i e 32 tausaga le matua lea na ia gaoia ni fagupia mai totonu o se faleoloa a se ali’i Asia i Tafuna i le masina o Mati 2014, ua nofova’ava’aia e le fa’amasinoga fa’aitumalo mo le 12 masina i lalo o poloaiga e ao ona ia usita’i i ai.

O ni isi o poloaiga ua tu’uina atu e le fa’amasinoga i le ali’i o Fred Pulemau e aofia ai lona totogiina o le tupe e $5.50 mo fagupia Vailima lapopo’a e lua na ia gaoia, totogi le salatupe e $175, ma ia aua fo’i ne’i ona toe soliina se isi tulafono a le malo.

Na fa’atoese Pulemau i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia. Sa ia fa’atoese fo’i i le ali’i Asia e ana ia le faleolo ana a’afia, ina ia fa’amagalo sona sese sa faia.

Na tu’uaia e Pulemau le ova o lona ‘ona o le mafua’aga o lea o le solitulafono, peita’i na taua e le ali’i fa’amasino ia John L. Ward II e fa’apea, e mafua ona sese fa’aiuga fai a le tagata ona ua filogia lona mafaufau ma le ‘ava malosi, ma e ui fo’i o le ‘ava malosi o se fualaau oona e fa’ataga ona tagofia e tagata, o le mea moni lava ia e matua tele le a’afiaga o lona mafaufau mai lona tagofia so’o o le ‘ava malosi.