Ads by Google Ads by Google

Tala otooto o Fa’amasinoga

ERIC NAIULI

 

O le masina o Iulai lea ua fa’atulaga e toe fofogaina ai le mataupu a le ali’i o Eric Naiuli po o Eliki Naiuli i luma o le fa’amasinoga maualuga, i le mae’a ai lea ona ia teena o tu’uaiga fa’asaga ia te ia i luma o le fa’amasinoga i le taeao ananafi.

 

O le masina o Aperila na te’a nei na ulua’i faila ai e le malo le moliaga mamafa o le fa’ao’olima i le tulaga lua fa’asaga ia Naiuli, ona o le fa’alavelave lea na manu’a ai se ali’i mai Afono, mulimuli ane maliu ai lava i le falema’i i Fagaalu, i le tuana’i ai o vaiaso e lua talu ona taofia i le falema’i.

 

Ae ina ua toe valaauina le isi iloiloga o le mataupu a Naiuli i luma o le fa’amasinoga maualuga i le vaiaso na tea nei, na fa’ailoa ai loa e le malo le mae’a lea ona latou toe failaina o le moliaga fou fa’asaga ia te ia, ina ua fa’amaonia le maliu o le ali’i na a’afia i lenei mataupu, ma molia ai loa Naiuli i le moliaga fou o le fa’atamala fa’aletulafono ua mafua ai ona oo le maliu i se isi tagata.

 

O lo o tu’uaia e le malo Naiuli i lona tu’iina lea o foliga o le ali’i ua maliu ma pau ai i lalo, ma tau ai lona ulu i le auala.

 

O lo o taua i fa’amaumauga a le malo e fa’apea, o le ali’i ua maliu na taumafai e vaovao se vevesi na tula’i mai i le va o le ali’i ua molia ma se isi ali’i, e mafua mai i ni fagupia, ae na taua e isi molimau e fa’apea, na avea le kola e le ali’i ua maliu o le ua o le ofu a le ua molia ma itu na ita ai o ia ma tula’i mai ai loa le fa’alavelave.

 

Na taua e le loia a le malo ia Tony Graf i luma o le fa’amasinoga e fa’apea, o le moliaga fou lea ua faila, e afua mai ina ua mae’a le suesuega sa faia i le mafua’aga o le maliu o le ali’i na a’afia, ma iloa ai na maliu o ia ona o manu’a sa a’afia ai lona ulu.

 

O lo o taofia pea i le toese i Tafuna le ua molia e fa’atali ai le aso 14 Iulai lea ua fa’atulaga e toe valaau ai lana mataupu.

 

MISI ITI

 

O le ali’i lea na tu’uaia e le malo i lona umia fa’asolitulafono o fualaau fa’asaina, ina ua maua e lona to’alua i totonu o lona ofuvae, ua ia tautino i le fa’amasinoga e fa’amaonia tu’uaiga fa’asaga ia te ia.

 

I le tali ioe ai o Misi Iti, 35 tausaga le matua i le moliaga muamua lea ua toe teuteu e le malo, ina ia fa’ailoa ai le solitulafono o le umia fa’asolitulafono o vaega o le pauta fa’asaina o le aisa, na ia ta’utino ai i le taeao ananafi e fa’apea, i se taimi o le aso 15 Fepuari 2014 i Amanave, sa ia umia fa’asolitulafono ai vaega o le pauta fa’asaina o le aisa.

 

Na tautino Iti e fa’apea, i le aso e pei ona taua, sa maua ai e lona to’alua i totonu o le taga o lona ofuvae sa fai se atigi fagu fualaau, sa i ai se straw ua uma ona tipi le tulimanu, ma i totonu o le straw sa i ai vaega o le pauta fa’asaina o le aisa ua uma ona utu i ai.

 

Na ioe fo’i le ua molia e fa’apea, ina ua fesiligia e lona to’alua o ia e tusa ai o le straw lea o lo o i ai vaega o le pauta fa’asaina o le aisa, sa ia tali ioe i ai, o ia e ana mea ia.

 

Na fa’ailoa e le loia a le malo ia Tony Graf i luma o le fa’amasinoga e fa’apea, o vaega o le fualaau fa’asaina sa maua ia Iti, o vaega e fa’aaoga mo ia lava.

 

O lo o taofia pea le ua molia i le toese i Tafuna e fa’atali ai le aso 27 Iuni lea ua fa’atulaga e lau ai lona fa’asalaga.