KIRIATA TUIOTI LOKENI

O le tama matua lea na tuuaia e le malo i lona faia o ni uiga mataga i se tama’ita’i, ua solofua e le fa’amasinoga maualuga moliaga fa’asaga ia te ia.

O le vaiaso na te’a nei na fa’aleaoga ai e le fa’amasinoga maualuga moliaga sa faia fa’asaga ia Kiriata Tuioti Lokeni.

Na taua e le loia a le malo ia Tiffany Oldfield i lana talosaga e fa’apea, talu ai ua le mafai e le malo ona saili le molimau autu o lenei mataupu, o le mafua’aga lea ua talosagaina ai e le malo le fa’amasinoga ina ia solofua tu’uaiga fa’asaga ia Lokeni.

NOFOVAAVAAIA LE ALI’I NA FA’AO’OLIMA LONA TO’ALUA

O le ali’i lea na ta’usala e le faamasinoga maualuga i le moliaga o le faaoolima i le tulaga tolu, ona o le faalavelave lea na ia faaoolima ai i lona to’alua, ua nofovaavaaia mo le 12 masina i lalo o poloaiga a le faamasinoga maualuga.

O ni isi o ia poloaiga e aofia ai le faasa lea ona ia toe faaoolima i lona toalua, pe na te toe faia ni gaioiga e faafefe pe faamata’u ai o ia. Ua faasaina fo’i ona ia toe tagofia le ava malosi poo fualaau faasaina, a ua poloaina o ia ina ia auai i ni aoaoga fesoasoani ai i le tulaga o le ita.

Na faatoese le ua molia i le faamasinoga e tusa ai o lana solitulafono sa faia, ma ia talosagaina ai se isi avanoa mo ia. Sa ia fa’atoese fo’i i lona to’alua na a’afia, lea fo’i sa i ai i totonu o le potu fa’amasino ina ia fa’amagalo sona sese i lo la va.

O le vevesi na tulai mai ina ua ita le ua molia i lona to’alua, ma ia fa’aoolima ai ia te ia e ala i lona ta tui o ona foliga ma toso lona lauulu.

Na tu tu faatasi loia e talosaga i le faamasinoga ina ia faanofovaavaaia le ua molia, ma ia poloaina fo’i o ia e auai i ni aoaoga e fesoasoani ai i le tulaga o le ita.

COLIN BODE

O le ali’i lea na tu’uaia e le malo i lona umia fa’asolitulafono o vaega o le laau fa’asaina o le mariuana, ina ua malaga mai i le va’alele o le Hawaiian Air i le tausaga ua te’a, ua ia ta’utino i luma o le fa’amasinoga e fa’amaonia tu’uaiga fa’asaga ia te ia.

I le tali ioe ai o Colin Bode i le moliaga e pei ona ia ioeina i luma o le fa’amasinoga maualuga, sa ia tautino ai e fa’apea, i se taimi o le aso 7 Mati 2013 ina ua malaga mai i le Hawaiian Air, sa ia umia fa’asolitulafono ai vaega o le laau fa’asaina o le mariuana, ma o lana gaioiga sa faia sa le tusa lea ma ala o le tulafono.

O le moliaga lea ua tali ioe ai Bode, e mafai ona fa’asala ai o ia i le toese i Tafuna mo le umi e le itiiti ifo i le 5 tausaga, e le sili atu fo’i ma le 10 tausaga, po o le fa’asala i se faasalaga tupe e le itiiti ifo i le $5,000, ae le sili atu i le $20,000.

Na fesili le ali’i fa’amasino sili ia Michael Kruse i le ali’i ua molia, pe na te iloaina le fa’asalaga e mafai ona fa’asala ai o ia e le fa’amasinoga i le moliaga lea ua ia tali ioe i ai, e le itiiti ifo i le 5 tausaga, na tali le ua molia, “ioe, ua ia malamala i ai.”

Ua taoto atu nei i se faaiuga a le faamasinoga le tali ioe a Bode i le moliaga e pei ona ia tali ioe ai, ae ua poloaina e le faamasinoga se ripoti mai le ofisa nofovaavaaia, e faatatau i le tele o vaega o le laau faasaina o le mariuana sa maua i le ua molia.

O le aso 15 Aokuso lea ua toe tolopo i ai le iloiloina o lenei mataupu, ma o lo o tumau pea poloaiga a le faamasinoga o lo o tatala ai Bode i tua e faatali ai le aso lea ua faamoemoe e toe tulai ai i luma o le faamasinoga.