VAIMOLI ALOAU

O le ali’i e 44 tausaga le matua mai Savai’i lea na tu’uaia e le malo i lona faia o ni uiga mataga i se teineititi e 5 tausaga le matua, ua ia ta’utino i luma o le fa’amasinoga maualuga i le taeao ananafi, e fa’amaonia tu’uaiga fa’asaga ia te ia.

E tolu moliaga na ulua’i tu’uaia ai e le malo le susuga a Vaimoli Aloau. O ia moliaga e aofia ai le moliaga pito mamafa o le faia o amioga mataga i se alualu toto ‘child molesting’, lea e mafai ona soloatoa ai se tasi i le toese, pe fa’asala fo’i i le fa’asalaga fa’afalepuipui e amata atu i le 10 tausaga ae le silia ma le 30 tausaga; o le moliaga o le faia o amioga fa’afeusuaiga fa’a sotoma, faapea ai ma le moliaga mama o lona faia o ni gaioiga e ono lamatia ai le saogalemu o fanau laiti.

Ae i lalo o se maliliega na sainia e Aloau ma le malo ma ua talia fo’i e le fa’amasinoga, sa ia tali ioe ai i le moliaga fou lea na toe fa’aopoopo e le malo, le solitulafono o le tagofia lea o itutinosa o se teineititi e laititi i lalo o le tulafono.

I le tali ioe ai o Aloau i le moliaga fou, sa ia tautino ai e fa’apea, i le va o le masina o Oketopa e o o atu i le aso 28 Novema 2013, sa ia tagofia ai itutinosa o se teineititi e 5 tausaga le matua.

Ina ua talia e le fa’amasinoga le tali ioe a Aloau, sa talosaga loa le malo i le fa’amasinoga ina ia solofua uma moliaga e tolu o lo o totoe ai i le pepa o tagi sa latou fa’aulu fa’asaga i lenei mataupu.

O se tasi o tuutuuga o le maliliega ua sainia e le ua molia ma le malo, ua malie ai Aloau o le a ia tuua le teritori o Amerika Samoa ae toe fo’i atu i lona atunuu na sau ai, pe afai e uma ona tuli sona fa’asalaga fa’a falepuipui e tu’uina atu e le fa’amasinoga.

O lo o taofia pea le ua molia i le toese i Tafuna e fa’atali ai le aso 11 Iulai lea ua fa’atulaga e lau ai lana fa’asalaga.

ERIC NAIULI

Ua talia e le fa’amasinoga maualuga se talosaga na fa’aulu e le loia o lo o tula’i mo le malo i le taeao ananafi, e toe fa’aauau le uluai iloiloga o le mataupu fa’asaga i le susuga a Eric Naiuli, ona o lea ua i ai le moliaga fou ua faila e le malo fa’asaga ia te ia.

Ina ua valaau le mataupu a Naiuli i luma o le ali’i fa’amasino sili ia Michael Kruse, na saunoa ai le loia a le malo o Tony Graf e fa’apea, o le aso ananafi na failaina ai le isi moliaga fou fa’asaga i le ali’i ua molia, ina ia fa’ailoa ai le solitulafono mamafa o le ‘fa’atamala fa’aletulafono ua mafua ai ona o o le maliu i se isi tagata,’ ina ia suia mai ai i le moliaga mamafa o lo o tu’uaia ai o ia i le taimi nei, le solitulafono o le fa’ao’olima i le tulaga lua.

Na fesili Kruse ia Graf pe aisea ua toe faia ai lenei suiga i le pepa o tagi na latou ulua’i fa’aulu fa’asaga ia Naiuli, ae na tali le loia a le malo e fa’apea, talu ai o lea fa’atoa mae’a le taotoga sa faia e se foma’i fa’apitoa e iloilo ai le mafua’aga o le maliu o le tagata na a’afia, o le mafua’aga lena ua toe sui ai le moliaga fa’asaga i le ali’i o lo o tu’uaia.

O lo o taofia pea Naiuli i le toese i Tafuna e fa’atali ai le aso 3 Novema 2014 lea ua fa’atulaga e faia ai lana fa’amasinoga autu e fa’atatau i lenei mataupu.

O se fa’alavelave na tula’i mai i Vatia i le amataga o le tausaga nei lea na i’u ai le soifua o se ali’i, o lo o mafua ai ona tu’uaia Naiuli e le malo i lenei mataupu, ma o lo o teena malosi e le ua molia tu’uaiga uma fa’asaga ia te ia, e pei ona fa’aalia e lana loia fautua ia Marcellus Tala Uiagalelei.

TOGIASO FILIPO

O ananafi na faila ai e le malo le moliaga mamafa o le ave ta’avale a o se’i lona laisene fa’asaga i le ali’i o Togiaso Filipo, e mafua mai i le fa’alavelave tau ta’avale lea na tula’i mai i le masina na te’a nei i Iliili, ina ua fetoai le ta’avale na ave e le ua molia ma se isi ta’avale.

I fa’amaumauga a le fa’amasinoga na taua ai e fa’apea, ina ua tula’i mai le fa’alavelave, sa sola ese le ua molia mai le vaega na tula’i mai ai le fa’alavelave, e ui sa ia iloa lelei lava, o lona sese na mafua ai ona tula’i mai le fa’alavelave.

Ina ua maua e leoleo le ua molia ma fesiligia i lenei mataupu, sa maua ai loa na mafua ona sola ona o lo o se’i e le fa’amasinoga lona laisene ave ta’avale mo le 6 masina, e mafua mai ina ua fa’amaonia le moliaga mama o le ave ta’avale ‘ona sa tu’uaia ai o ia e le malo.