LEO PETELO

E 36 tausaga o se ali’i ua tu’uaia e le malo i lona faia lea o ni amioga mataga i se teineititi la te tuaoi e 15 tausaga le matua.

O moliaga ua tuuaia ai e le malo ia Leo Petelo e aofia ai lona tagofia o itutinosa o se tama’ita’i talavou i le tulaga muamua; faia o amioga fa’asotoma; faia o amioga fa’afeusuaiga mataga; fa’aoolima i le tulaga tolu; faia o ni gaioiga e ono lamatia ai le saogalemu o fanau laiti; ma le faatupu vevesi i nofoaga faitele.

O le mataupu lenei na tofu atu i le ofisa o leoleo i le vaveao o le aso 21 Iuni 2014, ina ua logo e le uncle o le teineititi na a’afia le ofisa o leoleo mo se fesoasoani.

Na taunu’u leoleo i le nofoaga na tula’i mai ai le fa’alavelave i Nuuuli, ma fa’asino ai loa e le tama’ita’i na a’afia i leoleo le ua molia, ao i ai pea o ia i le vaega sa tula’i mai ai le fa’alavelave, lea na vaaia ai e leoleo se fagu pia Vailima o lo o uu i le lima o le ali’i ua molia, ma fa’atonuina ai loa o ia latou te o i le ofisa o leoleo i Tafuna mo le su’esu’eina atili o le mataupu.

Ina ua taunu’u i le ofisa o Leoleo, na lafo e le ua molia upu mataga ma ia folafola lona fasiotia o tagata o le aiga o le tama’ita’i na a’afia pe a maua le avanoa e toe tatala ai o ia i tua.

Na taua e le tama’ita’i na a’afia i leoleo ina ua fesiligia o ia e fa’apea, o ia sa i totonu o le latou fale i le foga fale i luga i le taimi na valaau atu ai le ua molia i lona igoa, fai mai o lo o mana’o mai lona uncle ia te ia, e pei ona taua i fa’amaumauga a le fa’amasinoga.

Ina ua savali atu le tama’ita’i e aga’i i le foga fale i lalo e vaai lona uncle, ae te’i ai ina ua toso atu e le ua molia lona lima ma taumafai e fa’apipi’i atu lona tino ia te ia ma kisi atu fo’i ia te ia. Sa ia tago fo’i ma toso i lalo o lona ofu sa fai ae tago i lona itutinosa.

O le vaiaso na te’a nei na tula’i ai i luma o le fa’amasinoga fa’aitumalo le ali’i o Petelo, ma fa’atulaga ai loa lana ulua’i iloiloga e faia i le taeao nei, lea o le a iloilo ai e le fa’amasinoga molimau a le malo, ina ia iloa ai pe fa’amaonia sa i ai mo’i se fa’alavelave sa tupu, ae po o Petelo sa’o lea o lo o tu’uaia i le soliina o le tulafono.

O lo o taofia pea le ua molia i le toese i Tafuna e fa’atali ai lana iloiloga.

TETE’E MICHAEL SENE TU’UAIGA MALO

O le aso 18 Aokuso 2014 lea ua fa’atulaga e faia ai le ulua’i iloiloga a Michael Sene i luma o le fa’amasinoga maualuga, ina ua ia te’ena tu’uaiga fa’asaga ia te ia i le taeao ananafi.

O le aso Gafua na te’a nei na fa’atulaga e faia ai le ulua’i iloiloga a Sene i luma o le fa’amasinoga fa’aitumalo, peita’i na fa’aagafua e le ua molia ona aia tatau fa’aletulafono, ma le fa’ataunu’uina ai loa lana ulua’i iloiloga lea, ae manatu e tu’u sa’o atu loa lana mataupu i luma o le fa’amasinoga maualuga e fa’ataunu’u ai isi ana iloiloga.

O le ali’i loia ia Michael White na tula’i mo Sene, o ia fo’i lea na fa’ailoa i le fa’amasinoga le teena e Sene o tu’uaiga uma fa’asaga ia te ia.

O lo o tu’uaia  Sene i moliaga mamafa e lua o le talepe fale i le tulaga muamua atoa ai ma lona tagofia o itutinosa o se tama’ita’i talavou i le tulaga muamua, faapea ai ma moliaga mama e lua o le faatupu vevesi i nofoaga faitele faapea ai ma lona tagofia o le ava malosi ae le i atoa lona 21 tausaga.

O lo o taofia pea le ua molia i le toese i Tafuna, sei vagana ua mafai ona ia totogi le $20,000 ona fa’atoa mafai lea ona tatala o ia i tua mai le toese.

ARONA AMITUANA’I

Ua toe a’afia fo’i le ali’i o Arona Amituana’i i le tulafono, ina ua toe taofia o ia i le toese i Tafuna ma tu’uaia i lona fa’ao’olima lea i se tama matua mai Pago Pago i le faaiuga o le tausaga na te’a nei, atoa ai ma lona fa’ao’olima i se ali’i leoleo, ae o lana nofova’ava’aia e 5 tausaga fa’atoa mae’a i le tausaga e 2017.

O le aso 15 o Iulai la lea ua fa’atulaga e faia ai le iloiloga fa’apitoa a Amituana’i i luma o le fa’amasinoga maualuga, e iloilo ai pe ua ia soli tu’utu’uga o lana nofova’ava’aia mai le mataupu lea na fa’asala ai o ia e le fa’amasinoga i le 2012 e taofia i le toese mo le umi e 12 masina, ina ua ta’usala o ia i lona fa’ao’olima i lona to’alua a o ma’itaga le fafine.

O le taeao ananafi na faila ai e le Ofisa Nofova’ava’aia sa latou talosaga i luma o le fa’amasinoga maualuga, mo se poloaiga e fa’ataunu’u ai lea iloiloga, lea fo’i sa fa’ailoa e le loia a Amituana’i ia Michael White le tatau lea ona fa’ataunu’u le iloiloga o lo o finau mai i ai le Ofisa Nofova’ava’aia.

O le talosaga mai le Ofisa Nofova’ava’aia mo le faia o se iloiloga, na faia lea ina ua faila e le malo i le aso Gafua se talosaga ina ua toe tula’i fo’i Amituana’i i luma o le fa’amasinoga fa’aitumalo, e mafua mai o ni mataupu fou se lua ua tu’uaia ai o ia e le malo.

O le mataupu muamua e pei ona tu’uaia ai Amituana’i na tula’i mai lea i Pago Pago i le masina o Novema 2013, lea o lo o tu’uaia ai o ia i lona fa’ao’olima lea i se tama matua, ina ua maua atu e le tama matua lea o ia o lo o i totonu o lona fale.

Na mafua ona alu le ua molia i le fale o le tama matua na a’afia, ona sa faigaluega ai iina le tama’ita’i sa la nonofo muamua, e ui ua uma ona poloaina o ia e le fa’amasinoga e aua ne’i ona toe taumafai e fa’afeso’ota’i lona to’alua i so o se auala.