Ads by Google Ads by Google

Tala otooto o Fa’amasinoga

MATAIAINA TIATIA

 

O se tama pe a ma le 60 tausaga le matua lea na tu’uaia i lona fa’aaoga o se agaese e fa’ao’o ai manu’a i se isi ali’i, ua ia ta’utino i le fa’amasinoga e fa’amaonia tu’uaiga fa’asaga ia te ia.

 

Na ulua’i tu’uaia e le malo ia Mataiaina Tiatia i le moliaga mamafa e tasi o le fa’ao’olima i le tulaga muamua, atoa ai ma le moliaga mama o le fa’atupe vevesi i nofoaga faitele, ae i lalo o se maliliega sa sainia e le ua molia ma le malo, lea fo’i ua talia e le fa’amasinoga, ua tali ioe ai le ua molia i le moliaga muamua lea na toe teuteu e le malo lona mamafa, ina ia fa’ailoa ai le moliaga o le fa’ao’olima i le tulaga lua.

 

I le tali ioe ai o Tiatia i le moliaga o le fa’ao’olima i le tulaga lua sa ia ta’utino ai e fa’apea, i se taimi o le aso 15 Iulai 2015, sa ia fa’aaogaina ai se agaese e fa’ao’o ai manu’a i se isi ali’i.

 

O lea gaioiga sa ia faia sa mafua ai ona o o se manu’a i le tauau o le ali’i na a’afia, ma o se gaioiga fo’i sa le fa’atagaina i lalo o le tulafono a le malo o Amerika Samoa.

 

I le taliaina ai e le fa’amasinoga o le tali ioe a Tiatia, na talosaga ai loa le malo i le fa’amasinoga ina ia solofua le moliaga mama o lo o totoe ai i le pepa o le tagi sa latou fa’aulu, le moliaga o le fa’atupu vevesi i nofoaga faitele, lea fo’i sa talia e le fa’amasinoga maualuga.

 

Na taua e Tiatia ina ua fesiligia o ia e le fa’amasinoga maualuga i le mafua’aga o le fa’alavelave, sa ia taua ai e fa’apea, o le ova o lona ita i le ali’i na a’afia na mafua ai ona tula’i mai le fa’alavelave.

 

Na matua oso lona ita i le ali’i na a’afia, ona o lana gaioiga sa fai i lona ma’umaga, fa’apea ai ma ana upu tau faifai sa fai i lana fanau i luga o le pasi, ae ina ua ia mauaina o ia o fa’atali lana pasi i le aso na tula’i mai ai le fa’alavelave, sa ia fesili ai loa pe aisea ua ia faia ai nei uiga, peita’i sa ia vaaia le ese o le tali sa tu’uina atu e le taule’ale’a ia te ia, e foliga mai o lo o fa’amaualuga ma lana tali, o le mafua’aga lea na ia taina ai loa lona tau’au i le sapelu.

 

O lo o taofia pea Tiatia i le toese i Tafuna e fa’atali ai le aso 6 Aperila lea ua fa’atulaga e lau ai lona fa’asalaga, i luma o le afioga i le ali’i fa’amasino sili lagolago ia Lyle L. Richmond, ma ana fa’amasino lagolago ia Mamea Sala Jr ma Tunupopo Faleafaga.

 

O le ali’i loia ia Russell Smith sa tula’i mo le malo i lenei mataupu, ae o le ali’i loia ia Marcellus Tala Uiagalelei o lo o tula’i mo Tiatia.

 

JOE TOGITOGI

 

Ua taoto atu nei i se fa’aiuga a le fa’amasinoga maualuga le mataupu o lo o tu’uaia ai e le malo ia Joe Togitogi, e mafua mai i le fa’alavelave lea na tula’i mai i Nuuuli i le tausaga na te’a nei, lea na ia fa’aoolima ai i se isi ali’i ma manu’a tigaina ai lea ali’i.

 

E na o le tasi lava le aso na iloilo ai e ali’i fa’amasino mau fa’amaonia e uiga i lenei mataupu ae mae’a loa, ma ua toe taofia nei Togitogi i le toese e fa’atali ai se fa’aiuga tusitusia a le fa’amasinoga.

 

O mau fa’amaonia sa tauaao e le malo i luma o le fa’amasinoga maualuga, e aofia ai le fa’amatalaga a le ali’i na a’afia, lea sa ia fa’ailoa i leoleo ma le fa’amasinoga, ao ia taumafai e fesiligia Togitogi i le TV a le tama a lana uo teine sa ia gaoia, na te’i ina ua tu’i o ia e Togitogi ma pau ai i lalo, tulioso atu ai loa ma isi tamaiti sa latou i ai fa’atasi ma fasi fa’amo’amo’a loa o ia.

 

O se ali’i na alu atu i lana ta’avale na tula’i atu ma fesoasoani i le ali’i na manu’a, e aofia ai ma le auina atu o ia i le falema’i mo togafitiga, peita’i i le fa’afinauga a le itu tete’e, o lo o finau ai Togitogi e fa’apea, na te le’i tu’iina le ali’i na a’afia, ae o le ali’i lea na ia muamua tu’i o ia, sosoo ai loa ma le tulioso atu o isi tamaiti Nuuuli sa latou i ai fa’atasi i le taimi lea ma fasi loa o ia.

 

O le afioga i le ali’i fa’amasino sili ia Michael Kruse sa fa’atautaia le iloiloina o lenei mataupu, fa’atasi ai ma le lagolagosua a afioga i ali’i fa’amasino lagolago ia Muasau Tasina Tofili ma Tunupopo Faleafaga.

 

SAMUEL WRIGHT

 

O le ali’i lea e to’atolu i ai ali’i o lo o tu’uaia i le fa’alavelave lea na osofaia ai le faleoloa o le Gold Gonda Store i Fagaalu i le masina o Me 2015, ua fa’atulaga lana fa’amasinoga autu e faia i le vaiaso fou.

 

O le ali’i o Samuel Wright lea o lo o tu’uaia i moliaga o le faomea, gaoi, talepe fale, atoa ai ma le umia o se a’upega mata’utia, o lo o taofia pea i le toese i Tafuna ina ua le mafai ona ia totogiina le tupe e $100,000 sa fa’atulaga e tatala ai o ia, e fa’atali ai le aso o lana fa’amasinoga autu.

 

O lo o tu’uaia e le malo ia Wright fa’atasi ai ma isi ali’i e to’alua i lo latou taupulepule lea e osofa’i le faleoloa na a’afia. O lo o taua e le malo e fa’apea, o Wright ma le isi ali’i na ulufale i totonu o le faleoloa, ona fa’alala lea e Wright le fana i le fa’atauoloa ina ia mafai ai ona aveese mai se vaega tupe, ae o le isi ali’i e to’atolu i ai i latou o lo o fa’atali atu i fafo i le ta’avale.