Ads by Google Ads by Google

Tala otooto o Fa’amasinoga

JAMES TUATOO

 

Ua taofia i le toese i Tafuna se alii na tuuaia i le faalavelave lea na osofaia ai e ni tagata, le faleoloa o O & O i Nuuuli i le tausaga e 2011.

 

O tuuaiga ua faia faasaga ia James Tuatoo e aofia ai le talepe fale i le tulaga muamua ma le gaoi, ma ua faatulaga le tupe e $10,000 e totogi ona fa’atoa mafai lea ona tatala o ia i tua mai le toese.

 

O le masina o Fepuari 2011 o lo o taua i faamaumauga a le faamasinoga na afua mai ai lenei mataupu, ma taofia faapagota ai loa e leoleo alii e to’atolu na tuuaia faatasi i lenei mataupu, ae o le vaiaso na tea nei na faatoa taofia faapagota ai Tuatoo.

 

O oloa o lo o taua i faamaumauga a le faamasinoga na ave faagaoi e Tuatoo ma isi alii na auai i le osofaiga o le faleoloa e aofia ai pusa o pauta tata lavalava, pusa bowl saimini faapea ai ma pusa ga’o e kuka ai meaai.

 

O le aso a taeao lea ua faatulaga e toe tulai ai Tuatoo i luma o le faamasinoga maualuga, mo le fofogaina o le maliliega lea ua latou sainia ma le malo.

 

FIDELIS TAUMALUA

 

O le ali’i lea na faaoolima i se tama’ita’i ma taumafai e tuu se tamai naifi i lona ua, e le gata ua faasa e le faamasinoga faaitumalo ona ia toe taumafai e faafesootai le tama’ita’i na a’afia, ae ua poloaina foi o ia na te tuliina aso e 20 i le toese i Tafuna, o se tasi lea o tuutuuga o lana nofovaavaaia e 24 masina, ina ua ta’usala o ia i moliaga mama e lua o le faaoolima i le tulaga tolu, atoa ai ma le faatupu vevesi i nofoaga faitele.

 

E tusa ai ma faamaumauga a le faamasinoga, e le o se taimi muamua lenei ua molia ai Fidelis Taumalua i luma o le fa’amasinoga.

 

O le 2011 na ta’usala ai o ia i le moliaga o le faatupu vevesi i nofoaga faitele, 2012 na tausala ai o ia i le moliaga o le faaoolima i le tulaga tolu, ao lea foi ua toe ta’usala o ia i le tausaga nei i moliaga uma ia e lua.

 

Na faailoa e le alii faamasino ia Elvis P. Patea ia Taumalua e fa’apea, e foliga mai o le la mafutaga ma le tamaitai na aafia lea o lo o mafua ai ona molia o ia i le tulafono, amata mai lava i le 2011 seia oo mai i le taimi nei.

 

Na faailoa e Patea ia Taumalua, e tusa ai ma le ripoti a le malo, e le o toe manao le teineititi na aafia na te toe faalavelave atu i lona olaga.

 

Ua poloaina foi Taumalua na te totogi le salatupe e $200 i totonu o le 60 aso o lana nofovaavaaia.

 

LEVA’A LESULI

 

O le aso 19 Setema lea ua fa’atulaga e lau ai le fa’asalaga a le ali’i o Leva’a Paulo Lesuli, ina ua talia e le fa’amasinoga maualuga i le vaiaso na te’a nei lana tali ioe i le moliaga o le fa’ao’olima i le tulaga lua, i lalo o se maliliega na latou sainia ma le malo.

 

I le tali ioe ai o Lesuli, 36 tausaga le matua o Pago Pago i le moliaga e pei ona ta’usala ai o ia, sa ia tautino ai e fa’apea, i se taimi o le aso 21 Aperila 2014 i Pago Pago, sa ia faaaoga ai se fasi paipa u’amea e sasa ai le papatua o le ali’i o Andrew Peters, ma i’u ina manu’a ai le gauga tua o lea ali’i.

 

O manu’a na a’afia ai Peters na mafua ai ona taofia o ia i le falema’i ina ua mana’omia le faia o se taotoga i lona papatua. Na tautino Lesuli, o lana gaioiga sa faia i lea aso sa le’i tusa lea ma ala o le tulafono.

 

O lo o taofia pea i le toese i Tafuna Lesuli e fa’atali ai le aso lea ua fa’atulaga e lau ai lana fa’asalaga.