AOKUSITINO FALANA’I

O le aso 31 Oketopa 2014 lea ua fa’atulaga e le fa’amasinoga e tu’u atu ai lana fa’asalaga fa’asaga i le ali’i o Aokusitino Falana’i, i le mae’a ai lea ona ta’usala o ia i le moliaga o le talepe fale i le tulaga lua, i lalo o se maliliega sa ia sainia ma le malo ma ua talia fo’i e le fa’amasinoga.

I le tali ioe ai o Falana’i, sa ia ta’utino ai e fa’apea, i se taimi o le aso 18 Iulai 2014 i Fogagogo, sa ia ulufale fa’amalosi ai i totonu o le fale o se aiga e aunoa ma se fa’atanaga, ma ia ave fa’agaoi ai ni meatotino sa i totonu e aofia ai se telefoni feavea’i faapea ai ma se tino i tupe e $35.

Na ulua’i tuuaia e le malo ia Falana’i i le moliaga e aofia ai le talepe fale i le tulaga muamua, gaoi, faapea ai ma le moliaga mama o le fa’atupu vevesi i nofoaga faitele, ae i lalo o le maliliega ma le malo, ua ia ioeina ai le moliaga muamua lea ua toe teuteu e le malo, ina ia fa’ailoa ai le solitulafono o le talepe fale i le tulaga lua, ae solofua i si moliaga.

Na taua e le malo e fa’apea, ao suesue e leoleo le mataupu e fa’atatau i le fale lea na osofa’i e le ua molia, sa fa’apea fo’i ona alu atu le isi tagata ma fa’ailoa atu i leoleo, sa osofa’ia fo’i e le ua molia lona fale i se taimi e le i mamao atu.

O lo o taofia pea le ua molia i le toese i Tafuna e fa’atali ai le aso lea ua fa’atulaga e lau ai lona fa’asalaga.

ANDREW FILIPO

O le ali’i lea na ta’usala e le fa’amasinoga fa’aitumalo i le moliaga mama o le fa’ao’olima i le tulaga tolu, e mafua mai i le fa’alavelave lea na ia tu’iina ai se isi ali’i sa latou inupia fa’atasi i le masina o Iulai na te’a nei, e le gata ua nofovaavaaia mo le 24 masina, ae ua fa’asa fo’i o ia e le fa’amasinoga ona ia toe tagofia le ava malosi, pe toe tu vae foi i le fale o le aiga lea na tula’i mai ai le fa’alavelave.

O le vevesi na tula’i mai i le va o Andrew  Filipo ma le ali’i na a’afia ina ua latalata ina mae’a le latou inugapia i le po o le aso Toona’i na tula’i mai ai le fa’alavelave, ae fai loa e le ali’i na a’afia se gaioiga na mafua ai ona ita le ua molia, ina ua ia uu le ato fa’a fafa a Filipo ae togi i lalo o se alavai e latalata ane i le vaega na latou tafafao ai.

Na ita Filipo ina ua togi e le alii na aafia lana ato i lalo o le vaivai, ma ia faatonu ai loa le na aafia e alu e aumai lana ato, peita’i sa palauvale le na a’afia ia Andrew ma tula’i mai ai loa le vevesi ma i’u ina sasa ai e le ua molia le ulu o le ali’i na a’afia i le fagupia.

Na fa’atoese Filipo  i le fa’amasinoga e tusa ai o lana solitulafono sa faia, ma ia tautino ai lona salamo moni e tusa ai o le mea sa tupu. Sa ia taua fo’i e fa’apea, o le aso lava na tatala ai o ia i tua i le mae’a ai o po e 5 na loka ai o ia i le falepuipui, na latou o ai ma ona matua i le aiga o le ali’i na a’afia ma latou fa’atoese i ai, lea fo’i sa talia e le aiga.

E ui o le alii na aafia na faia le gaioiga na mafua ai le vevesi, peita’i i le silasila a le fa’amasinoga, ua fai lava si matuia o le gaioiga sa faia e le ua molia, peita’i o le itu e laki ai, e le matuia manu’a na a’afia ai le na manu’a.

O aso e 5 lea na loka ai le ua molia i le toese, ua manatu le fa’amasinoga e avea ma ana faasalaga, ae ua poloaina o ia na te totogi le salatupe e $150, atoa ai ma lona totogiina o le pili o le falema’i a le ali’i na a’afia.

Na fautuaina malosi e le fa’amasinoga ia Andrew, afai ae toe molia mai o ia i se isi solitulafono ae lei maea lana nofovaavaaia e 2 tausaga, o le a taofia loa o ia i le falepuipui mo le 6 masina.

MATULINO TAUALI’I

O le aso Faraile nei lea ua toe tolopo i ai le lauina o le fa’asalaga a le ali’i o Matulino Tauali’i, lea ua ta’usala e le fa’amasinoga maualuga i le moliaga o le fasioti tagata i le tulaga lua, e mafua mai i le fa’alavelave lea na ia sasaina ai le ulu o se ali’i na la vevesi i Fagaalu ma taofia ai o ia i le falema’i ona o le matuia o se manu’a na a’afia ai lona ulu, mulimuli ane maliu ai lava o ia i le falema’i.

Na talosaga le loia a Taualii i le fa’amasinoga i le vaiaso na te’a nei mo se avanoa e toe tolopo ai le lauina o le fa’asalaga a le ua molia, ina ia fetaui ma le taunu’u mai i Apia o se molimau o lo o naunau le ua molia e molimau mo lana itu, ina ia fesoasoani ai i le tau fa’amamaina o se fa’asalaga a le fa’amasinoga e tu’uina atu mo ia, lea fo’i na talia e le fa’amasinoga lea talosaga ina ua leai se fa’atuiese mai le itu a le malo.

Na ta’utino Tauali’i i le fa’amasinoga maualuga, sa ia sasa le ulu o le ali’i na aafia i se samala i le po o le aso 3 Oketopa 2013, ma mafua ai le manu’a na maliu ai o ia.

O lo o taofia pea le ua molia i le toese i Tafuna e fa’atali ai le aso Faraile nei lea ua fa’atulaga e lau ai lona fa’asalaga.