Ads by Google Ads by Google

Tala otooto o Fa’amasinoga

SAUNI SELAPI TUITELELEAPAGA E TALI IOE I TU’UAIGA MALO

 

O le vaiaso fou lea ua fa’amoemoe e fofoga aloaia ai i luma o le fa’amasinoga maualuga, tuutuuga o le maliliega lea ua faia e le malo ma Selapi Tuiteleleapaga, ma le fa’amoemoe o le a fa’amuta ai loa taualumaga o lenei mataupu.

 

I le taimi o le iloiloga faapitoa a Tuiteleleapaga i luma o le ali’i fa’amasino sili lagolago ia Lyle L. Richmond i le vaiaso na te’a nei, na fa’ailoa ai e le loia a Tuiteleleapaga ia Michael White le mae’a lea ona la tauaaoina ma le ua molia o se ofa mai le malo, ma ua sauni fo’i le ua molia e talia ma sainia.

 

Na talia e le fa’amasinoga le talosaga a White ina ia fa’atulaga loa se aso e fofoga aloaia ai le maliliega ua faia e itu e lua, lea fo’i e le i fa’atuiese i ai le itu a le malo.

 

Na taua e White i le Samoa News, o le a tali ioe Tuiteleleapaga i le moliaga mamafa o le gaoi, ae solofua e le fa’amasinoga le isi moliaga mamafa o lo o i ai i le pepa o tagi sa fa’aulu e le malo, le moliaga o lona ave fa’agaoi o se vaega tupe sa tu’uina atu i lalo o lana va’ava’aiga.

 

O tu’uaiga fa’asaga ia Tuiteleleapaga na afua mai i le fa’alavelave lea na ia gaoia ai le siaki e $1,131.97, o le totogi a se faiaoga mai le aoga tulaga muamua a Lupelele Elementary sa galue ai o se failautusi, lea na la o ma le pule aoga e piki mai i le masina o Setema 2014 e piki mai i le ofisa o aoga a le malo i Utulei.

 

O lo o taofia pea Tuiteleleapaga i le toese i Tafuna e fa’atali ai le aso lea ua fa’atulaga e fofoga aloaia ai le latou maliliega ma le malo i luma o le fa’amasinoga.

 

TOE TETE’E SE ALI’I INA UA UMA ONA TALI IOE I TU’UAIGA A LE MALO

 

O le ali’i lea na ta’utino i le fa’amasinoga maualuga e fa’amaonia tu’uaiga o lona tagofia lea o itutinosa o lona tausoga tama’ita’i, sa ia fa’ailoa i se sui o le Ofisa Nofova’ava’aia, e mama o ia ma tu’uaiga a le malo, na te le’i faia fo’i le solitulafono e pei ona ta’usala ai o ia, e pei ona fa’ailoa e le afioga i le fa’amasino sili ia Michael Kruse ina ua toe valaau le mataupu a le ali’i ua molia i le taeao ananafi.

 

Na tolopo mai i le aso Faraile na te’a nei le fofogaina o se fa’asalaga a le fa’amasinoga fa’asaga i le ali’i ua molia, ina ua fa’ailoa e Kruse le i ai o ni fa’amaumauga a le fa’amasinoga e toe fia silasila i ai fa’amasino ao le’i tu’uina mai la latou fa’asalaga.

 

I le taeao ananafi ina ua toe valaau le mataupu a le ali’i ua molia, na saunoa Kruse e fa’apea, e tusa ai o se vaega o le ripoti a le Ofisa Nofova’ava’aia ua mae’a ona saunia mo lenei mataupu, o lo o teena ai e le ali’i ua molia lona faatinoina o le solitulafono ua ta’usala ai o ia, o lona tagofia lea o itutinosa o le tama’ita’i na a’afia, o le mafua’aga lena sa manatu ai le fa’amasinoga e toe vaavaai i ana fa’amaumauga o le aso 20 Tesema 2014, i le taimi na fofoga aloaia ai le maliliega a le ali’i ua molia ma le malo, pe sa i ai se fesili na fa’atamala le fa’amasinoga e fesiligia ai le ua molia.

 

Ae ina ua toe silasila le fa’amasinoga i ana fa’amaumauga e pei ona saunoa Kruse, o lo o manino mai ai, sa fesiligia e le fa’amasinoga le ua molia, pe ioe sa ia tagofia itutinosa o le tama’ita’i na a’afia, lea fo’i sa ia tali mai “ioe”.

 

Na fa’ailoa e Kruse i le loia a le ali’i ua molia ia Michael Kruse, o le a tu’u pea i le finagalo o le fa’amasinoga le tumau pea lea o le tete’e o le ali’i ua molia i le moliaga ua mae’a ona ia tali ioe ai, ma ua sauni fo’i le fa’amasinoga e tu’uina mai lana fa’asalaga.

 

Na malolo le fa’amasinoga mo se taimi puupuu, ina ua talia le talosaga a White mo sina avanoa puupuu se’i la toe talanoa ai ma le ali’i ua molia.

 

Ae ina ua toe fesiligia e White le ali’i ua molia i le taimi o le malologa puupuu a le fa’amasinoga, sa tumau pea le teena e le ua molia o lona faia o le solitulafono ua mae’a ona ia tali ioe ai, ma talosaga ai loa White i le fa’amasinoga ina ia toe tolopo le lauina o le fa’asalaga o lenei mataupu mo le taeao nei, lea fo’i na talia e le fa’amasinoga.

 

O le mataupu e pei ona ta’usala ai le ali’i ua molia, na alia’e mai i le fa’alavelave lea na alu atu ai i le fale o lo o matamata mai lona tausoga tama’ita’i i le T.V i luma o le potu malolo, ma alu atu ai ua ia tagofia ona itutinosa, ina ua mae’a ona ia fai i le tama’ita’i na a’afia la te o i totonu o le potu ae musu le tama’ita’i.

 

Na logo e le tama’ita’i lona tama e tusa ai o le mea ua tupu, ma taofia fa’apagota ai loa le ua molia i le aso lava lea.