Ads by Google Ads by Google

Tala otooto o Fa’amasinoga

TOE TOLOPO LE MATAUPU A LE ALI’I LEOLEO

 

O le aso Faraile o le vaiaso nei lea ua fa’atulaga e toe tula’i ai le ali’i leoleo su’esu’e ia Det. Ioane Paselio i luma o le fa’amasinoga fa’aitumalo, ina ua talia e le afioga i le ali’i fa’amasino ia Elvis P. Patea le talosaga na fa’aulu e lana loia fautua ia Mathoni McCormick sa tu’uina atu i le fa’amasinoga, mo se avanoa e toe tolopo ai le iloiloga sa fa’atulaga mo lenei mataupu, ina ia maua ai se avanoa la te iloiloina ai ma le ali’i leoleo ua molia mau fa’amaonia o lenei mataupu, lea ua tuuina atu e le itu a le malo ia te i laua.

 

O le vaiaso na te’a nei na toe tula’i ai Det. Paselio i luma o le fa’amasinoga mo le isi ana iloiloga fa’apitoa, peit’ai o lea ua toe tolopo lana iloiloga lea e toe tula’i i le fa’aiuga o le vaiaso nei, ma, o lo o tumau pea tu’utu’uga ua tu’uina atu e le fa’amsinoga e tatala ai o ia i tua, e fa’atalitali ai taualumaga o lana mataupu lea ua fa’agasolo i luma o le fa’amasinoga i le taimi nei.

 

O tu’uaiga fa’asaga ia Det. Paselio na afua mai i le fa’alavelave lea na tula’i mai i le masina o Oketopa 2014, ina ua ia fa’ao’olima i le ali’i leoleopo o le fale kalapu a le Evalani Night Club, fa’atasi ai ma le uso o le ali’i leoleopo.

 

O lo o tu’uaia e le malo ia Det. Paselio i lona tu’iina o se tioata o le fale kalapu ma ta’e ai, soso’o ai loa lea ma lona fa’ao’olima i le ali’i leoleopo ma lona uso, mulimuli ane ai alu i le ta’avale a leoleo sa ia fa’aaogaina i le po lea ma aveese mai ai se fana e pei ona taua i fa’amaumauga a le fa’amasinoga, ae fa’alala solo i tagata, atoa ai ma lona fa’afefe o tagata sa i ai e ala i le mafai lea ona ia fana o se tasi.

 

O lo o teena uma e Det. Paselio tu’uaiga fa’asaga ia te ia, ae le o mafai fo’i e le malo ona molia le isi ali’i leoleo sa tafafao ma Det. Paselio i le po lea, le susuga ia Geoffrey Tagaloa.

 

MOLIA FRANCIS MAPU I LE AVE TA’AVALE A O SE’I LE LAISENE

 

O le ali’i lea na maua e leoleo o lo o ia fa’afoeina se ta’avale a o se’i lona laisene ave ta’avale, ua molia nei o ia e le malo i le moliaga mamafa o le ave ta’avale ao se’i lona laisene, o se solitulafono e mafai ona fa’asala ai se tasi i le toese mo le umi e le silia i le 5 tausaga, po o le fa’asala fo’i i le salatupe e $5,000, ae fa’amalosia ai le tuli o aso e 90 i totonu o le falepuipui.

 

O le masina o Novema 2014 na ta’usala ai e le fa’amasinoga fa’aitumalo ia Mapu i le ave ta’avale ‘ona, ma nofovaavaaia ai loa o ia mo le 12 masina i lalo o poloaiga e ao ona usita’i i ai.

 

O ni isi o ia poloaiga e aofia ai le fa’asa lea ona ia toe aveina se ta’avale i totonu o le 6 masina.

 

O le vaiaso na te’a nei a o tiute leoleo i se vaega o le auala i Iliili, sa latou maitauina ai se ta’avale pikiapu lanu uliuli o lo o aga’i atu i le itu i Sisifo o le motu i se saoasaoa uiga ese, ae ina ua taofi e leoleo le ta’avale, sa latou vaaia ai Mapu o lo o ia fa’afoeina atu le ta’avale.

 

Ina ua fesiligia o ia i lona laisene ave ta’avale, sa fa’atoese le ua molia i leoleo o lana laisene o lo o se’i mo le 6 masina, ae o ia o lo o alu e piki mai lona tina ua manava.

 

I le aso na lau ai le fa’asalaga a Mapu i le tausaga na te’a nei, sa fautuaina ai o ia e le afioga i le ali’i fa’amasino ia John L. Ward II ina ia aua ne’i ona toe aveina se taavale i totonu o le 6 masina, afai fo’i e maua o ia o lo o ia fa’afoeina se ta’avale, o le a tu’uaia o ia i se solitulafono mamafa, ma, afai ae fa’amaonia e le fa’amasinoga lea moliaga, e fa’amalosia lona tuliina o aso e 90 i totonu o le falepuipui.

 

O le vaiaso fou lea ua fa’atulaga e toe tula’i ai Mapu i luma o le fa’amasinoga fa’aitumalo mo le isi ana iloiloga.

 

FETA’I AULEAFE

 

O le aso Faraile o le vaiaso nei lea ua fa’amoemoe e faia ai le iloiloga fa’apitoa o le mataupu i le va o Fetai Auleafe ma le malo i luma o le fa’amasinoga maualuga, ma iloilo ai loa e ali’i fa’amasino mau e lagolago ai tu’uaiga, ua le usita’i Auleafe i tuutuuga o lana nofovaavaaia.

 

E 5 tausaga o lo o nofovaavaaia ai Auleafe i luma o le fa’amasinoga, ina ua ta’usala o ia i lona umia a fa’asolitulafono o vaega o fualaau fa’asaina i le 2012.

 

Na tauaa e le Ofisa nofovaavaaia i le fa’amasinoga, e i ai tuutuuga ua le usitaia e Auleafe, o le mafuaaga lea o le tu’uina atu o lenei mataupu e iloilo e ali’i fa’amasino.