Ads by Google Ads by Google

Tala otooto o Fa’amasinoga

LINDA TALIMATASI

 

E 26 tausaga o se tama’ita’i ua tu’uaia nei e le malo i le moliga mamafa o le fa’ao’olima i le tulaga muamua, e mafua mai i le fa’alavelave lea ua tu’uaia ai nei o ia, i lona fa’aaoga lea o se naifi e tatui ai le ulu o se isi tama’ita’i e 26 fo’i tausaga le matua o Malaeimi i le fa’aiuga o le vaiaso na te’a nei.

 

E ese mai i le moliaga mamafa lea ua faia fa’asaga ia Linda Talimatasi, o lo o tu’uaia fo’i o ia i moliaga mama e lua o le fa’atupu vevesi i nofoaga faitele atoa ai ma lona faia o ni gaioiga e ono lamatia ai le saogalemu o fanau laiti.

 

O lenei mataupu na tofu atu i le ofisa o leoleo i le aoauli o le aso To’ona’i na te’a nei, 21 Iuni 2014, ina ua logo e se sui mai le falema’i o le LBJ le Ofisa o leoleo mo se fesoasoani, ona o se tama’ita’i na fa’anatinati atu i le falema’i ma ni manu’a tuga i lona ulu.

 

Na taua e le tama’ita’i na a’afia i leoleo e fa’apea, o le fa’alavelave na tula’i mai ina ua alu atu Linda ma le isi tama’ita’i e igoa ia Fitopau ma fasi o ia i totonu o lona fale a’o moe.

 

Sa ia taua fo’i i leoleo e fa’apea, na taofi e Fitopau i lalo lona ulu ae oti e Talimatasi lona lauulu i se seleulu, atoa ai ma lona ta tuiina o lona ulu i se naifi, ae fetaui lava lona au tilo a’e i luga ae ona vaaia loa ia Fitopau ua ia po fa’atolu le gutu o lana tama teine e 7 tausaga ma tuli ese mai le vaega o lo o fasi ai o ia.

 

E le i maua e leoleo ia Talimatasi i le aso lea, ae ina ua toe asia lona aiga i le taeao o le aso Sa na sosoo ai, 22 Iuni pe tusa o le itula e 7:40, na maua atu ai e leoleo le ua molia i lona fale i Canco Hill.

 

Ina ua fesiligia e leoleo ia Talimatasi e tusa ai o lenei mataupu, sa ia ioeina ai lona alu na o ia i le fale o le tama’ita’i na a’afia ma oti lona lauulu, atoa ai ma lona ta tuiina o ia i le naifi.

 

O lo o tau sailia pea e leoleo ia le tama’ita’i o Fitopau lea o lo o taua sa i ai ma Talimatasi i le taimi na tula’i mai ai le fa’alavelave.

 

MALAKI FERETI

 

O le vaiaso na te’a nei na faila ai e le malo le moliaga mamafa o le ave ta’avale ao se’i le laisene fa’asaga ia Malaki Fereti, ona o le fa’alavelave lea na maua ai o ia e leoleo i le lua vaiaso talu ai i Tafuna, o lo o ia fa’afoeina se ta’avale ae o lo o se’i lona laisene ave ta’avale mo le 6 masina, ina ua ta’usala e le fa’amasinoga faaitumalo o ia i le moliaga mama o le ave ta’avale ‘ona.

 

O tuuaiga faasaga ia Fereti na alia’e mai ina ua logo e se molimau le ofisa o leoleo i Tafuna mo se fesoasoani, i se pikiapu lanu mumu na alu atu ma paka i le vaega e paka ai tagata e le atoatoa le malosi o le tino ma le mafaufau.

 

E fetaui le taunuu atu o leoleo i le vaega o lo o i ai le faleoloa ae vaaia loa le solomuli ese o le ta’avale a Fereti ma aga’i atu i le isi pito o le faleoloa ma aga’i atu ai loa i luga o le alatele.

 

Na mulimuli atu i ai ta’avale a leoleo ma taofi mai le ta’avale a le ua molia, ma fesiligia i le mataupu lea na paka ai le paka e le tatau ona paka ai, ae ina ua fesiligia lana laisene ave ta’avale, sa fa’ailoa e Fereti i leoleo, o lana laisene o lo o se’i e le fa’amasinoga.

 

O le masina fou o Iulai lea ua fa’atulaga e toe tula’i ai Fereti i luma o le fa’amasinoga mo le isi ana iloiloga.