MOLIA TAVITA IAKOPO I LE FA’ATUPU VEVESI

O le ali’i e 18 tausaga le matua mai Fagatogo lea o lo o tu’uaia i lo la fa’ao’olima lea i se isi ali’i i le faleaiga a le McDonalds i Fagatogo i le fa’aiuga o le vaiaso na te’a nei, ua molia nei e le malo i le solitulafono mama o le fa’atupu vevesi i nofoaga faitele.

Na teena e Iakopo tu’uaiga fa’asaga ia te ia ina ua tula’i i luma o le ali’i fa’amasino ia Elvis P. Patea i le taeao ananafi, ma fa’atulaga ai loa le isi ana iloiloga e faia i le aso 17 Mati 2015, ma ua toe tatalaina fo’i o ia i tua e aunoa ma se tupe e totogi, e fa’atalitali ai le aso o le isi ana iloiloga.

O lenei mataupu na tofu atu i le Ofisa o Leoleo i Fagatogo pe tusa o le itula e 5:33 i le afiafi o le aso To’ona’i na te’a nei, ina ua logo e le ali’i na a’afia leoleo mo se fesoasoani.

Na taua e le ali’i na a’afia i leoleo e fa’apea, o le fa’alavelave na tula’i mai ina ua la o atu ma lona tina i se fonotaga sa faia i le potu fono a le fale’aiga o le McDonalds lea na auai atu ai lona tina, ae tula’i mai ai loa le vevesi ina ua fa’ao’olima Iakopo ma le isi ali’i o Carton Fiatoa ia te ia e aunoa ma se mafua’aga tatau.

Na sosola ese Iakopo ma Fiatoa a o lumana’i ai le taimi na taunu’u ai leoleo, peita’i e le i maua i laua i le taimi lea, ae na fa’atoa maua mulimuli Iakopo e leoleo ma taofia fa’apagota ai loa o ia, se’i vagana ai Fiatoa e oo mai lava i le taimi nei e lei maua e leoleo, e le o mautinoa mai fo’i i le taimi nei pe faila e le malo ni moliaga fa’asaga ia te ia.

O le ali’i na a’afia e 20 tausaga le matua mai Leloaloa, e lei i ai fo’i ni manu’a i lona tino i le taimi na taunu’u ai leoleo.

TETE’E HANG SONG LIN I TU’UAIGA A LE MALO

O le masina fou o Apereila lea ua fa’atulaga e faia ai le ulua’i iloiloga o le mataupu a le ali’i faipisinisi Asia lea o lo o tu’uaia i lona totogi tupe o ni tagata faigaluega se to’atolu a le Ofisa o Lafoga a le malo, ina ua ia teena moliaga mamafa e tolu o lo o tu’uaia ai o ia, ina ua tula’i i luma o le fa’amasinoga maualuga i le taeao ananafi.

O le tofu atu ai o le mataupu a Lin i luma o le fa’amasinoga maualuga, na afua mai ina ua fa’amaonia e le afioga i le ali’i fa’amasino ia Elvis P. Patea i se iloiloga sa faia i le aso Faraile na te’a nei, o lo o lava mau a le malo e fa’amaonia ai sa i ai se solitulafono sa faia, atoa ai ma mau e lagolago, o le susuga a Lin o lo o tu’uaia i le faia o lea solitulafono.

O lo o tu’uaia e le malo ia Lin i lona totogiin atu lea o le $100 i ni ali’i faigaluega se to’alua a le Ofisa o Lafoga, ina ia fesoasoani ai e fa’aitiitia le aitalafu a lana pisinisi i tulaga o lafoga i le malo, peita’i sa teena e ali’i e to’alua le $100.

Sa toe totogi e Lin le $1,000 i le isi tagata faigaluega a le Ofisa o Lafoga, ma talosaga i ai e fesoasoani atu i le tulaga o lafoga a lana pisinisi, peita’i sa teena e le tagata faigaluega lea le tupe, ae sa tula’i lava Lin ma alu ese ma le ofisa ae tu’u ai lava le $1,000 i luga o le kesi a le tagata faigaluega.

O lo o tumau pea tuutuuga o lo o tatala ai Lin i tua e fa’atalitali ai taualumaga o lana mataupu.

NOFOVAAVAAIA LE ALI’I GAOI

O le ali’i lea na tu’uaia i lona gaoia o ni pepa meaai (chips) mai totonu o se faleoloa i Tafuna, ua faanofovaavaaia mo le 12 masina e le fa’amasinoga faaitumalo, ina ua ta’usala o ia i le moliaga o le faatupu vevesi i nofoaga faitele, ae solofua e le fa’amasinoga le moliaga mama o le gaoi.

O le mea na tupu e pei ona taua e Lafoga Mata’u, o ia na alu e fa’atau mai ni isi a latou pia ma ana uo sa latou inu, ae tago ai nana pepa chips lapopo’a e lua i le taga o lona ofu sa fai, lea na toe maua ma toe fa’afo’i i le pule o le faleoloa i le po lava lea.

O isi tuutuuga o le nofovaavaaia a Mata’u e aofia ai le fa’asa lea ona ia toe alu i le faleoloa na tula’i mai ai le solitulafono, fa’asa ona ia toe tagofia le ‘ava malosi, atoa ai ma lona totogiina o le salatupe e $115.