SAUNI SULA TUI TALI IOE TU’UAIGA A LE MALO

O le taeao nei lea ua fa’atulaga e fofoga aloaia ai le maliliega lea ua sainia e le malo ma Sula Tui, ma fa’amuta ai loa le mataupu e pei ona tu’uaia ai Tui e le malo.

Ina ua valaau le isi iloiloga a Tui i le aso Faraile na te’a nei, na fa’ailoa e lana loia faitua ia Douglas Fiaui i le fa’amasinoga le talia e Tui o le ofa a le malo sa tu’uina atu, ma ua mae’a fo’i ona sainia e le ua molia tu’utu’uga o le maliliega ma le malo, ma tolopo ai loa e le afioga i le ali’i fa’amasino sili lagolago ia Lyle L. Richmond le mataupu a Tui e toe valaau i le taeao nei, mo le tolaulauina o le latou maliliega lea ua sainia ma le malo.

O Tui o lo o tu’uaia e le malo i moliaga mamafa e lua o lona umia fa’asolitulafono lea o vaega o le pauta fa’asaina o le aisa, atoa ai ma lona umia fa’asolitulafono o vaega o le aisa ma le fa’amoemoe e tulei ma fa’atau atu i isi tagata.

O tu’uaiga fa’asaga ia Tui na afua mai i le fa’alavelave lea na tula’i mai i le aso 4 Tesema 2014, ina ua su’e e leoleo o le toese i Tafuna se afifi na alu atu le ua molia e ave i lona to’alua o lo o taofia i le falepuipui, ae maua ai i totonu ni taga pepa iila o lo o i ai vaega o le pauta fa’asaina o le aisa.

O Tui, o le to’alua lea o le ali’i o Sameul Wright, lea o lo o taofia i le falepuipui ona o tu’uaiga i lo latou osofaia lea ma ni isi ali’i faleoloa o le Gold Gonda Store i Fagaalu i le masina o Me 2014.

O lo o taofia pea Tui i le toese i Tafuna e fa’atali ai le aso lea ua fa’atulaga e fofogaina ai le latou maliliega ma le malo.

TU’UAIA SE ALI’I FA’AO’OLIMA LONA TO’ALUA

O le ali’i e 27 tausaga lea na taofia e leoleo i le falepuipui i le vaiaso na te’a nei, ona o tu’uaiga i lona fa’ao’olima lea i lona to’alua a o i ai lana fanau laiti, ua poloaina e le fa’amasinoga e aua ne’i ona toe faia ni isi gaioiga e fa’amata’u pe sauaina ai lona to’alua, a o fa’agasolo ai taualumaga o lana mataupu.

O le mataupu lenei na tofu atu i le ofisa o leoleo i le vaiaso na te’a nei, ina ua fasi e le ali’i ua molia lona to’alua e ala i lona ta tu’i o foliga o le fafine ma lona fatafata, ona ia sola ese ai loa lea ma le latou aiga.

Na taua e le fafine i leoleo, e le gata ua fai soo le amio a lona to’alua o le fasi soo o ia, ae o le fua e mafua ai ona fasi soo o ia, ae fai lava i le taimi e i ai si ana fanau laiti.

Na molimauina e leoleo unaoa ma maosia i vaega o le tino o le fafine, ma latou talosagaina ai loa le fesoasoani a le vaega a le EMS, mo le siakiina o le tino o le fafine.

Na teena e le ua molia moliaga mama e tolu ua tu’uaia ai o ia e le malo, ma ua poloaina o ia e le fa’amasinoga e aua ne’i ona toe taumafai e fa’afeso’ota’i lona to’alua, se’i vagana ua tu’uina atu se isi poloaiga a le fa’amasinoga, ua fa’asa fo’i ona ia toe faia ni gaioiga e fa’amata’u ai lona to’alua ma lana fanau.

TETE’E CARMEN HUNKIN TU’UAIGA A LE MALO

O le aso 3 Aperila 2015 lea ua fa’atulaga e faia ai le ulua’i iloiloga a Carmen Galumalemana Hunkin i luma o le fa’amasinoga maualuga, i le mae’a ai lea o lona teena o moliaga mamafa o lo o tu’uaia ai o ia e le malo i le vaiaso nei.

O moliaga o lo o tu’uaia ai Hunkin na afua mai i le fa’alavelave lea na ia faia ai uiga mataga i se tamaititi e 16 tausaga le matua.

O lo o taofia pea Hunkin i le toese i Tafuna e fa’atali ai le aso lea ua fa’atulaga e toe tula’i ai i luma o le fa’amasinoga.

Feso’ota’i mai i le tusitala ia ausage@samoanews.com