TU’UAIA MANO FA’AGATA I LE FA’AO’OLIMA

Ua tu’uaia nei e le malo le susuga a Mano S. Tui Fa’agata i moliaga mama e lua e aofia ai le fa’ao’olima i le tulaga tolu ma le fa’atupu vevesi i nofoaga faitele, e afua mai i le fa’alavelave lea na ia fa’ao’olima ai i se isi tagata i totonu o se fale kalapu i le fa’aiuga o le vaiaso na te’a nei.

Na teena e Fa’agata, 69 tausaga o lona soifua tu’uaiga fa’asaga ia te ia ina ua tula’i i luma o le fa’amasinoga fa’aitumalo i le vaiaso nei, ma fa’atulaga ai loa e le fa’amasinoga le isi ana iloiloga i le fa’aiuga o le masina nei.

I fa’amaumauga a le fa’amasinoga o lo o taua ai e fa’apea, i le po o le aso Faraile na te’a nei, na logo ai e se molimau le ofisa o leoleo mo se fesoasoani, ina ua mae’a ona fa’a’o’olima le ua molia ia te ia i le fale kalapu o le Breakers i Iliili.

Na taua e le ali’i na a’afia i leoleo e fa’apea, sa manaia lava le latou tafaoga, ae fa’afuase’i ai loa ona tu’i e le ua molia lona gutu e aunoa ma se mafua’aga.

O leoleopo o le fale kalapu na fesoasoani i leoleo i le tau ta’ita’iina mai i fafo o Fa’agata, ina ua vaaia le ova o lona ‘ona, ma faigata ai ona tau fa’apaleni lana savali aga’i i le ta’avale a leoleo.

O ni isi o poloaiga ua tu’uina atu e le faamasinoga ia Fa’agata e usita’i ai ao fa’agasolo ai taualumaga o lana mataupu, o le fa’asa lea ona ia toe tagofia le ava malosi, fa’asa ona ia toe soli se tulafono, fa’asa fo’i ona toe tu i le fale kalapu na tula’i mai ai le fa’alavelave, a ia avea o ia ma tagatanu’u lelei e tausisi i tulafono a le malo i taimi uma.

FASI LE FAFINE INA UA MAUA LANA OVA

E 30 tausaga o se ali’i ua tu’uaia nei e le malo i le moliaga o le fa’ao’olima i le tulaga tolu atoa ai ma le fa’atupu vevesi i nofoaga faitele, e mafua mai i le fa’alavelave lea na ia fa’ao’olima ai i lona to’alua i le fa’aiuga o le vaiaso na te’a nei, ina ua maua e le fafine lana ova, e pei ona taua i fa’amaumauga a le fa’amasinoga.

O le po o le aso To’ona’i e aga’i atu i le vaveao o le aso Sa na te’a nei e pei ona taua i fa’amaumaug a le fa’amasinoga, na logo ai e le fafine na a’afia le ofisa o leoleo i Tafuna mo se fesoasoani, i le mae’a ai lea ona fa’ao’olima o lona to’alua ia te ia i lo latou aiga i Iliili, ma, ua ia sola ese fo’i mai lona to’alua ona o le fefe i le mea ua tupu.

Na maua e leoleo le fafine o lo o savali mai i se auala e le mamao ma le latou fale, ona latou piki lea o le fafine ma latou toe fo’i atu loa i lona aiga. Na taunu’u leoleo ma latou vaaia ai le ua molia, o lo o nofonofo i lalo o le ulu i tafatafa o le fale, ma latou pikiina lea o ia ma auina atu i le ofisa mo su’esu’ega, fa’atasi ai ma lona to’alua.

Na taua e le fafine na a’afia i leoleo e fa’apea, o le vevesi na mafua mai ina ua manava atu lona to’alua mai lana galuega, ona savali sa’o loa lea i le umukuka ua fai lana meaai, ae o le taimi lea o lo o fa’alogologo ai i pese mai lana telefoni i totonu o le potu.

A o fa’asolo pea lana fa’alogologo i pese, na fa’afuase’i ona tau lana fa’alogo i se talanoaga a lona to’alua ma se fafine sa pu’e i totonu o le telefoni, o lea na alu ai loa e fesili i lona to’alua e tusa ai o lea mataupu, ae na avea ma itu na ita ai le ua molia ma fa’asaga mai ai loa ua fasi o ia, e ala i lona ee atu ia te ia ma ta tu’i ona foliga, ao ia taumafai e fa’aaoga ona lima e tali ai ana tu’i.

O ni isi o poloaiga ua tu’u atu e le fa’amasinoga i le ali’i ua molia e tatau ona usita’i i ai, a o fa’agasolo ai taualumaga o lana mataupu, o le fa’asa lea ona ia toe fa’ao’olima i lona to’alua, po o le faia o ni gaioia e ono fa’amata’u ai o ia, ma lamatia ai lona saogalemu.

Na teena e le ua molia tu’uaiga fa’asaga ia te ia ina ua tula’i i luma o le fa’amasinoga fa’aitumalo i le vaiaso nei, ma ua toe fa’atulaga ai loa le isi ana iloiloga e faia i le vaiaso fou.

FELISE VALAAU

E 12 masina lea ua nofovaavaaia ai le susuga a Felise Valaau i luma o le fa’amasinoga fa’aitumalo, ina ua ta’usala o ia i le solitulafono o le fa’ao’olima i le tulaga tolu, e mafua mai i le fa’alavelave lea na ia tu’iina ai foliga o se ali’i na taumafai e fa’afefe lona atali’i.

Na faailoa e le ali’i fa’amasino ia Elvis P. Patea i le ali’i ua molia e fa’apea, e toe sasi loa se isi ana gaioiga i totonu o le 12 masina o lana nofovaavaaia, ona ia tuliina loa lea o aso e 30 i totonu o le toese, o lo o fa’amalumalu i tuutuuga o lana nofovaavaaia.

O le vevesi na tula’i mai ina ua fo’i atu le atali’i a Valaau i le fale o lo o tagi atu, ma ta’u i lona tama sa fa’afefe o ia e le ali’i na a’afia i luma o le faleoloa.

O le ita tele o Valaau na tula’i ai loa i luga ma savali i le faleoloa e saili le tagata na ia fa’afefe lona atali’i, ma ia maua atu ai le ali’i na a’afia o lo o inu pia mai sana uo, ma ia fa’ao’olima ai loa e ala i lona tu’i fa’alua o ona foliga.

O isi tuutuuga o le nofovaavavaia a Valaau, o lona auai lea i ni aoaoga e fesoasoani ai i le fa’afitauli o le ita o lo o a’afia ai o ia, aua ne’i ona toe soli se tulafono, ma ia totogi le salatupe e $125.