MOLIA SE ALI’I I LE FAIA O UIGA MATAGA

E 20 tausaga o se ali’i mai Aoloau ua taofia i le toese i Tafuna, ona o tu’uaiga i lona ulufale fa’amalosi i totonu o le fale o se isi aiga ma ia faia ai ni uiga mataga i se tama’ita’i e ala i lona tagofia o ona itutinosa a o moe o ia i luga o lona moega.

O le taeao ananafi na tula’i ai Michael Sene i luma o le fa’amasinoga fa’aitumalo mo le taimi muamua, ma ua toe tolopo lana iloiloga e toe fofogaina i le vaiaso fou.

Ae tusa ai ma fa’amaumauga a le fa’amasinoga o lo o taua ai e fa’apea, pe tusa o le itula e 12:41 i le vaveao o le taeao ananafi, na fa’afeso’ota’i ai e se isi o le aiga o le tama’ita’i na a’afia le ofisa o leoleo i Tafuna mo se fesoasoani, ona o se tagata na ulufale fa’amalosi atu i totonu o le latou fale i se taimi o le vaveao.

Na taua e le tama’ita’i na a’afia i leoleo ina ua fesiligia o ia e fa’apea, na te’i ina ua ia fa’alogoina se tagata o lo o tago tago se tagata i ona vae, fa’asolo atu ai le tago tago a le tagata i lona itutinosa, ma te’i ai loa i luga sa moe ma taumafai e nofo i luga, ae na taofi e le tagata o ia i lalo ma taumafai e fa’ato’a filemu atu o ia ina ia aua ai ne’i e e i luga.

Na taua e le tama’ita’i na a’afia e fa’apea, ina ua ia ala i luga, sa ia vaaia ai le ‘scree wire’ o lona potu ua sasae ese, atoa ai ma fa’amalama ua aveese, ma o le taimi lea na ia lagona ai lona fefe ae ua musu e e e i luga.

Na mafai e le tama’ita’i na a’afia ona sola ese mai le vaega na taofi ai e le tagata o ia i lalo, ma ia tago atu ai ua ki le moli o lona potu, ona ia tatala lea o le faitoto’a o lona potu ma e e ina ia lagona mai e le latou aiga mo se fesoasoani, ma taufetuli uma atu ai le latou aiga i le vaega o lo o tu mai ai.

Na fa’ailoa e le tama’ita’i na a’afia i leoleo lona vaai tino lava i foliga o le tagata na tago tago atu ia te ia, i le taimi na ia ki ai le moli o le potu, o le taimi fo’i lea na oso ai le tagata lea i le fa’amalama o le potu ma alu loa i le atoa.

Ina ua mae’a ona fa’ailoa e le aiga o le tama’ita’i na a’afia i leoleo le fale e nofo ai Sene, na aga’i atu ai loa leoleo ma tau atu i lona tina i le fale, ma talosagaina ai loa se avanoa latou te talanoa ai ma le ua molia, ma latou aga’i atu ai loa i le Ofisa o Leoleo i Tafuna mo su’esu’ega.

A o i ai Sene ma leoleo i totonu o le ta’avale, na ta’utino ai le ua molia i leoleo e fa’apea, sa telefoni atu le tama’ita’i na a’afia ia te ia, ma fai atu ia te ia e alu atu i lona fale.

Ae na taua e le tama’ita’i na a’afia i leoleo e fa’apea, na te iloaina lelei le ua molia, la te o mai i le nuu e tasi, e masani fo’i ona ia vaaia o ia i taimi o ta’aloga volipolo, ae lei i ai lava se la mafutaga fa’aleuo sa faia ma lenei ali’i.

O lo o taofia pea i le toese i Tafuna ia Sene e aunoa ma se tupe ua fa’atulaga e tatala ai o ia, e fa’atalitali ai le isi ana iloiloga lea ua fa’atulaga e le fa’amasinoga.

