Ads by Google Ads by Google

Tala otooto o Fa’amasinoga

SAUOLEOLA ESENE

 

O se tasi o tuutuuga o le nofovaavaaia a le alii o Sauoleola Esene lea ua tuuina atu i ai e le fa’amasinoga, afai na te toe solia se isi tulafono po o lona le usita’i fo’i i poloaiga ua tuuina atu mo lana nofovaavaaia e 2 tausaga, o le a fa’amavae loa i lona to’alua ae tapena lana ato ma toe fo’i i Samoa.

 

O le aso Faraile na te’a nei na lau ai le fa’asalaga a le alii o Esene i luma o le faamasinoga maualuga, ina ua ta’usala o ia i le moliaga mama o le fa’ao’olima i le tulaga tolu, lea na toe suia mai e le fa’amasinoga i le moliaga mamafa o le fa’ao’olima i le tulaga lua.

 

Na talia e le fa’amasinoga le fa’atoesega a Esene ina ia tu’u atu se isi avanoa mo ia, atoa ai ma fautuaga a loia ina ia fa’anofova’ava’aia le ua molia, ma manatu ai loa le afioga i le ali’i fa’amasino sili ia Michael Kruse, ua lava masina e tolu ma vaiaso e lua lea na taofia ai Esena i le falepuipui e fa’atalitali ai taualumaga o lana mataupu, e fai ma ona fa’asalaga i lenei mataupu.

 

O isi poloaiga o le nofovaavaaia a Esene e aofia ai lona tuua o Amerika Samoa e toe fo’i atu i le atunu’u na malaga mai ai, peita’i o le a fa’amalumalu le fa’ataunu’uina o lea poloaiga, fuafua lava i lona usitaia o isi poloaiga a le fa’amasinoga, e aofia ai le aua lea ne’i ona toe solia se tulafono a le malo.

 

TAUTAU PAPALI’I

 

O le ali’i mai Pago Pago lea na ia fa’ao’olima i se ali’i i tua o le falesa ma i’u ina matapogia ai lea ali’i, ua poloaina e le fa’amasinoga maualuga ina ia taofia o ia i le toese mo le 30 aso, o se tasi lea o tu’utu’uga o lana nofova’ava’aia e 23 masina, ina ua ta’usala o ia i moliaga mama o le fa’ao’olima i le tulaga tolu.

 

Na ulua’i tu’uaia e le fa’amasinoga le susuga a Tautau Papali’i i le moliaga mamafa o le fa’ao’olima i le tulaga lua, ae i lalo o se maliliega sa latou sainia ma le malo, na toe suia ai e le malo le mamafa o le ulua’i moliaga sa faia fa’asaga ia te ia.

 

Na taua e le afioga i le fa’amasino sili ia Michael Kruse i le aso Faraile na te’a nei ina ua ia fofogaina le fa’asalaga a Papali’i e fa’apea, e ui o lo o finau mai le ua molia sa ia po le gutu o le ali’i na a’afia, peita’i o le molimau a le ali’i na a’afia faapea ai ma le ripoti a le falema’i, o lo o atagia mai ai, e malosi se gaioiga sa faia na mafua ai ona manu’a lea ali’i.

 

Na taua e le ali’i na a’afia, na tu’i e le ua molia lona gutu ma pau ai i lalo ma matapogia, ma te’i a’e ai o lo o taoto i le falema’i.

 

O a’afiaga na o o i le ali’i na a’afia e pei ona taua i le ripoti a le falema’i lea na tu’u atu i le Ofisa Nofova’ava’aia,  o le matuia o manu’a na a’afia ai le ulu o le ali’i na a’afia na mafua ai ona tale toto o ia.

 

Na fa’atoese le ua molia i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia, na finau fo’i loia mo se fa’asalaga fa’anofovaavaaia.

 

E tasi le tausaga na manatu le fa’amasinoga e loka ai Papali’i, peita’i ua fa’amalumalu lona tuliina o lea fa’asalaga, ae ua nofovaavaaia o ia mo le 24 masina i lalo o poloaiga e ao ona ia usita’i i ai.

 

O ni isi o ia poloaiga e aofia ai lona tuliina o aso e 90 i le toese i Tafuna, peita’i ua manatu le fa’amasinoga, ua lava na o aso e 30 na te tuliina, ae o isi aso o lo o totoe ai o le fa’amalumalu le tuliina, fuafua lava i lona usitaia o isi poloaiga ua tuuina atu.

 

Ua poloaina fo’i o ia e le fa’amasinoga, e tatau ona maua sana galuega pe a mae’a ona tuli lana fa’asalaga fa’a falepuipui.

 

Ua poloaina fo’i o ia na te totogiina le pili o le falema’i a le ali’i na a’afia, ma ia auai i ni aoaoga e fesoasoani ai i le tulaga o le ita.