NUUSILA SUANI JR

O le masina fou lea ua fa’atulaga e lau ai le fa’asalaga o le ali’i o Nuusila Suani Jr, ina ua ta’usala o ia i le moliaga mamafa o lona umia fa’asolitulafono lea o vaega o le fualaau fa’asaina o le mariuana, ma le fa’amoemoe e tulei ma fa’atau atu i isi tagata, ina ua talia e le fa’amasinoga maualuga i le aso Faraile na te’a nei sa latou maliliega na sainia ma le malo.

O Suani Jr na ulua’i tu’uaia i moliaga mamafa e lua, o lona umia fa’asolitulafono o mariuana ma le fa’amoemoe e tulei ma fa’atau atu i isi tagata, ma le moliaga o lona umia fa’asolitulafono o mariuana.

Ae i lalo o le maliliega na latou sainia ma le malo, ua ia tali ioe ai i le moliaga e pei ona ta’usala ai o ia, ae solofua le isi moliaga o lo’o totoe.

I le tali ioe ai o Suani Jr, 36 tausaga le matua, sa ia ta’utino ai e fa’apea, i se taimi o le aso 8 Oketopa 2013, sa ia umia fa’asolitulafono ai vaega o le fualaau fa’asaina o le mariuana.

Na ta’utino Suani Jr e fa’apea, i le aso e pei ona taua, sa alu ai i le Ofisa o le Tiute i luga o le Uafu ma le fa’amoemoe e piki mai ai ni kalone eena se lua o lo o tusia ai i luga o tapuni o ia kalone eena e lua lona igoa.

Ina ua taunuu atu i le Ofisa o Tiute, sa fa’ailoa ane loa e ali’i Ofisa o le Tiute ia te ia, o kalone o lo o alu atu e piki mai o lo o masalomia le i ai i totonu o ni fualaau fa’asaina.

Na malie Suani Jr e siaki e ali’i Ofisa totonu o kalone, ma ina ua sailia e ali’i Ofisa kalone nei, sa maua ai loa i totonu ni afifi o lo o i ai vaega o le fualaau faasaina o le mariuana, ma o ia mariuana e pei ona faailoa e le ua molia i ali’i Ofisa o le Tiute, o mea sa ia teuina i totonu o kalone ao i ai o ia i fafo.

Ina ua fesiligia e le ali’i fa’amasino sili ia Michael Kruse ia Suani Jr po o fea o fafo na ia teuina ai fualaau fa’asaina nei i totonu o ana kalone, na tali le ua molia, o Kalefonia, na toe fesiligia o ia po o le a le tele o vaega o fualaau faasaina sa i totonu o kalone, na tali le ua molia, “e 6 ma le 1/2 pauna le mamafa”.

O le moliaga o le umia fa’asolitulafono o vaega o fualaau faasaina o le marijuana ma le fa’amoemoe e tulei ma fa’atau atu i isi tagata, e mafai ona fa’asala ai se tasi i le toese mo le umi e le sili atu i le 20 tausaga, pe fa’asala fo’i i se fa’asalaga tupe e le silia ma le $20,000, pe fa’asala fo’i i fa’asalaga uma nei e lua.

TIMOTHY NOA

O le alii lea na manatu le fa’amasinoga e fa’a sala i le toese i Tafuna mo le umi e 22 tausaga, ua poloina nei o ia e le fa’amasinoga maualuga na te tuliina masina e 28 i le falepuipui, o se tasi lea o tu’utu’uga o lana nofova’ava’aia e 7 tausaga, ina ua ta’usala o ia e le fa’amasinoga i moliaga mamafa e fa.

O moliaga mamafa na ta’usala ai e le fa’amasinoga le ali’i o Timothy Noa e aofia ai le talepe fale i le tulaga lua; tete’e atu i leoleo ao taumafai e pu’e fa’apagota o ia; faaoolima; ma lona taofia fa’apagota o se tagata i se auala fa’amalosi.

O tu’uaiga fa’asaga ia Noa na alia’e mai ina ua logo e lona to’alua ia leoleo mo se fesoasoani, ina ua faaoolima le ua molia ia te ia amata mai lava i le taeao seia o o atu i le po, sa taua fo’i e le molimau i leoleo le pisapisao solo o le ua molia i tafatafa o latou aiga tuaoi e ala i lona lafo o upu mataga, faapea ai ma lona folafola o lona fasiotia o ia (to’alua) pe afai ae loka o ia e leoleo.

O ni isi o tuutuuga o le nofovaavaaia a Noa e aofia ai le fa’asa lea ona ia toe taumafai e fa’afesoota’i lona to’alua ma lana fanau i so o se auala, aua nei ona toe solia se tulafono, a ia avea o ia ma tagatanuu lelei e tausisi i tulafono uma a le malo.

O le afioga i le ali’i fa’amasino sili ia Michael Kruse na iloiloina le fa’asalaga o le ua molia, fa’atasi ai ma le lagolagosua a afioga i ali’i fa’amasino lagolago ia Logoai Siaki ma Fa’amausili Pomele.