VAOELI LAFOIA

Ua toe tolopo e le fa’amasinoga le iloiloina o le mataupu a le ali’i o Vaoeli Lafoia mo le isi 30 aso, ae ua poloaina e le fa’amasinoga le Ofia Fa’anofova’ava’aia ina ia su’esu’e pe fa’amaonia le molimau a Lafoia e fa’atatau i ana taumafaiga mo le tau sailia o sana galuega tumau, ina ia mafai ai ona totogi lana salatupe i le fa’amasinoga.

E 5 tausaga lea o lo o nofovaavaaia ai Lafoia i lalo o tuutuuga mai le fa’amasinoga, e aofia ai lona totogiina o le salatupe e $2,000, ae talu mai le taimi na amata ai lana nofovaavaaia seia o o mai i le vaiaso na te’a nei, e na o le $450 le tupe ua mae’a ona ia totogi i le fa’amasinoga, e ui e le o i ai sana galuega tumau.

O Lafoia na ta’usala i lona umia fa’asolitulafono o vaega o le laau fa’asaina o le mariuana, e mafua mai ina ua vaaia e se leoleopo o le Uafu tele o ia o lo o sili se afa sikaleti mariuana i lona taliga a’o ia aga’i atu i totonu o le uafu.

O le vaiaso na te’a nei na valaau ai i luma o le faamasinoga maualuga le isi iloiloga a Lafoia, po o tumau pea lona usitaia o tuutuuga o lana nofovaavaaia e aofia ai ma le totogiina o le salatupe.

Ina ua fesiligia Lafoia i le taimi o lana molimau fa’atauto pe ua maua sana galuega, na tali le ua molia, o lo o fai ana galuega kamuta i tua, ae o lo o fa’atali sona avanoa mai kamupani ia ua mae’a ona tu’u atu i ai ana tusi talosaga mo se galuega.

Ina ua fesiligia o ia po o ai kamupani sa ia tusi talosaga i ai, na tali Lafoia, o le McConnell Dowell, Sadies, StarKist Samoa, fa’apea ai ma le faleoloa o Michael Kruse.

O le taimi lea na fa’aui lavea ai le ali’i fa’amasino sili ma fai atu ia Lafoia, “e leai sa’u faleoloa o i ai”.

Na mae’a le saunoaga lea a Kruse, ona ia poloaina lea o le mataupu a Lafoia e toe tolopo mo le isi 30 aso, ae fa’atonu le Ofisa Nofovaavaaia e su’esu’e le molimau a Lafoia pe fa’amaonia lana tala i auala o lo o tau saili ai sana galuega tumau.

EDDIE MAEA LOA

Na talia e le fa’amasinoga maualuga i le taeao ananafi le talosaga na fa’aulu e le loia a le malo ia Jessica Brigmann, ina ia solofua moliaga sa tu’uaia ai e le malo ia Eddie Maea Loa, ina ua fa’ailoa e le tagata sa tagi i lenei mataupu le mae’a lea ona toe teuteu o le mataupu na mafua ai ona taofia Loa i le toese.

Na pau le itu e le i nofo lelei ai i le finagalo o le fa’amasinoga le talosaga a le malo, o Loa lea ua fa’atulaga e faia lana fa’amasinoga autu i le aso Gafua o le vaiaso fou, Iuni 30 2014, ma ua mae’a fo’i ona valaau e le fa’amasinoga i latou e saili mai ai se vaega iloilo iuga.

Na fa’amalulu le loia a le malo i le fa’amasinoga e tusa ai o lea fa’aletonu, peita’i na saunoa le ali’i fa’amasino sili ia Michael Kruse e fa’apea, e le o se taimi muamua lenei ua tula’i mai ai le fa’aletonu lea o le o o atu i le taimi mulimuli ae toe fa’ailoa atu ua le taunu’u se fa’amasinoga autu sa fa’atulaga, ma ua alu ai le taimi o le fa’amasinoga e tau fa’afeso’ota’i tagata e saili mai ai se vaega iloilo iuga.