Ads by Google Ads by Google

Tala otooto o Fa’amasinoga

TITINA LONA ATALI’I INA UA LE MAUA LE PEPA O LE LOTU TAMAITI

 

O le ali’i lea o lo o tuuaia i lona titina o le ua o lona atalii ma fasi o ia, ina ua le maua le pepa o le tala o le Lotu a Tamaiti, ua molia nei e le malo i moliaga mama e aofia ai lona faia o ni gaioiga e ono lamatia ai le saogalemu o fanau laiti, fa’apea ai ma le moliaga o le fa’atupu vevesi i totonu o lona aiga.

 

O le mataupu lenei na tofu atu i le Ofisa o Leoleo i Fagatogo, ina ua logo e le faiaoga a le tamaititi e 10 tausaga na aafia mai le Aoga a le Manulele leoleo mo se fesoasoani, i le mae’a ai lea ona molimauina o unaoa i lalo o le mata tauagavale ma le lima taumatau ma maosia i le papatua ma le ua o le tamaititi na aafia.

 

Ina ua fesiligia e leoleo le tamaitai na a’afia, na taua ai e le tamaititi e fa’apea, na fasi o ia e lona tama ina ua le maua lana pepa o le Lotu Tamaiti o lo o a’o.

 

Na taua e le tamaitiiti e faapea, sa fa’atonu o ia e lona tama e fai lana pepa peita’i sa ia le manatua, na fiu fo’i e su’e le fasi pepa o lo o tusi ai lana pepa o le Lotu Tamaiti ua le maua, ma avea ai loa ma itu na fasi ai o ia e lona tama e ala i lona po o lona gutu, ma fetoai ai lona ulu ma le puipui o le latou fale, ona toe uu lea e lona tama o lona ua ae titina i ona lima, ao ia faapipii lona ulu ma le puipui o le latou fale.

 

Na taua e le tamaititi lona tagi ma augani i lona tama e taofi, o lea na aveese ai e lona tama ona lima mai lona ua, ona toe faaauau foi lea ona fasi o ia e ala i le oomi e lona tama o le itu o lona manava, ma masae ai lona miti afu fou sa faatau e lona tina.

 

Na taua e le tamaititi i leoleo le taunuu atu o lona tina ma vaaia o ia o lo o saofa’i i totonu o le fale o lo o tagi, ae o le taimi lea o lo o oti e lona tama lona ulu.

 

Na tauupu le ulugalii ina ua oti e le tamaloa le ulu a lona atalii, peita’i sa fai le tamaloa i lona to’alua, “o le mea lea e maua e le ali’i lea pe afai e fa’avalevalea”, o lea na tago atu ai loa le tina ua aveese mai lana tama ma ave ua fa’ataele ma fai lona ofu fou, ina ua mae’a, sa ave loa o ia i le moega ma fa’amoe loa.

 

Na teena e le ua molia tuuaiga faasaga ia te ia ina ua tula’i i luma o le fa’amasinoga fa’aitumalo i le vaiaso nei. Ua fa’atulaga le ana iloiloga e toe faia i le masina fou.

 

E $1,000 le tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua. O ni isi o poloaiga ua tuuina atu na te usitaia pe afai ae mafai ona tatala o ia i tua, o le fa’asea lea ona ia toe taumafai e fa’afesootai lona atalii i soo se auala, ua fa’asa fo’i ona ia toe faia ni amioga tau fa’amata’u i lona aiga ma lana faua.

 

FAAOOLIMA SE ALII I LONA TUAFAFINE

 

E 36 tausaga o se ali’i mai Taputimu ua tuuaia nei e le malo i moliaga mama e lua o le faaoolima i le tulaga tolu, atoa ai ma le faia o ni gaioiga e save’u ai le filemu i totonu o lona aiga, ona o le fa’alavelave lea na faaoolima ai i lona tuafafine i le aso Gafua na te’a nei, e ala i lona po o ona foliga toe ta kiki o vaega o lona tino.

 

O le mataupu lenei na tofu atu i le Ofisa o Leoleo i Leone, ina ua logo e se aiga tuaoi le ofisa o leoleo mo se fesoasoani, i se tamaitai latou te tuaoi na tamo’e atu i lo latou fale mo se fesoasoani.

 

Ina ua taunu’u atu le ta’avale a leoleo i se vaega o le afioaga o Taputimu, sa latou vaaia ai le pisia uma o le ofu o le tamaitai lea o lo o fai i le toto, ae o lo o tagi fo’i ma augani atu mo se fesoasoani, ona ua fasi o ia e lona tuagane.

 

Na fa’amatala e le tamaitai na aafia i leoleo, e le gata sa tu’i e lona tuagane ona foliga ma mafua ai ona toto lona isu, ae sa ia ta kiki fo’i ona foliga ma lona fatafata, ae ina ua fesiligia e leoleo le na a’afia e tusa ai o le mea sa tupu, sa ia fa’atoese ai i leoleo ina ua ia fa’ao’olima i lona tuafafine.

 

Na ta’utino le ua molia i leoleo sa ia fa’aoolima i lona tuafafine e ala i lona po o ona foliga ma toto ai lona isu, ae na te lei tu’iina o ia. Sa ia tautino fo’i i leoleo sa ia ta kiki lona tuafafine, ae na te le’i taua po o fea vaega o lona tino sa ia ta kiki.

 

Talu ai o le tele o vaega o le tino o le tamaitai na aafia sa ia taua le tiga, o le mafua’aga lea na auina atu ai o ia e sui o le EMS i le falema’i i Fagaalu, mo le faia i ai o ni isi togafitiga i lona saogalemu.

 

Na teena e le ua molia tuuaiga faasaga ia te ia, ina ua tula’i i luma o le fa’amasinoga fa’aitumalo i le vaiaso nei. Ua fa’atulaga le isi ana iliologa e faia i le masina fou.

 

E $1,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua. Afai ae mafai ona tatala o ia, ua fa’asa ona ia toe taumafai e fa’afeso’ota’i lona tuafafine na a’afia, ua fa’asa fo’i ona ia toe faia i ai ni isi gaioiga tau fa’amata’u.